«Молодежь Дагестана» кказитрал редакциялий Дагъусттаннал паччахIлугърал университетрал ректор Муртазяли Рабадановлущалсса пресс-конференция хьунни.

З. АьбдурахIманова
Ванал бувсунни цIана университетравун абитуриентътал кьамул буллалисса хъуннасса даврия ва аьмну университетрал оьрмулуву хъанахъисса ва ттинин хьусса дахханашивурттая.
Ректорнал мукунма бувсунни хIакьину республикалул кIулшивуртту дулаврил аралуву хъанахъисса цIушиннардия ва «цIуцIи кIанттурдаягу».
«Гьашинусса шин жул университетран 85 шин хъана­хъисса юбилейрал шинни. Вайксса шиннардил манзил бивтсса жул вузрал хъунмасса кIану бувгьуссар ттинин жулла респуб­ликалий кIулшивуртту дулавриву, элму ва цин лавхьхьу­сса интеллигенция хIасул бавриву. Университетрал тарихраву диркIссар захIматссагу, ххари-шадссагу чIунну. Ци чIунну диркIнугу, вузрал юбилей жу кIицI лаган умудрай буру лахъсса даражалий.
Университетрал агьаммур мурадгу жучIава дуклакисса студентътуран ххуйсса даражалул кIулшивуртту дулавур.
2008 шинал жучIа дурну диркIссар цукунсса, ци даражалул кIулшивуртту дуллай бурив ххал буллалисса, вузрал вивсса гьарта-гьарзасса анализ. Ххал дурссар материально-техникалул щаллушинна, профессортурал, преподавательтурал квалификация, вузрал информатизация, хъиривлаявурттал ва вивсса коррупциялул даража. Ми гьарзатрал хъирив лавну махъ байбивхьу­ссару «цIусса чIапIи» руртсса кунма зий. Му хъуннасса даву хIакьину дур щуркIал хъанай. Дуварду вузрал даврил оптимизация. ХIакьинусса кьини университет зий буссар пишакартал хIадур буллалисса арулва бутIуйх бавчIуну. Жувух хIала дакъассар так аьралуннацIун ва медициналуцIун дархIусса арарду», — бувсунни ванал.
Ректорнал кIицI лавгунни цал вузраву обществалуцIун дархIусса элмурдалмур бутIа чан бувшиву. КутIану учин, экономистал, юристал ва каялувчитал хIадур буллалисса факультетирттайн кьамул байсса студентътурал конкурс чIири дурну, вайми пишакаршивурттах къулагъас ххи дурну дур. Мукунма Муртазяли Рабадановлул кIицI лавгунни, Дагъус­ттаннал вузирдал абитуриентътал жула хIакьинусса школардал хIадур бувсса оьрчIру бушиву, КIулшиву дулаврил министерствалул ЕГЭ кьамул давриву цалва буллалисса хIарачатрая ци пахрурду булларчагу, цачIан хьхьарасса, кIулшивуртту чансса оьрчIру букIлакIишиву.
«На хъинну хъирив лавну кIул бував цайми регионная жул университетравун бувхсса оьрчIал цими процент буссарив. Мукунсса бур 1,5 %. Ми тих-ших ялапар хъанахъисса жула дагъусттанлувтурал оьрчIрур. Масалдаран, Воронежрал университетраву цайми регионнаясса оьрчIал 30-40 % дуклай бур. БувчIлай бур шикку политикалул, обществалул ишругу хIала-гьурттуну бушиву ва жулла республикалийн цайми кIанттурдаясса оьрчIру дуклан къабучIантIишиву, жулва ватанлувтуралми бакъа. Мунияту, жу хъуннасса къулагъасгу, хIарачатгу бувару жулва студентътал ва преподавательтал цайми регионнайсса вузирдавун ва элмийсса центрдайн цаппара хIаллайсса дуклан тIайла буккан, цайми кIанттурдайсса опыт лаласун. Масалдаран, ларгсса шинал жу жула арцул грантирдах магистратуралувусса ххюцIала студент тIайла увкссия билаят­рай хьхьичIунминнун ккаллийсса вузирдавун», — увкунни ректорнал.
Мукунма ванал бувсунни цал вузраву ччя-ччяни студентътурал дянив цIа-бакI къачирчусса, цума преподаватель арцу тIалав дуллай ур тIисса, ва цаймигу суаллу бусса цIуххаву дувайшиву.
Студентътурал дянив бу­с­равсса, яла чIявусса, лахъсса баллу лавсма преподавательгу къулагъасралун ласайшиву деканатрал ва ректоратрал. Мукунна вузраву зий дусса дур «Деканат» тIисса система. ВанийхчIин студентътурал нитти-буттаща интернетравухчIин ххал бан бюхъайсса бур цалва оьрчI-душнил кьиматру, ми дуклаки­сса даража.