Лакку билаятрай дянивсса шяравалугу хъанай дур ГьунчIу­кьатIрал щар. Цурда чIиринугу чIан куртIсса тарихрал шяравалу хъанай дур.
Ванияр 1000 шинал хьхьичI хъун дакъасса шяравалу, мулкру, мащив цачIун хьуну цIусса цIагу дирзун циняв кьатI цачIун бавтIун маслихIатрайхчIин ца мукъуйн бувкIун дурсса шяравалу дур ва. Ва цурдагу шанма ссакIлия (махIлалия) Хъанардал ялтту ссакI, Айдамирхъал ляв ссакI, Гъазахъал лултту ссакIлия сакин хьуну дур. Лултту махIлалий дур цIанагу сагъну 380-лийсса шинну хьусса чIаттирду бавхIусса къатри.

ГьунчIукьатIрал жяматрал бусурман дин кьамул дурну дур ва цIана ялапар хъанахъи­сса кIанттай мина дирхьуну махъ. Мунин барашинна хъанай дур вай агьлу хьхьичIва ялапар хъанай бивкIсса минардай ца бусурманнал гьав дакъашиву. Ва цIуну дурсса миналийгу царагу цамур диндалул я гьав, ягу хIатталу да­къашиву. Вайми Лакрал щархъал кунна вайнналгу бусурманшиву кьамул дурхьунссия 10-чинмур ттуршукулий ягу чансса махъ.
ГьунчIукьатIрал хъунна­сса дахIаву, хIалашиву диркIун дур Гьухъаллащал. Бю­хъай мунийхчIин вайнналгу кIайн­нащал архIал кьамул дурну дикIан дин. Жул шяраву бивкIун бур мадара аьжамрай дурккуссагу, мукунма аьраб ххуйну кIулсса, буккин-чичин кIулссагу. Шяраву шанма мизит бивкIун бур, кIива мизитрачIа мактабру (школарду) тIивтIуну оьрчIру-душру кьурандалий битайсса бивкIун бур. Аьжам­рай буккин-чичин ла­хьхьин ми бакъасса Мударисна­хъал Аьбдулкьадирдул цачIава шаппа гьуква ду­ккин байсса бивкIун бур оьрчIру. ХIажимирзахъал Нажмуттиннул мадраса тIивтIуну ваначIа цайми шяраваллава, районнаяссагу ккалай бивкIун бур. Мудунов Абакардул бу­ттал Аттал Аьлилгу оьрчIахь дарс гьукра дишайсса диркIун дур. Малла-Аьлил хъунама арснал ХIухъайнил оьрчIру цинявппа чачаннаву, ингушнаву, Ажайрай, Яман-суйлий, Костекрай ва цаймигу кIанттурдай мизитирттаву зий Аллагьнал къуллугърай бивкIун бур марцIсса бусурман дин дачин дурну. Чавтар ХIажинал арс МахIаммад 15 шинай Кюриннал Юсуп-ханначIа дилмажну зий ивкIун ур. Кьурбан-Аьлил ацIрахъул шиннардийсса захIмат диндалул ттиркьюкьи «ГьунчIукьатIан» луттираву чIалай бур. Мунала арснал Нурулисламлул 23 шинаву лу итабавкьуну бур. Мунала чIивима арс Ибрагьин-ХIасан 16 шинаву назмурду чичайсса шаэр ,чичу хьуну ур, му цувагу Гьарун Саэдовлул дус ивкIун ур. Цала чIивима арснан цала дуснал цIа Гьарун дирзун дия. БивкIссар цаймигу аьрабгу, аьжамгу кIулсса ХIажимирзахъал хъуна Давуд, Садикь, Нажмуттин. Мукуна Убринал дусгу, хьхьичIунсса ученикгу Мирза-хIажи ва цаймигу. Ттунна кIилчинсса жагьилшиву дуллусса «Илчилий» зий 15 шин хъанай дур, цIунила «Илчи» дунияллийн бувккун 25 шин там хъанай дур. Ва макьалагу чичлай ура ва «Илчи» ванияр 100 шинал хьхьичI цала дус, Лакрал миллатрал виричу Гьаруннущал Темирхан Щурагь «Илчи» итабакьлай ивкIсса ттула шяравучув, чаннан куна кьянкьасса Ибрагьин-Халил дакIнин утлай, вай жула аьраб-аьжамрай дурккусса хъунмур никирал бивзсса гьанулия, мархрая хьусса дунияллий цIа дурксса аьлим­турал, усттартурая дакIнин багьаншиврул ва жула «Илчи» буккайсса лакрал.
