ЦIусса миналийсса ЦIуссачIурттащиял жямат цала чулухату­сса барчаллагь баян буллай бур уссурвал ХIажи ва Фрунзе Айдиевхъайн.

ХIажи Айдиевлул хъунмасса кумаг бунни ЦIуссачIурттащиял школалийсса спортрал площадка аьркинмунил щаллу бан. Шикку­сса спортрал площадкалий чIяруну шай райондалул ва республикалул кьаралданийсса спортрал соревнованияртту. Чан­сса къабикIай ми соревнованияр­ттах бурган бувкIсса тамашачиталгу. Ми щябикIайсса трибунарду мурчая, гъарая ва бургъия мюхчан бан ХIажи Айдиевлул кумаграйхчин щаллу дурунни трибунарттал ялтту магъи дишаву. Апрель зуруй дайдирхьуну, цалчинмур майрал байрандалул кьини къуртал хьусса, «Кубок Лакии» тIисса, мукьцIаллахъул лакрал командарду гьуртту хъана­хъисса футболданул турнирдай гьур­тту хъанахъими дукиялул ва щинал щаллу бансса харжлугъгу райондалул хъунаманал цала бакIрайн ларсун дузал дуруна. Укунсса къулагъас даврихлу, шяраву цукунсса-бунугу хъунмасса спортрал мажлис бусса чIумал ка-кумаг баврихлу ЦIуссачIурттащиял жямат, хаснува жагьилтал, ХIажи Шихамировичлуйн хъунмасса барчаллагьрай бур.
Фрунзел тIурчан, вай аьрапалул гьантрай, цаяватувасса цадакьану, ЦIусса миналийсса Шушиннал, Аьхъар­дал ва ЦIуссачIурттащиял щархъал жяматран, гьарца хозяйствалун ца дарваг хIисаврай, ппиринж бавчIунни. Бусраврай цадакьагу кьамул бувну, АллагьначIа чирину лякъинсса даврихлуну жяматгу Фрунзе Айдиевлуйн барчаллагьрай бур. ЧIа тIий бур уссурвал Айдиевхъан цIуллушиву, ттиния мукьахгу ка-кумаг буллансса каши.
ЦIусса миналийсса
ЦIуссачIурттащиял
жяматрал чулухату