Июльданул 19-нний «Дагестан» РИА-лий ДР-лул БувчIавурттал комиссиялул председатель МахIаммад Дибировлущалсса пресс-конференция хьунни.

З.АьбдурахIманова
Шикку ванал кIицI лавгунни гьашину сентябрьданул 18-нний Аьрасатнал Госдумалувун ва ДР-лул Халкьуннал Мажлисравун депутатътал бувчIлачIисса хIала-ккаласса бувчIавуртту хьун­тIишиву.

«2003 шиная шиннай ттинин цукунчIавсса дахханашивуртту къархьуну диркIсса Госдумалувун депутатътал бувчIлачIисса бувчIавуртту хьунтIиссар хIала-ккаласса бувчIавурттал журалий. Госдумалувун увчIин­тIисса 225 депутатнал 50% бикIантIиссар партиярдал сияхIирттавуминнал ва гайми 50 % тIурча – бувчIавурттал округрайсса ца мандатрайсса. Жулла республикалий сакин дурну дуссар ца мандатрай­сса шанна бувчIавурттал округ: ух­ссавнийсса, дянивсса ва кьиблалийсса.
Республикалул Халкьуннал Мажлисравун жува увчIин­тIиссар 90 депутат. БувчIавуртту нантIиссар пропорциональный­сса журалий. БувчIавурттайн хIадур хъанахъисса давриву гьурттуну буссар Республикалул бувчIавурттал комиссия, 54 территориал бувчIавурттал коми­ссияртту ва 1917 участокирдай­сса бувчIавурттал комиссияр­тту. Аьмну Дагъусттаннай чIурду булун ихтияр дуссар 1 миллион 650 азараксса инсаннахь», — бувсунни ванал.
М. Дибировлул бусаврийну, ялун нанисса бувчIавуртту цила низамрай, кьаралданий гьаншиврул, Республикалул БакIчинал гьашину мартрай сакин бувну бур бувчIавурттайнсса хIадуршиннарал ялув бавцIусса ва бувчIавурттал комиссиярттан кабакьу буллалисса Республикалул штаб.
«ХIакьинусса июльданул 19-сса кьининийн ца мандатрал округрай хьунтIисса бувчIавурттавух гьуртту хьун 32 кандидатнал аьрза чивчуну бур. Июльданул 23-ннин политикалул партиярттал чулуха цIарду рирщусса кандитатътурал бувчIавурттал комиссияр­ттайн цала чагъарду биян бан аьркинссар. Шиккува буслай ура вай округирттая ялагу най ушиву цала хушрай бувчIавурттаву гьуртту хьун ихтияр дусса 20 кандидатгу.
Республикалул парламентравун цIарду дуллуссар 16 политикалул партиялул чулуха­сса вакилнал. Жугу жула чулуха миннал хIакъиравусса цIухху-бусурду буллалисса чагъарду тIайла буккарду личIи-личIисса къуллугъирттайн, идарарттайн. Августрал 3-ннийн, политикалул партиярттал бувчIавурттавух гьуртту хьун ихтияр дуллалисса сияхIрайн ласуншиврул, чагъарду буллуну, щаллу хьун аьркин­ссар. Яла жул хъиривлаявурттая махъ кIул хьунтIиссар цума кандидатнахь бувчIавурттаву гьуртту хьунсса ихтияр дуссарив ягу дакъассарив», — бувсунни ванал.
Муниципал округирттай хьунтIисса бувчIавурттая буслай, М. Дибировлул кIицI лавгунни, республикалий 83 муниципал кампания нантIишиву, хаснура ми гьарзасса дикIан тIиссар Дарбантуллал, УнцIукIуллал ва Ахъушиял районнай. Микку бувчIлантIиссар шяраваллал депутатъталгу.
Журналистътурал чулухасса цаппара суаллан жавабру дуллай, М. Дибировлул кIицI лавгунни 5-6 шинал хьхьичI жула билаятрай диркIшиву дурарагу 7 политикалул партия. ЦIана тIурча дусса дур 75 партия. Дагъусттаннай, хIакьину 66 партия духьурчагу, цаппара шиннардил хьхьичI диркIун дур 75 партия.
«Аьрасатнал гьарцагу региондалийсса ми партиярттал хIарачат бур цалла даву низамрай дуллан, цала чулухунмай халкь кIункIу буллан. Мукунсса тагьар душиврия зарал бакъассар, цанчирча цуксса чIявусса гьурттучитал бурив бувчIавурттаву, миксса халкьгу гьурттуну, унгу-унгуну хIала буххантIиссар бувчIавурттавух», — ххи бунни ванал.
МахIаммад Дибировлул мукунма бувсунни августрал 20-ннин СМИ-лул цуппа ца кказит-журналданухь, телевидениялухь дакъашиву цуя ца кандидатнал агитация дуллансса ихтияр. БувчIавуртту хьунтIишивриясса, аьмну миннуйн багьайсса информация булунсса ихтияр цIанара дусса дур, агитация дуллансса – так, ялув кIицI лавгсса куццуй, августрал 20-нния гихунмай.