Аьрасатнал Президентнал СКФО-лийсса вакил Сергей Меликов ва Дагъусттан Республикалул БакIчи Рамазан АьбдуллатIипов хьунабавкьунни ДР-лул ХIукуматрал члентуращал, низам дуруччай органнал зузалтращал, МахIачкъала ва Дарбант шагьрурдал бакIчитуращал. Хьунабакьаврий ххалбигьлай бия МахIачкъала ва Дарбант шагьрурду хьхьичIунмай шаврийн багьайсса суаллу. Микку гьуртту хъанахъиминнал хIисавравун лавсун бия полпреднал цIаний дуркIсса агьалинал оьвчавуртту, ми оьвчавуртту ххалдигьаврил ялув дурсса давурттал хIасиллу.
Сергей Меликовлул кIицI лавгсса куццуй, чIяруми оьвчавуртту дуркIун дусса дур чIявуквартирарду бусса къатри бансса аьрщи закондалуцIун дархIуну дулаврийн ва ми къатри бан рухсат буллалисса документру булаврийн багьайсса.
КIилчинсса кIанттай бия ЖКХ-лул буруккинттайн, ичIаллил шартIру ххуй даврийн, лекьлакьисса къатрава агьали бизан баврийн багьайсса.
Дарбант шагьрулий гьашинусса шинайннин агьаммур объектну личIлай бусса бур федерал программалувун дуртсса хьхьирил зума. «Дулун ккаккан дурсса сайки цинярда арцу дуркIссар, август зуруй зий байбишинтIиссару, шинал ахирданийннин ми давуртту дурну къуртал дантIиссар. Цамур агьамсса объект бур 15-мур школа. Август зурул 15-ннийн, гьарца давуртту къуртал дурну, школа тапшур бан ккаккан бувну буссар. Аэропортрал микрорайондалийсса детсад бувну къуртал бувссар, так тIитIин ливчIун буссар», — увкунни ХIукуматрал хъунаманал.
Аьбдуссамад ХIамидовлул дакIнийн бувтуна 2015-2016 шиннайрдийнсса давуртту дуллай бушиву ххуллул картардацIун бавкьуну. Дарбант шагьрулул администрациялул ккаккан бувну бусса бур къатри бансса кIантту. Буллай байбивхьуну бусса бур 13 чIявуквартирарду бусса къатри. «Шинал ахирданийннийн тапшур бан ккаккан бувну буссар лекьавайсса къатрава 900 инсан (300 кулпат) изансса 14 азарда кв.м.. 2016-2017 шиннардий тапшур бан ккаккан бувну буссар 500 кулпат бизансса 25 азарда кв. м.», — ххи бунни ХIукуматрал хъунаманал.
