РАМАЗАННУЛ АРС ХIУСАЙНОВ ШЯЪВАН
Июньдалул 22-нний, Алжаннул къапурду тIивтIусса Рамазан зуруй, жуятува лавгунни аслийсса зунтталчу, чумартсса тIуллал заллу, райондалул иширттаву чялишну гьуртту шайсса ХIусайнов Шяъван Рамазаннул арс.
Увну ур Шяъван 1948 шинал июльданул 10-нний ШавкIуллал шяраву. 1964 шинал къуртал бувну Щурагьсса шяраваллил хозяйствалул училищагу, 2 шинай зий ивкIун ур ШавкIуллал колхозрал трактористну. Яла, шофертал шайсса курсругу бувккуну, 6 шинай зий ивкIун ур «Заготскотрай». 1977-1979 шиннардий ивкIун ур ШавкIуллал колхозрал председательнал хъиривчуну. 1979-1984 шиннардий зий ивкIун ур ШавкIуллал советрал председательну. Ялагу 1984-1987 шиннардий – вара колхозрал председательнал хъиривчуну. 1987 шиная шихунай лажин кIялану дачин дурну ия ШавкIуллал СПК.
ДакI тIайласса, дус-ихтиваршиву дуруччайсса, жяматрал, зузалтрал кьадру бусса Шяъван бусравну ия жяматраву. Ванайн чIявучил «ШавкIуллал жяматрал ттарцI» учайссия. Ххюва базилух Шяъван жяматрал увчIуссар Райондалул собраниялул депутатну.
Агропромышленный комплексрал давриву буллалисса захIматрахлу ванан буллуну бур Аьрасат Федерациялул Шяраваллил хозяйствалул министерствалул чулухасса барчаллагьрал чагъар.
2011 шинал Дагъусттан Республикалул Президентнал Шяъваннун дуллуссар ХIурматрал грамота.
Шяъваннул бивкIулул кьурчIишиву кIидачIлай, жижара буллай буру ванал кулпат Сарайжагьаннухь, арсваврахь, душваврахь, уссихь, ссихь, циняв гъанчунахь. Ванан къабуллусса оьрму оьрчIан булуннав!
Алжан нясив баннав, гьав нурданул дуцIиннав!
Лакрал райондалул
администрация,
Райондалул
собрание
——————————-
Ханнал арс Ханнаев Шарабуттин
ЗахIматсса цIуцIаврища ххассал къавхьуну, оьрмулул 58 шинаву жуятува батIул хьунни цала тухумралгу, жяматралгу дянив бусравну ивкIсса, авкьусса инсан, аьчухсса дакIнил заллу, Ханнал арс Ханнаев Шарабуттин.
Шарабуттин увну ур ЦIуссаккулув Хъювхъатусса Ханнал ва Ваччатусса Загьидатлул кулпатраву.
Ва ия дустурал дянив бусравсса, хIурмат бусса, кьини дуркманал чIарав ацIайсса, хъатIай ва хъиншивурттай акъа чара бакъасса, уний кIану ххуй байсса адамина.
Шарабуттин ия ляличIинува нинугу ххирасса, ниттин личIинува цувагу ххирасса оьрчI. Гъаргъунни ниттил хъаругу, дирчунни гъан-маччанал хъачIругу, махIрумну ливчIунни дусталгу.
Шарабуттин дунияллия лагаврил хъуннасса кьурчIишиву кIидачIлай, дакIнийхтуну жижара буллай буру ванал кулпатрахь Нуриятлухь, ниттихь Загьидатлухь, уссихь ХIасан-ХIусайннухь, ванал оьрчIахь, душнихь, ссурваврахь, ссурахъаврахь ва махъсса гъанчунахь.
Ванан бакъасса оьрмулул бутIа махъминнан буллуну лякъиннав. Цал гьав нурданул дуцIиннав, бунагьирттал аьпа баннав.
Дустал, гьалмахтал
Шарабуттиннул
аьпалун
Гъарал чявхъа баяйрив,
Мурчал хьхьев-хьхьев баяйрив,
Миннувух бишлашисса
Ниттил ав-ав баяйрив?
