Июнь зурул 29-нний Дагъус­ттаннал ФСИН-лул Управлениялий хьунни Дагъусттаннал уголовно-исполнительная система (УИС) сакин хьуну 96 шин шаврин хас дурсса, шадлугърал мероприятияртту.

Бусравсса хъамал ва Дагъус­ттаннал УИС-рал зузалт байрандалущалгу барча бувну, системалул тарихрая ва хIакьинусса къайгъурдая бусласисса ихтилат бунни ДР-лул ФСИН-лул хъунама Муслим Даххаевлул.
Цала ихтилатраву ванал кIицI лавгунни Дагъусттаннал пенитенциар системалул тарих республикалул ва билаятрал тарихрацIун бавхIусса бушиву.
— УИС-рал къуллугъ ихтиярду дуруччай органнаву ца яла захIматмур къуллугъран ккаллину бур. Дагъусттаннал УФСИН-лул зузалт хьхьичIми никирттая нанисса аьдатругу кьадрулий дурур­ччуну, дакI марцIну бартбигьлай бур цала бигьа бакъасса къуллугъ. Жул зузалт хъуннасса хъар лахълай буссар республикалий низам ва паракьатшиву дуруччаву мурад­рай. ДакIнихтуну барчаллагь тIий ура цала къуллугърал бурж дакI марцIну биттур буллалисса циняв­ппагу зузалтрахь, — увкунни Муслим Даххаевлул.
ДР-лул ХIукуматрал председательнал хъиривчу Рамазан ЖахIпаровлул УИС-рал зузалт цала чулухагу барча бувну, ДР-лул БакIчи Рамазан АьбдуллатIиповлул цIаниясса телеграммагу дурккунни.
— ХIурмат бусса Муслим МахIаммадович!
Барча буллай ура инагу, циняв­ппагу УФСИН-лул зузалт ва ветеранталгу ДР-лул УИС-рал къуллугъ сакин хьуну 96 шин хъанахъисса байрандалущал.
Республикалий низамгу, агьалинал мюхчаншивугу дузал даву мурадрай зу багьа бищун къашайсса даву дуллай буссару.
ДР-лул ФСИН-лул управление хIакьинусса кьини ца яла хьхьичIунсса, ларайсса даражалул пишакартал зузисса федерал структуралун ккаллину дур. Дагъусттаннал ХIукуматрал республикалул УФСИН-лущал ххуйсса дахIаву ду­ссар. Жу ххариссару зу зула къуллугърал буржру лайкьну биттур буллай тIий. Жуятува хъар хъанахъи­сса зул масъалартту щаллу буллан жу мудангу хIадурссару, — тIий чивчуну бур Дагъусттаннал БакIчинал телеграммалуву.
Хъирив Дагъусттаннал УИС-рал зузалт барча буллалисса ихтилат­ру бунни МахIачкъала шагьрулул БакIчи Муса Мусаевлул, Аьрасатнал правовой академиялул Ухссавнил Ккавкказуллал филиалданул директор Багавдин МахIаммадовлул, жяматийсса ва ветерантурал организациярдал вакилтурал.
— КьюлтIсса зат бакъар – зул къуллугъ дигьалагру дакъасса, хъунмасса гуж багьлагьисса, жаваблув­сса, къучагъшиву ва ссавур аьркин­сса къуллугъ бур.
Зу бихьлахьисса захIматрал яла лаваймур кьиматгу хъанай бур тIайлабавцIуминнал ва миннал гъан-маччанал дакIнихтунусса барчаллагь.
ХIурмат бусса Муслим Ма­хIаммадович! ЧIа тIий буру вингу, вил зузалтрангу уттиния тихуннайгу му бигьа бакъасса къуллугъ бачин бансса цIуллушиву, кьудрат, тIайлабацIу, — увкунни Багавдин МахIаммадовлул.
Ихтилатру къуртал хьуну махъ Управлениялул зузалтран ва СМИ-дал вакилтуран ДР-лул ХIукуматрал, МахIачкъалаллал администрациялул, Аьрасатнал ФСИН-лул ва Дагъусттаннал УФСИН-лул чулуха дуллунни ХIурматрал Грамотартту ва барчаллагьрал чагъарду.
Дагъусттаннал ФСИН-лул управлениялущал хIала-гьурттуну, миннал дуллалисса давурттив аьч дуллай тIий генерал-майор Муслим Даххаевлул ХIурматрал Грамотар­тту дуллунни «Дагестанская жизнь» кказитрал хъунама редактор Асан Кабардиевлун, «Дагестан» РГВК-лул монжатрал режиссер Карина Мухтарован ва «Дагестан» РГВК-лул оператор Сергей Климуклун. Шадлугърал мажлис къуртал хьунни къуллугърал бурж биттур буллай жанну дуллусса УИС-рал зузалтрал гьайкалданучIа тIутIив дишаврийну.
ДР-лул УФСИН-лул
пресс-служба
ХIадур бувссар А.Аьбдуллаевал