Ухссавнил Ккавкказуллал иширтталсса буллалисса Аьрасатнал министерствалул зузалтрал группалул июнь зурул 29-30-нний ЦIуссалакрал райондалий ххал диргьунни лак цIуминалийн бизаврил ва тийх кьаритлатисса къатри чачаннахьхьун зана даврил тагьар. Му тагьар ххал дигьин бувкIсса Минккавкказуллал комиссиялуву бия Территориал развитиялул департаментрал директорнал хъиривчу Ифраим Юдаев, отделданул хъунама специалист-эксперт Илья Чакалиди, отделданул специалист МахIмуд Цутиев.
Июньдалул 29-нний администрациялул актовый залдануву хьунни, кIицI лавгминнацIун, бизан баврилсса буллалисса республикалул ХIукуматрал управлениялул хъунама М. МахIаммадаьлиев ва мунал хъиривчу МахIмад Антаев гьурттусса собрание. Микку ихтилат буллай, Минккавкказуллал комиссиялий каялувшиву дуллалисса Ифраим Юдаевлул бувсунни, лак цIусса миналийн бизан баву лахъи лавгсса иш бушиву, кIива-шанма миллатрал мурадру буруччин аьркинсса масъала бухьувкун, даву сантирай ва хъинну хъирив лавну дуван багьлагьисса душиву, цукунчIав цавагу миллатрал ихтиярду ссуссукьу дурсса кIанугу къабикIантIишиву. МахIаммадаьли МахIаммадаьлиевлул бувсунни цивппа, нюжмардий цал тIиссакссагу, хьунабакьайшиву къатри зана дуллалиминнащал ва кьамул дуллалиминнащал, бувсунни тамансса актирдай къулбасру дурну душиву, Минккавкказуллал хъунимигу, республикалул хъунимигу бизан баврил масъала анавар буккан буван чялишну бушиву. Актовый залданувусса собрание къуртал хьуну махъ, райондалул бакIчинал кабинетраву хъамаллурал кьамул бунни яруссаннал делегация. Депутатътурал райсобраниялул председатель Мавлидин Исламаьлиевлул бувсунни Ауховский район цIудуккан дуллалини яруссаннал агьалинал мурадругу хIисавравун ласун аьркиншиву. Хъирив кьини, июнь зурул 30-нний, райондалул хъунама ХI. Айдиевлущал ва бизан баврил масъалартталсса буллалисса хIукуматрал управлениялул вакилтуращал Минккавкказуллал комиссия бивунни цIуминалийнгу, миккугу ххал бивгьунни кIайва масъалартту.
ХIадур бувссар
П. Рамазановал
