Дагъусттаннай июльданул 26-нний кIицI лагантIиссар байраннаву ца яла агьамсса паччахIлугърал байран – Дагъусттан Республикалул Конституциялул Кьини. 2003 шинал июльданул 10-нний ДР-лул Конституциялул Мажлисрал кьамул бувссар Дагъусттаннал Конституция. Му ишираягу халкьуннан баян бувссар июльданул 26-нний.
З. АьбдурахIманова
Республикалул байрандалул хьунийн МахIачкъалаллал администрациялул дувантIиссар шагьрулул кIичIирттаву ва паркирдаву шадлугърал батIавуртту, концертру, миллатирттал майданну. Шагьрулул хьхьирицIсса паркраву ва къундалий хьунтIиссар спортрал щинал тIуркIурдал фестиваль. Шикку дикIантIиссар рафтинг, парусрал спорт, кайтсерфинг, виндсерфинг, къундалийсса волейбол, къундалийсса футбол, гирярду гьаз даву ва ссукIа личаву. Фестиваль дайдишинтIиссар ахттакьун чIумал, ссят 18. 00 хьуну махъ.
Июльданул 25-нний шагьрулул № 9 библиотекалуву «Свети, моя республика» тIисса информациялул кьини хьунтIиссар. Мура кьини МахIачкъалаллал №8 ЦБС-рай хьунтIиссар «Основной закон нашей республики» тIисса шадлугъ.
Июльданул 27-нний шагьрулул Центральный библиотекалуву ссят 12-нний «Конституция Дагестана – символ единства Дагестана» цIанилусса информациялул кьини дувантIиссар. Хъиривмур кьини, июльданул 28-нний, №14 ЦБС-рал филиалдануву «Государственные символы Дагестана» цIанилусса кIулшивуртту ласаврил ссят дувантIиссар.
Июньдалул 25-нния 27-ннийн МахIачкъалаллал Культуралул ва досуграл центрданул Шамхал-Терменнайсса, Шамхаллайсса, ЦIусса Хушетрайсса, Таркилийсса, Богатыревкалийсса культуралул къатраву хьунтIиссар «Конституция РД – основной закон для дагестанцев» цIанилусса «ккуркки стол».