Жул шярава ур 10 элмулул доктор, миннавату кIива хъамитайпа, ца МахIачкъалалий, цагу Испаниянаву. Ур кIия академик ца щалла дунияллийх цIа ларгсса Дандамаев МахIаммад А. СССР-данул премиялул лауреат, цагу аьпалу­хьхьун лавгсса Маммаев Загьиди академик отраслевой академии. Ия цалчин Да­гъусттаннай Лениннул цIанийсса премия ларсъсса атомщик Амаев Амир щалла дунияллун кIулсса аьлимчу. Та Тюменнай навт-газ лявкъусса Бижаев Муса Мусал арс. Мунал луттирдай ккалай бур студентътал. Ур 68 элмулул кандидат ттуршлийхъайсса хIурматрал цIанин лайкь хьусса. Азаллий мяйттуршунничIан бивсса бур ларайсса кIулшиву ларсъсса. ХхюцIалку шиннардил ахирданий ххюцIала инженер ия ГьунчIукьатIату, улу Дагъусттаннал хъуни миллатирттал миннал бачIиксса бакъахьунссия. Ми цивппагу арцух машан лавсъсса дипломру бусса бакъаяча, ми бия яла цIанихмий институтру Москавлив Ленинградрай, Новосибирскалий ва цаймигу шагьрурдай къуртал бувсса.
ГьунчIукьатIи бур 400-нния ливчусса педагогтал, 300 сельхоз институтру бувккусса агрономтал, ветврачтал, зоотехниктал, инженер-механиктал, экономистал, бухгалтертал.
ЦIанихсса ветврач Дандамаев Шамсулвара сельхозинститутрал директор , доктор наук. ХIажимирзаев ХIажимирза Нажмутиннул арс «Заслуженный ветврач», Лениннул ва «Знак Почета», орденнан лайкь хьусса. Зоотехник, хIурматрал цIа дусса Керимов Паша А. ВОВ.
Ур кIия герой Социалист бястлил. Хинчалов Гъази М – багъманчи., Джанаев Юрий Каримлул арс генерал майор Социал бястлил герой. Бур цIанихсса художниктал – Ходжаев Альберт ва Кардашов Арсен. БивкIссар ххаллилсса ва чIявусса къуллугъчитал ЦК-лий зий бивкIсса Феодаев Загьиди, ХIасанов ХIасан, заводирттал директортал, институтирттал директортал. БивкIссар чIявусса ххаллилсса усттартал. ЦIанагу буссар Мосгазрал хъунама гьунчIукьатIатусса ХIанхIажиев ХIасан,пенсионный фондрал хъунама ХIажимирзаев Азнаур Н., Кировский администрациялул хъунама Сагидов СалихI К., Алтайрай Дандамаев Хангиши, шагьрулул коммунальный хозяйствалул хъунама. Совет хIукумат хьувкун ва элмулул щаращул бакI дургьуну ивкIссар Дандамаев Аьбдулкьадир МахIаммадлул арс.
ГьунчIукьатIи кунма Лакрал миллатраву чIявусса буссар дурккусса, усттаршивруву лавай­сса шачIанттий бавцIусса шаэртал, чичулт, цала ватан дуруччай­сса вирттал. Муниятур чIивисса лакрал миллатрава яла чIявуми вирттал бувксса. Инсантурайн кьини дурксса чIумалгу лакрал цала думур дулайссар мукунминнан кумагран. Мунияту ттун хъунмасса пахру бур нава лаккучу унутIий. Нава яла талихI бума ухьунссияв оьрмулул ахттакьун бизлазийни ва «Илчи» кказитрайн тIайла авцIусса. На «Илчи» кказитрайн иман дирхьуну ура. Ванияр 15 шинал хьхьичI нава ва «Илчи» бувай­сса коллективравун кьамул увну, ттущава ттулла шяраваллил тарихрая цаппара затру буккултран аьч буван бювхъуну тIий. Ба­къассар ва «Илчи» кказит кунмасса цамур кказит, кIапIикIирттах ва кказит щаллу буллай журналистал зузисса, 25 шинай ва кказитрал каялувшиву дуллай хъунмасса захIмат бивхьусса Абачарахъал Качар кунмасса цайми кказитирттай. Муниятугу ттун хъунмасса пахру бур миннащал нава къахьурчангу, дан шаймур дуллай, ца къуш кунмасса, куннан кув бувчIайсса коллективраву зунсса хIалу шаврия.
Барча вил юбилей, абадсса «Илчий»!
Амин Аьбдуллаев