«Ттул дакIнил ва чур­ххал мархри Лаккуйри бусса. КIай кьукьирча, на бяйкьу­сса кьурукьра, ссавния багьсса цIукура».
Гь. Саэдов «Къалайчитал»

Революционер, драматург, шаэр, публицист, редактор, Дивир-Саэдлул арс Гьарун ув­ссар 1894 шинал май зурул 8-нний Гъази-Гъумучиял округрай­сса Ваччиял шяраву, паччахIнал канцелярданул чиновникнал кулпатраву.
1902 шинал Гъази-Гъумук кIива классгу къуртал бувну, увхссар Щурагьиял реальный училищалувун. Му къуртал бувну махъ, 1912 шинал дуклай ивкIссар хIаписартал шайсса юнкертурал школалий.
1915 шинал увхссар Москавуллал Коммерциялул институтравун. Миву дуклай унува, увхссар большевиктурал партиялувун.
1917 шинал, Дагъусттаннайн увкIун, Щурагь Гьаруннул тIивтIуссар «Дагъусттаннал просветительно-агитационное бюро».
Мура шинал мунал итабакьлан ивкIссар лакку мазрайсса «Илчи» кказит.
1914 шинал Гьаруннул чивчу­ссар Дагъусттаннай цалчинсса драма «Къалайчитал».
1919 шинал, август зурул ацIния шамулку кьини, ЦIахъардал Къуманиву Деникиннул аьскарнал аьщун ивзссар Гьарун.