Вила хъирив аьтIисса
Жугу чIалан бикIайрив,
Тухумрал ттарцIну ивкIсса
Левкьуну лавгсса къалай?
«Дадал» — ниттил учавай,
«Гьуя» — ссурваврал чавай,
Къуч дурну нани данссар
Ина акъа дуниял.
Язухъ вил ххуй оьрчIругу,
ЯхIру гъавгъун ливчIусса.
Язухъ вил чIара щаргу,
Вил гьаттай аьтIутIисса.
Гьаксса барчаллагь хьуннав
Вил ххуйсса дустурайнгу,
Ина янил увгьуну,
Вил чIарав бавцIун бивкIсса.
Ялагу барчаллагьри
Цинявппагу халкьуннайн,
Вил махъва-махъсса аьрххи
Лахъа-хъун буван бувкIсса.
Вил ххуйшиврун лавхьхьусса
Махъругу лякъин къашай,
Хъирив хъапа тIийннасса
ДакIругу рахIат къашай!
Гъан-маччанал чулуха
——————————
МАХIАММАДЛУЛ ДУШ КАМИЛОВА ЗУЛАЙХАТ
Июль зурул 22-нний ЧIяйннал шяраватусса МахIаммадлул душ Камилова Зулайхат аьпалул хьуну ца шин там хъанай дур. Лавгунни Зулайхат оьрмулул 60 шинаву, захIматсса азаруннища ххассал къавхьуну, лас ва кIия арсгу, ца душгу кьабивтун.
Зулайхат зий буссия Къизлар шагьрулий сбербанкрал хъунама бухгалтернал хъиривмурну, мува Къизлардал Рисводстройрал трестрал отделданул хъунмурну, райондалул налогирттал инспекциялул хъунмур бухгалтерну ва цаймигу ххуйсса давурттай. Чув зурчагу, даврил мухIлу-хIин ххуйну кIулсса, бюхъу-хIарачат бусса Зулайхатлул цIа гьаз шайссия коллективраву, мунил даву усттарну ва сантирай дувайшиврул цIа дурккун дуссия. Зулайхат бия инсантуращал хIал бавкьусса, хъинбала бангу, ххуймур бангу чялиш буккайсса инсан. Мунил кьурчIисса бивкIулул къумашиву кIидачIлай, жижара буллай буру ласнахь, арсурваврахь, душнихь, гъан-маччанахь, щалвагу агьлу-авладрахь. Зулайхатлул рухI хъинний дишиннав, гьаттай нур дизаннав, мунин къабуллумур оьрмулул бутIа наслулун ххи бувну лякъиннав!
ЧIяйннал жямат
Къаттагу цIан хьунни, чирахъ левщунни
Оьрмулул дуснал аьпалун
Ялату гъили баргъ левщун лавгунни,
Чаннасса дуниял цIаннал дургьунни,
ДакIниву асарду бяхълай ливчIунни,
Къаттагу цIан хьунни,
чирахъ левщунни.
Дунияллул чаний, къатлуву чирахъ,
Яру пиш тIийнмасса
ххира Зулайхат!
Абадсса тарихрайн
кIункIу хьуссарав,
Чаннасса дуниял тти
кьадиртссарив?
Гьайбатрай цIу бусса,
дакI цIимилулсса,
Хъамалгу ххирасса,
мазгу пасихIсса,
Лавгссарав, Зулайхат,
жун ххал къашайнийн,
Маччами ва гъанми
оьвтIий кьабивтун?
Къатта бачIва хьусса цир
тти жу байсса,
Щилли ххари дайсса
пашмансса дакIру?
Хъамабитайссарав
жун ина тачIав,
Агь, цIуцIаврил рахIму
цан къабайривав?
Алжаннаву хьуннав утти инагу,
Жагьилнува лавгсса
бунагь бакъултгу,
РахIатний дишиннав,
Зулайхат, вил рухI,
Вин къабуллу оьрму
махънан булуннав!
С. Камиловa.
МУСИЛ АРС ХIАЖИМИРЗАХЪАЛ МУСА
Июль зурул 20-нний, къашавайгу къавхьуну, хар-хавар бакъа оьрмулул 73 шинаву дунияллия лавгунни инсаншиврул бутIа Аллагьнал ххишала бакъа лавайну буллусса, ХIажимирзахъал Мусил арс Муса.
