Гьар кIанай кунма, Дагъусттаннайгу чIявусса хъанай бур оьрчIал вяйлиявуртту сававну цIу ларчIсса ишру. Хъуннасса нигьачIаву дур ми иширттаву цивппа оьрчIругу оьрмулуцIа хьунсса.
Цинявппа мюрщи оьрчIан цIу лахълан гъира бикIай, лархъсса цIарая, бивчусса кьувтIилия оьрчIал ххишаласса хIаз ласай. Лархъсса цIарая цуксса нигьачIаву дуссарив, гьай-гьай, мюрщисса оьрчIан кIулну бакъар. Шанна шиная ххюра шинавун бияннинсса оьрмулувусса оьрчIан цала тIуркIурдаву хъуниминнаха лавхьхьуну занакьулу бикIлан ччан бикIайссар. Ми хъуниминнаха лахьлай зун бикIайссар цивппалу ливчIсса чIумалгу.
Хъуниминнан кIулну бикIан аьркинссар мюрщисса оьрчIру шаппа цивппалу ливчIсса чIумал, ми спичкардащал тIуркIу тIун бюхъайшиву, та-бунугу цанма вацIлуву ккавксса къавтIи шаппа бичлан бюхъайшиву.
Нитти-буттан цал-цал оьрчIру ургала акъа цивппалу кьабитан багьай.
Хъуннасса нигьачIаву дуссар оьрчIру нузру ларкьуну кьабитарча. Балики цIу ларчIсса иш хьурча, миннаща буккан къахьунтIиссар.
ЧIявуну оьрчIал вяйлияву къавкъиншиврийн кIурадаяй.
Цанма хIаз бан, ми бачай къатрал магъая ягу балконная лархъсса «самолетру» итадакьлай, цIу щуну пучрал ящикру ягу къатрал нузру ччучлай, подъездирттавун лавхъсса «дымовой шашкарду» бичлай. ОьрчIан кIулну бакъар цалва тIуркIурдая хъунисса баларду биян бюхъайшиву.
Вай укунсса ишру шавриву хьхьичIва-хьхьичI багьана оьрчIру ургала акъа, цивппалу кьабивтсса, минная спичкарду къадуркьсса, оьрчIал ялув личIлулну къабацIлацIисса, мюрщисса оьрчIайн лавхъсса пачлих бурган тапшур буллалисса нитти-буттай ва хъуними уссу-ссурваврайри.
ОьрчIал вяйлияву сававну цIу ларчIсса ишру къахьуншиврул, оьрчIан лахьхьин бан аьркинссар цIу къалачIунну занакьулу бикIан, хъуними цивппа оьрчIан эбратну хьун аьркинссар. Спичкарду оьрчIал ка дияйний дитан къабучIиссар. КъабучIиссар оьрчIайн пач, газ ягу электроприборду лахъан тапшур дан.
Ялув бавцIуну бикIан аьркинссар оьрчIал къавтIи къабичин. ОьрчIру цIаращалсса тIуркIурдахух къагьан, ми бялахъан бансса цамур чаран лякъияра.
Ци оьрмулувусса бухьурчагу, оьрчIан лахьхьин бувну бикIан аьркинссар цIу ларчIсса, пуркIу нанисса, ччуччиндарал кьанкь дусса чIумал мугьлат бакъа къатлува буккан аьркиншиву.
КIулну бикIан аьркинссар цIу ларчIшиву хъуниминнахь бусан ягу 01 телефондалийн цIу лещан дайсса службалийн оьвчин.
ОьрчIан къадагъа дихьлахьимуниха зун ххишаласса гъира бикIайссар. Мунияту, хъуниминнан укун-тукун зун къабучIиссар къатIий, дакIний личIансса куццуй бувчIин бан аьркинссар оьрчIан спичкардащалсса, зажигалкардащалсса тIуркIурдая цуксса нигьачIаву дуссарив. Хъуними эбратну бикIан аьркинссар оьрчIан цIарая мюхчан шавриву. Жула оьрчIахасса хъуннасса аякьалийнур жущава ми цIарая мюхчан бан хьунтIисса, жула къатта-къушгу, хъусгу дуруччин хьунтIисса.
МЧС-рал агьаммур
управлениялул ялув бацIаврил ва профилактикалул 1-мур отдел
ХIадур бувссар
А. Аьбдуллаевал
