Аьрасатнал элмулул ва кIулшиву дулаврил министерствалул Дагъусттаннал вузирдал выпускниктал давурттал цукун дузал хъанай буссарив ххал бигьлагьисса мониторинг дурну дур. Мунил хIасиллайн бувну, вузру къуртал бувсса 3944 выпускник хъанай ухьурча, давурттал дузал хьусса хъанай бур 38 %, яни 1493 инсан.
Ми хъанахъиссар 2014 шинал выпускниктал, 2015 шинал давурттай бавцIусса. Тай выпускниктурава предпринимательтал хьуну бусса бур 81 инсан.

П. Рамазанова
Мукунма мониторинграл чIалачIи бувну бур аьмну Аьрасатнаву выпускниктал давурттал щаллу баврил тагьар цукунсса дуссаривгу. Билаятрал ца миллион ва 172 азара выпускник ласурча, миннавату даву дусса хъанай бур 75%. Цалчинсса шинал дянивну миннал харжгу хъанай бур 30 азарда къуруш. Мониторинграл хIасиллайн бувну, яла давурттал щаллу хьуми бур инженертал ва медициналул зузалт. Ми 80-90% хъанай бур. Ядерная энергетика, теплоэнергетика, технологияртту, химиялул технологияртту, сестринское дело дур миккугу хьхьичIунну. Лащинсса дур экономистал ва юристал давурттал щаллу баву. 40 % юристурал ва 20% экономистурал личIлай бур вузру къуртал бувсса шиннардий давурттив дакъа. Выпускниктурал харжру хIисавравун лавсун, яла лахъмур харж бур аэронавигациялул, авиациялул ва ракетардал – космосрал техникалул касмурду язи дургьуминнан. Ми зуруй дянивну 74 азарда къуруш ласлай бур, ядерная техника ва технологияртту язи дургьуми – 48 азарда къуруш, навтлил, газрал, геологиялул сферардаву зузими 47 азарда къуруш ласлай бур, электроникалул, связьрал системалуву зузими – 47 азарда къуруш. Ва ахиргу, физикалул ва астрономиялул ларайсса кIулшивуртту ларсми дянивну 43 азарда къуруш ласлай бур.