ХIурмат бусса «Илчи» кказитрал зузалт!
Лакрал райондалул жямат зущал ххарину, шадну кIицI лаглай бур «Илчилул» 25 шин шаврил юбилей! ТIайлану бикIанссар учирча — щалва лакрал миллатрал юбилей!
Хъунмур никиран хъинну дакIний буссар цуксса хъуннасса тIалавшин диркIссарив, цуксса захIмат бивхьуссарив жула миллатрал кказит «Илчи»итабакьлай байбишин. ХIакьину жущава дакI дарцIуну учин бюхълай бур — цийнма бихьлай бивкIсса ниятру, умудру «Илчилул» щаллуну бартбивгьунни, куну. Зул хIарачатрайну хIакьину буклай бур республикалул кказитирттаву ца яла ххуймунин ккалли хъанахъисса кказит.
ТалихI буну левххухьунссар «Илчилул» цалчинмур номер буккултрачIан, цанчирча муниха зий байбивхьуну тIий ва пишалул мяйжаннугусса усттар, хъунмур редактор Качар Абачараевна ХIусайнаевагу, редакциялул цинявппа зузалтгу, щархъай-шагьрурдайсса корреспондентъталгу. Шиная шинайн машгьур хъанай, магьир хъанай, «Илчи» хьунни лакрал гьарца къушлил дус, цихгу гьарца нюжмардий мякьну ялугьлагьисса. Ци-цигу аьрххи-ххуллурдайн буцару жува «Илчилул», кIул бару Лаккуйгу, Дагъусттаннайгу, щалла дунияллийгу хъанахъисса агьамсса иширттащал. Кказитрал тематика хъинну авадансса, жура-журасса дур: политика ва экономика, социальныйсса оьрмулул масъалартту, багьу-бизу, лакрал тарих ва тарихийсса ишру, лакку маз ххазинану ябаву, лакку аьдатру дуруччаву, лак цачIун баву. Кказитрал тIайланмасса буржну ккаклай бур лакку маз лахьхьин ччиминнан кумаг баву, миллат зумунусса кIулши ххишала хьун даву. Ва хъинну чара бакъасса, хъуннасса мяъна дусса давур зу дуллалисса.
Лакрал тарих ва тарихийсса ишру, цIанихсса инсантал, аьдатру – вай ва цайми-цаймигу темарду ишла дуллай буру зу жагьилсса, ялун нанисса ник тарбия дан кумаг буллай. Яргнува чIалачIи бунни му «Илчилул» Аьрасат Хъуннасса Ххувшаву ларсун 70 шин кIицI лаглагисса шинаву.
Дагъусттанналгу, Аьрасатналгу дазурду диртун, «Илчи» биллай бур цайми-цайми билаятирттайнгу. Ва бакъарив зу бихьлахьисса захIматран лавайсса кьимат! Барчаллагь!
«Илчигу», зугу буссаксса, дунияллийх кIама бивщусса лакран мяйжаннугу цивппа ца миллатну, ца кулпатну асар хъанай бушиврий дакI дарцIуну зузияра. ТалихI ва тIайлабацIу чIа тIий ура «Илчилунгу», жунма цинявннангу Лакрал райондалул жяматрал цIания.
Юсуп МахIаммадов,
Лакрал райондалул хъунама
ХIурмат бусса «Илчи» кказитрал зузалт!
Хасну ттула чулуха ва щалагу Ккуллал райондалул жяматрал чулуха дакIнийхтуну барча буллай ура «Илчилул» зузалт кказит цIунил дунияллийн бувккун 25 шин шаврил юбилейращал.
«Илчи» кказитрал дуллалисса даврил агьамшиву цукунчIавсса цинцилттай дирхьуну кIул дан шайсса дакъассар. Гьай-гьай, жула миллатрал интеллигенциялул захIмат бувссар, Дагъусттаннал вайми миллатирттал кунма, жулагу лакку мазрай буккайсса кказит бикIан багьлай бушиву хIукуматрал хъуниминная тIалав буллай. Кказитрал дайдихьугу тIайлабацIулийсса хьуссар. Ккуллал райондалул жяматрал гьарца ужагърай хIурматрай кьамул бувайссар «Илчи».
Яраппий, зу дуллалисса давурттив бакIуйн дуккаваннав. Барча цал ттигу жулла юбилей!
Саэд Сулайманов,
Ккуллал райондалул муниципал сакиншиннарал бакIчи
ХIурмат бусса «Илчи» кказитрал зузалт!
ЦIуссалакрал райондалул агьалинал цIанияту на дакIнихтуну барча буллай ура зу кказитрал юбилейращал.
25 шинал лажиндарай жула мазгу, культурагу, багьу-бизугу ябаву мурадрай, миллат лагма лаган баврил цIаний, Лакку билаят уттава буккан баврил цIаний зу бивхьусса захIматран багьа бищун къашайссар.
Агьалинал багьу-бизулул, маэшатрал ва мяърипатрал, бивкIу-буккулул, иман-исламрал масъалартту гьаз буллалисса, щалагу дунияллийх ппив хьусса, гьунар бусса, итххявхсса миллатрал вакилтурая бусласисса «Илчи» кказит лакрал энциклопедиялун ккалли бан бучIиссар. «Илчи» кказитрал гьаз дунни лакку мазрал сий, ккаккан бунни мунил пасихIшиву, нахIушиву. Бивхьунни дунияллийх кIама бивщусса лакрал дянив дусшиврул ламурду. Лак бавтIсса кIанай «Илчи» кказитрая ихтилат къабагьну къабикIай. Кказит буклай бур, тIалавну бур, ххирану бур. Буттахъал минарду кьаритансса бувксса ЦIуссалакрал агьулданун буттал буттахъая шихунмай нанисса Лакрал тарих, миллатрал оьрмулувусса личIи-личIисса заманалул кьинирду аьч дуллалисса лакку мазрайсса кказит ляличIинува бусравну бур. «Илчи» бухлай бур гьарица ужагъравун цIу-цIусса хавардащал, нахIу-хIалимшиврущал.
Миллатрал ххазинану хьусса «Илчи» кказитрал миллатрал тарихраву яргсса лажин чирчуссар. На чIа тIий ура миллатран хайрсса, уздансса давриха зузисса «Илчи» кказитрал коллективран ттиния тихунмайгу тIайлабацIусса илкинсса ххуллу.
Кказитрал даража хъиннува бюхттул хьуннав, кказит ххирами чан къахьуннав. Жагьилминнавугу лякъиннав зу дуллалисса ххаллилсса даву гихуннайгу ларайсса даражалий дачин дансса бюхъугу, гъирагу бусса инсантал.
ХIажи Айдиев,
ЦIуссалакрал райондалул
администрациялул бакIчи
