Республикалул БакIчи Рамазан АьбдуллатIипов ивунни Да­гъусттаннал кIулшиву дулаву хьхьичIуннай даврил институтравун. Ххал дунни вай къатрал дакьин дурсса фасад. Гихунмай республикалул каялувчинащал бувсса экскурсиялул лагрулуву ххал бунни институтрал центрду ва кафедрарду, ттигъанну бакьин бувсса спортзал.

Дурсса давурттан, хьусса да­хханашивурттан Рамазан Аьб­дуллатIиповлул бивщунни лавайсса кьимат, буллунни институтрал даврил даража лавай бансса маслихIатру.
Республикалул БакIчинащал увкIун ия кIулшиву дулаву хьхьичIу­ннай даврил институтрал проректор Шагьрудин Шагьовгу.
Шиккува дакIнийн бутан, институт тIивтIуну бур 1928 шинал, халкьуннал кIулшиву дулаврил къатта хIисаврай. 1996 шинал тихунмай муния бувну бур Дагъусттаннал педагогикалул зузалтрал пишакаршиву ларай дайсса институт. 2015 шинал институтран цIа даххана дурну дур — Дагъусттаннал кIулшиву хьхьичIуннай даврил институт. Институтравун бухлай бур 5 центр: кIулшиву дулаврил даражалун кьимат бищайсса, цилгу ххал байсса бур КИМ-ру, дайсса дур ДР-лул школарттал мониторинг; гьунар бусса оьрчIащалсса даврил ялув бавцIусса центр, ва центрданул канилух дуккайсса дур гьарцагу олимпиадартту ва конкурсру; центр обработки информации, ЕГЭ-рдал ялув бавцIусса центр; педагогикалул зузалтрал аттестация дайсса центр. Шиккува зий бур информациялул технологиярттал центр, дистанционныйсса кIулшиву дулаврил ялув бавцIусса, семинарду байсса. ИнститутрачIа зий бур ДР-лул Халкьуннал кIулшиву дулаврил музей, библиотека, редакционно-издательский отдел. Кварталданий цал институтрал итабакьлай бур журнал «Модернизация образования».
Институт хъанай бур республикалул, щалвагу Аьрасатнал ва дунияллул халкьуннал лагрулий­сса мероприятияртту дайсса площадканугу.