Майрал 20-нний, ахттаяр махъ, жулла республикалул хъуншагьрулий, Къумукьнал музыкалул ва драмалул театрдануву, тIиртIунни дунияллул халкьуннал даражалийсса фестиваль «Ва балай вилгу, ттулгур» («Это песня твоя и моя») тIисса. Мура кьини тIурча, фестиваль дайдишин хьхьичI, республикалул гьунар бусса оьрчIансса Мурад Къажлаевлул школалий кьамул бунни му фестивальданул хъамал ва сакиншинначитал.

Бадрижамал Аьлиева
ДакIнийн бутан, чIава балайчитурал фестиваль дуллалиссар Мурад Къажлаевлул искусствалул школалул, Дагъусттан Республикалул Культуралул министерствалул чIарав бацIаврийну.
Ва кьини школалийн бувкIсса хъамаллуравух бия ДР-лул культуралул министр Зарема Буттаева, Азирбижаннал халкьуннал артист, Азирбижаннал паччахIлугърал джаз-ансамбльданул каялувчи Рауф Бабаев, пианист, педагог, Ростов-на-Дону шагьрулиясса джазрал квартетрал каялувчи Арам Рустамянц, цIа дурксса скрипач Мурад Абуев, Аьш­ттарханнал паччахIлугърал консерваториялул профессор Людмила Круглова, СССР-данул халкьуннал артист, композитор Мурад Къажлаевлул дустал.
Ва кьини школалул тарбиячитурал хъамаллуран ккаккан дунни хъун дакъасса концерт. Хъамал кIул хьунни ми школалул багьу-бизулущал, хIалкьазиялущал, ххал бунни школалийсса музейрду, яхши-хаш бунни педагогтуращал ва тарбиячитуращал.
Ми цимурцаннуя махъ Зарема Буттаевал барчаллагь увкунни Мурад Къажлаевлухь ва школалул коллективрахь дакIнийхтуну цивппа кьамул баврихлу.
— Мурад Къажлаевлул школа хъанахъиссар музыкалул, ххуйшиврул ва хьул-умудрал чIалъаьну. Шикку оьрчIан бизлай бур базалул, инсаншиврул хазнардал гьану, дуллай бур оьрчIан эстетикалул, ххуйшиврул тарбия. Хъунмасса барчаллагь Мурад МахIаммадовичлун. ХIакьину ялагу хъуннасса байран дур – жува цинявнналагу цачIу «Ва балай вилгу, ттулгур» тIисса фестиваль тIитIлай буну тIийгу. Ва цIанилусса чIава балайчитурал фестиваль дуллалиссар шамилчин, Мурад МахIаммадовичлул ва ва школалул щалвагу коллективрал сипталийну. Хъунмасса барчаллагь фестивальданул хъамаллуран, жюрилул члентуран, хIалу ляркъуну, республикалийн бувкIун тIий. Хъунмасса барчаллагь оьрчIал нитти-буттан, школалул педагогтурал коллективран. ЧIа учин ччива ва фестивальданун лахъисса оьр­му, ванил гьурттучитал хъуни шаву дакIурдил хъинсса, цIуллу-сагъсса, лайкьсса инсанталну, — увкунни министрнал.