Июль зурул 15-нний Республикалул БакIчи Рамазан АьбдуллатIипов хьунаавкьунни Дагъусттаннайсса Антитеррористическая комиссиялул экспертный советрал члентуращал. Микку танал бувсунни экстремизмалущалсса ва терроризмращалсса талатаврил масъалартту республикалий уттигу агьамсса ва къювулийсса бушиву, хIатта хIисавравун ласунсса дахханашивуртту хьуну духьурчагу махъсса кIира-шанна шинал лажиндарай.
П. Рамазанова
«Му бигьасса даву дакъар, жунма бувчIлай бур ихтиярду дуруччай органнал хIарачатрайну махъсса шиннардий тагьар ххуй хьушиву, агьалинангу, бизнесраха зузиминнангу, властьрал структурардаву зузиминнангу хIисав хьунни хъуннасса даву дурну ва дуллай бушиву, гужирдал блок цIакьну му иширал ялув бавцIуну бушиву», — увкунни Рамазан ХIажимурадовичлул.
Бувсунни ттигу му ялувбацIаву хIура дуккан къаритан аьркиншиву, «жигьадрахлуру» тIий, хъяврин хьуну дагъусттаннал жагьилтал Сириянавун най бушиву, ми ватандалийн хаин хьусса инсантал бушиву. Бувсунни миннан ссаву ци буссарив бувчIин буллалисса, бакIрай бацIан буваву хIарачатрайсса давурттив дуллан багьлай бушиву. «БувчIин буллалисса даву кIани-кIанттурдай хьхьарану дур, му, элмийсса хIуччарду хьхьичIун ласлай, грамотнайну ва сантирай дуван аьркинсса давур. Кувний районнал АТК-ттал секретарьталну битлай бур даву хъинну къакIулсса инсантал, ми конкурсрал гьанулий битлан аьркинну бунува. Экстремизмалул ва терроризмалул идеологиялул базардан кабакьу буллалиминнащалгу талатаву ягин дуван аьркинни, исламрал лозунгругу багьана дурну, оьттух къанихсса инсантал гьарзат оьлуккин дуллай бур», — увкунни Республикалул БакIчинал.
ХIукуматрал председательнал хъиривчу Рамазан Жяъпаровлулгу экспертный советрал дурсса давурттая гьарза-гьартану бувсунни. Заседаниялий гьаз бунни интернетрал ва СМИ-рдал кумаграцIух терроризмалущалсса даву ягин дуван багьлай бушиврул ххуллу-чаранну ккаклакисса масъаларттугу.