Муса увну ур 1942 шинал ГьунчIукьатIрал шяраву. Январьданул 4-нний кIюрххицIун арс увну, ахттайнай ванал бутта Муси, повесткагу дуллуну, дяъвилийн тIайла уклай бивкIун бур. Муси балайгу тIий най ивкIун ур шяраваллил советрал хьхьичIух. Хъами бивкIун бур: «Да, Муси, хъатIийн наниссарав, балай тIий урахха?» — тIий. Муси ия тIар: «Наслу кьабитав, наслу кьабитав!» — тIий, кIира ссятрал хьхьичI дунияллийн увксса цала арсная ххаришиву баян буллай. Гара шинал Новороссийскалийн десант бичлай буна, Мусигу усса десант бусса пароход бюкьан бувну бур. Къанясив хьуну бур Мусан буттал лажин ккаккан. Ванан 7 шин къархьуну, нинугу диркIуну, цаярва 2 шинал хъунмасса ссугу, вагу ятинтал хьуну бур.
Буттал шяраву 7 классгу къуртал бувну, Каспийскалийн интернатравун лавгун ур. Микку 1960 шинал къуртал бувну бур 10 класс. Увххун ур «Дагдизель» заводрайн токарну зун. Муса зоотехник шайсса факультетрайн кьамул къаувну ур. Амма ва лавгун ур летчиктал шайсса училищалувун. Тивун уххан ххишала дакъа ларайсса кIулшиву аьркинну диркIун дур. 1962 шинал августрай Муса кьамул увну ур комиссиялул кандидатну лавайсса летчиктал хIадур бувайсса Армавирдал летный училищалувун. Дуклай ивкIун ур хъинну ххуйну. КIилчинмур курсирава Лениннул стипендия ласлан ивкIун ур.
1966 шинал училище къуртал бувну бур ЯтIул дипломрай. КIира шинай хъунама летчикну къуллугъ буллай ивкIун ур Корченский истребительный ПВО-лул полкраву.
1971 шинал ХIажимирзаев Мусан дуллуну дур 1-мур классрал летчикнал квалификация. 1978 шинал ванал къуртал бувну бур В.И. Лениннул цIанийсса военно-политическая академия. 1985 шинал къуртал бувну бур заочнайну адъюнктура гава академиялуву. ХIажимирзаев Муса лайкь хьуну ур «ЯтIул цIукул» ордендалун ва 11 медальданун.
Цалва кулпат Султан-ПатIиматлущал Мусал хъуни бувну, чивун буккан бувну бур арс ва душ. Цала буттан цIасса арс Мусигу полковник ур, лавайсса даражалул хIаписар. Муси мудангу уссил Ставрополлал крайрайсса Дагъусттаннал Культуралул центрданул членну.
Муса ия ххишала акъа ларайсса кIулшиврул заллу, дакI-аьмал уздансса, хIалимсса инсан.
ХIажимирзахъал Мусал бивкIулул кьурчIишиву кIидачIлай, жижара буллай буру ванал кулпатрахь, арснахь, душнихь, ссихь, махъсса цинявппагу гъан-маччаминнахь. Цал бунагьирттал аьпа баннав, рухI алжаннул ххари даннав, ванан бакъамур оьрчIал оьрчIан булуннав.
ГьунчIукьатIрал ккурандалул чулуха Амин Аьбдуллаев
ДакIния къабуккара
Гьантта лаглай, барз лаглай, хьхьунил ккарксса макI кунна, шанна шин бартларгунни, аьтIий нагу кьадиртун, ина лавгун, Гульмирай.
Ттул янил чаний, дадал, къалагара дакIния. Ялугьлайна дикIара бучIавивав тIий, хьхьу кьинилийн дурккукун, махIрум хьуну личIара. Даву усттарну дайсса, архIалми зукьлурдайсса, цинявннан ххирасса ттул душ, ттул янил чаний. Дура ттунна наралу, вил бивкIулул аьзаврай, дакI гъюжу дурккун.
Жамисат Муртазааьлиева,
ш. ЧукIун
