АьФ-лул Президентнал СКФО-райсса вакил Сергей Меликовлул ва ДР-лул ХIукуматрал Председатель Аьбдуссамад ХIамидовлул июньдалул 28-нний видеоконференциялул низамрай кьамул бунни билаятрал Президентнал халкь кьамул бай къатлувун заявленияртту буллуми.
Цалчин ххал бивгьунни Кочубейллал шяраватусса Веринока Ивановал заявление. Ганил заявление бия 8 азараксса инсан усса шяраву буллай бачIину ливчIсса спортзал бувну чулийн буккан бан аьркиншиврул хIакъираву . Тикку бан аьркинну бур мукунма футболданул ва волейболданул майданну лечайсса ххуллу ва спортплощадка. Спортзал буллай байбивхьуну бур 2015 шинал, уттигу гава байбихьулул даражалий лирчIун дур давуртту.
Аьбдуссалам ХIамидовлул бувсъсса куццуй, гьашину сентябрьданийннин спортзал бувну чулийн буккан бантIиссар.
Сергей Меликовлул бакIрайн лавсунни, ссуттил Дагъусттаннайн увкIсса чIумал Кочубейлив спортрал сооружение бувну бушиву ххал бан.
Яла ххал бивгьунни Хасавюртуллал райондалийсса Сивух шяраватусса Мадина Идрисовал заявление. Ганил масъала бия шяравун цIусса щинаххуллу буллалисса давуртту къуртал дансса арцу итадакьаврил хIакъираву . Ганил мукъурттийн бувну 70% давурттал щаллу дурну дур, 2015 шинал давуртту дацIан дурну диркIссар, арцу дакъа тIий. Утти лирчIми давуртту къуртал дан аьркинни.
Аьбдуссамад ХIамидовлул бувсъсса куццуй, цIанасса ппурттуву шяравун щин дачин даншиврул аьркинни щинаххуллул 6 километра щаллу дуван. Гара шяраву буван аьркинссар 2 пожардал резервуар. Ганал мукъурттийн бувну, резервуарду ялунчIил дузал банссар, амма щинаххуллу гьашинува щаллу бувну, шяравун щин дачин дантIиссар.
Сергей Меликовлул бувсъсса куццуй, мукунсса масъалартту цаймигу регионнай хIасул хъанай бур. Ганал чагъар чивчуну бур ДР-лул БакIчинайн мукунма цалвагу бакIрайн лавсун бур подрядчикнащал давуртту щаллу даврил буржлувшиву кIидачIин.
ХIадур бувссар
ХI. Аьдиловлул
