Шеърилугърал театрдануву вания гихунмай батIлантIисса «Халкьуннал депутат» клубрал лагрулий ДР-лул Халкьуннал Мажлисрал депутат, Миллатирттал арардал, жяматийсса иширттал ва диндалул сакиншиннардил комитетрал вакил Тимур Гусаевлул МахIачкъалаллал халкьуннал чулухасса суаллан жавабру дуллунни.
З. АьбдурахIманова
Хьунабакьаву хьунни гьарнал цала пикри-зикри кIибачIлачIисса ва обществалуву бусса масъалартту ххалбигьлагьисса.
Клубрал даву дачин дурсса ДР-лул Халкьуннал Мажлисрал депутат Фикрет Раджабовлул бувсунни цивппа Тимур Гусаевлущал гьуртту хьушиву Агъуллал райондалий уттигъанну хьусса депутатътурал форумрай ва гикку райондалул ва щархъал депутатътурахь цаппара насихIатру, даврил хIакъиравусса маслихIатру бувшиву. Мукунма депутатътал мува мурадращал бивну бур Рутуллал райондалийнгу.
Тимур Гусаевлул кIицI лавгунни уттигъанну Дусшиврул къатлуву хьусса депутатътурал форумрай гьуртту хьушиву республикалул парламентрал ва муниципалитетирттал мажлисирттал депутатъталгу ва микку хьусса ихтилатирттаву гьаз бувну бивкIшиву жула региондалийн багьайсса личIи-личIисса суаллу.
Клубрал батIаврий мукунма ххал бивгьунни жагьилтурал политикалийн багьайсса масъаларттугу.
Шиккува дакIнийн бутан, «Халкьуннал депутат» цIанилусса клуб тIивтIуну бур ДР-лул БакIчи Рамазан АьбдуллатIиповлул сипталий. Ванийн бувну, клубраву цала-цала чIурдубулултращал хьунабакьлантIиссар «Единая Россия» партиялул чулухасса республикалул парламентравусса ряххилчинсса созыврал депутатътал ва арулчинсса созывравунсса кандидатътал.
Шикку политикалул партиялул вакилтурал бусавантIиссар цала дансса давурттал программардая ва партиялул цала хьхьичI бивхьусса мурадирттая. Вай хьунабакьавурттай мукунна депутатну наниманал чулухасса вакилтурахьгу гьуртту хьунсса ихтияр дуссар.
