Жулла республикалий оьр­чIал садикру цуксса бувцIуну буссарив, миккун оьрчIру гьан булланнин нитти-буттан цуксса хIаллай бацIан багьайссарив ва цуксса захIмат буван багьайссарив цалгу, кIилвагу СМИ-рдайгу чивчусса, ихтилатругу хьусса тема дакъар.

Му масъала оьни­вату личин бувансса ххуллу-чаранну ляхълайнма бур. Утти­гъанну Дагъусттаннал Минэкономразвитиялул баян був­сса куццуй, оьрчIру школалийн гьаннинсса идарарттавусса иржарду чан буваншиврул, махъсса 3 шинал мутталий итадаркьуну дур 4 миллиардрая ливчусса арцул. Миннувату федерал бюджетравату итадаркьуну дур 3 миллиард ва 150 миллион арцул, республикалулмур бюджетрава – 900 миллион.
Ва министерствалуву бувсъсса куццуй, 2013 шинал республикалий бивкIун бур 697 детсад (65 азаллий 625 оьрчI). Ва шинал дайдихьулийсса ккаккияр­ттайн бувну, оьрчIал садикир­ттал ккал лархъун дур 771-ннийн (92 азаллий 254 оьрчI). Ва шинал лахъишиврий уттигу 12 детсад тIитIинсса хавар бур.
Мукун, республикалий махъсса 3 шинай ххи хьуну бур 26 азарва кIану, миннувату 6 азаллий 190 – школалийн гьаннинсса кIулшиву дулаврил региондалул системарттал модернизациялул проект иширайну щаллу баврил лагрулий. Ялагу 20 азарваксса кIану хьуну бур бухсса къатри бакьин баврийн, гьарта-гьарза баврийн бувнугу.
Уттинин ци чаранну ляхъларчагу, оьрчIал садикравун цалва яржа бияннин ялугьлай бур 22 азарунния ливчусса оьрчIру. Му кIану, министерствалул зузалт­рал бусаврийн бувну, бавхIуну бур республикалийсса демографиялул тагьардануцIун. Гьарца шинал республикалий ххи хъанай бур 5 азаруннийн бив­сса оьрчIру.