Уттигъанну, июньдалул 23-нний, Уфа шагьрулий хьусса АьФ-лул ПрезидентначIасса культуралул Координациялул советрал заседаниялий Дагъусттан Республикалул Культуралул министерствалул даврин лавайсса кьимат бивщунни – Министерствалун буллунни II даражалул диплом.

Бадрижамал Аьлиева
ДР-лул Культуралул министерствалул хьхьичIунсса кIану бувгьунни щалвагу Аьрасатнал «Лучшая практика деятельности органов исполнительной государственной власти субъектов Российской Федерации в сфере культуры» конкурсрай, «Лидер среди регионов со средней и умеренной сбалансированностью консолидированного бюджета» номинациялуву. Му конкурс сакин дурну дур Аьрасатнал Федерациялул Культуралул министерствалул.
Мяйжаннугу, махъсса шиннардий республикалул культуралуву хьунни чIярусса дахханашивуртту, зун бивкIунни культуралул цIусса идарартту, музейртду хьуннав, цайми-цайми хьуннав. Дуллай бур хъинну чIярусса культуралул мероприятияр­тту, цалгу республикалул имидж ххуй чулиннай даххана дуллалисса. Лахъа-хъунну кIицI ларгунни Дарбантуллал 2 000 шинал юбилей ва цаймигу хъуни­сса ишру.
Жулла республикалул Культуралул министерство итталун дагьну, мунил буллали­сса захIматран кьимат бищавугу гьарцагу дагъусттанчунан тIааьнсса ишри.