ДР-лул Культуралул министерствалий майрал 19-нний хьунни ва шинал цалчинсса кварталданий дурсса давурттал хIасиллу дуллалисса ва хьхьичI бавцIусса агьамсса масъалартту ххалбигьлагьисса батIаву. Мунивух гьуртту хьунни ДР-лул культуралул министр Зарема Буттаева, МахIачкъалаллал шагьрулул администрациялул бакIчинал хъиривчу Запир Алхасов, ДР-лул Жяматийсса палаталул член Жамила Дагьирова, республикалул культуралул идарарттал каялувчитал.
БатIаврил дайдихьулий Зарема Ажуевнал культуралул зузалтран дуллунни АьФ-лул ва ДР-лул паччахIлугърал наградартту.
Гихунмай республикалул шагьрурдал ва районнал Аьрасатнал халкьуннал аслийсса культуралул центрдал, личIи-личIисса управлениярттал начальниктурал бунни уттинин дурсса давурттал жаваб дуллалисса докладру, бувсунни давриву хьунадакьлакьисса захIматшивурттая.
Культуралул ирсирал объектру дуруччаврил управлениялул начальник Багьауттин ХIажиевлул бувсунни республикалий хIакьинусса кьини сияхIрайн ларсун душиву культуралул ирсирал федерал агьамшиву дусса 1958 объект ва региондалул агьамшиву дусса 4 514 объект. Бувсунни ва аралуву дуван аьркинсса давурттая ва хьунадакьлакьисса диялдакъашивурттая.
Ихтилатру ялагу бунни культуралул министрнал хъиривчу, РДНТ-лул директор Марита МухIадовал, ДР-лул Культуралул министерствалул отделданул начальник МахIаммад ХIажиевлул ва цайминнал.
Гьаз бувсса гьарцагу масъалалийн бувну, ахирданий кьамул бунни хасъсса хIукмурду.
