ДАНИЯЛЛУЛ АРС ТУМАЛАЕВ ХИЗРИ
Вай гьантрай аьпалул хьунни ххаллилсса зунтталчу, бусравсса хъуначу, захIматрал ветеран, ШавкIуллал шяравасса Тумалаев Хизри Данияллул арс.
Увну ур Хизри Лакрал райондалий ШавкIуллал шяраву Данияллул ва Аьйшал кулпатраву 1924-ку шинал. Байбихьулул школа ШавкIравва къуртал бувну, гихунай дуклан лавгун ур Гъумучиял дянивмур даражалул школалийн. ИвкIун ур школалул комсомол организациялул секретарьну. Арулва классгу бувккуну, увххун ур Гъумучиял педучилищалувун. Дяъви байбивхьусса 1941 шинал къуртал бувну бур училищалул 2-мур курс. Дуккавугу дялирчIун, душманнащал талан гьан ччисса жагьил къаувцуну ур, мушакъатсса нитти-буттах урганма акъану тIий. Амма Хизрил хъунмасса захIмат бивхьуссар захIматралмур аьралуннаву, шамийла лавгун ур захIматрал фронтрайн. Зий ивкIун ур Къумтуркъалалив душманнал танкардайн къаршисса каналлу дуклай, комсомол бригадалул бригадирну, Къаяккантлив балугъру бугьайсса кIанай, Аьшттарханнал областрайсса рыбокомбинатрай. Зана хьуну махъгу дяъвилийн хушрай гьан ччисса Хизри къаувцуну ур, школардай учительтал биял хъанай бакъану. Учительтурансса курсругу бувккуну, тIайла увккун ур зун Хъурхърал 7 шинал школалийн. Дяъвилул шиннардий зий ивкIун ур ТIулизуннал школалийгу, дяхтта дарсру дихьлай, мунил каялувчинал буржгу биттур буллай, хьхьувай – агьалинан буккин-чичин лахьхьин буллай. Заочнайну дуклай, къуртал дурну дур Гъумучиял педучилищалувусса дуккавугу. ЛичIи-личIисса шиннардий Хизри зий ивкIун ур Лакрал райОНО-рал инспекторну, лакрал шяраваллал школарттай учительну. Махъ зий ивкIун ур Ккуллал райондалул промкомбинатрай, Лакрал райпорал складрай. ЦIунилгу учительнал давричIан зана хьуну, зий ивкIссар Гьущиннал байбихьулул школданул каялувчину, КIувурдал 7 шинал школалий, Гъумучиял дянивмур даражалул школалий завучну ва захIматрал дарсирал учительну, байбихьулул классирттал учительну. Гъумучиял школалий Хизри дихьлай ивкIссар оьрчIахь машина бачин баврил дарсру. ХьхьичIва Буйнакскалий шупир шайсса курсру бувккусса Хизрин техникалул даву ххуйну кIулну дикIайва, цалвагу усттарну машина бачин байва.
Хизри зузисса кIанттурду чIявуя: ШавкIуллал «ЗахIматчи» колхозрал председательну, ШавкIуллал шяраваллил (мивун мукунна ТIулизуннал ва ГьувкIуллал шяраваллугу духлахисса) советрал председательну, Шахьуйннал колхозрал председательну, Лакрал райондалул ОКХ-лул хъунаману ва м.ц.. Пенсиялийн увккун махъгу зий ивкIссар шяраваллил жяматрайх пенсия бачIлай, пенсионный отделданул тавакъюрайн бувну. Чув зий ухьурчангу, дакIнийхтуну бувсса захIматрахлу, ккаккан дурсса хьхьичIуннайшивурттахлу Хизри лайкь хьуссар хIукуматрал чулухасса чIярусса бахшиширттан, медаллан, грамотарттан.
Ца ххаллилсса чувнайну, захIматчинайну мискин хьунни хъинну бусравсса хьхьичIарасса ник. Хизри ия кулпатран ххаллилсса лас, оьрчIан, оьрчIал оьрчIан хIакьсса ппу ва ттатта, тарбиячи, шяравуминнал, кIулминнал хIурматрайсса чув, лагма-ялттунащал хIал бавкьусса, иминсса инсан.
Хизрил бивкIулул кьурчIишиву кIидачIлай, дакIнийхтунусса жижара буллай буру ванал кулпатрахь, оьрчIахь, оьрчIал оьрчIахь, уссихь ва ссихь, миннал наслулухь, махъсса цинявппагу гъан-маччаминнахь. Ванал барачат махъ ливчIун лякъиннав, махъминнал оьрмурду лахъи баннав.
ШавкIуллал, Шахьуйннал жямат
———————————
МУСИЛ ДУШ АЬБДУЛЛАЕВА ПАТIИМАТ
Оьрмулул 87 шинаву, мартрал 10-нний аьпалул хьунни ххаллилсса зунттал хъамитайпа, инсаншиврул, яхI-къириятрал, намусрал бувччусса, ЧIятусса Мусил душ Аьбдуллаева ПатIимат.
ПатIимат бувну бур 1929-ку шинал ЧIяйннал шяраву. Буттал лажин къаккарксса ПатIиматлун чIивинийва чIявусса захIмат буллан багьну бур хъунмур ссищал Марияннущал (аьпа баннав цил), хаснува захIматсса дяъвилул шиннардий. КIия уссу Рамазан ва Маккашарип дяъвилия зана къавхьуну бур. ЧIяйннал дянивмур даражалул школагу къуртал бувну, ПатIимат дуклан бувххун бур Дагъусттаннал педагогикалул институтравун, мугу къуртал бувну, зун бувкIун бур буттал шяравун. Щар хьуну дяъвилул гьурттучи, учитель Аьбдуллаев Сулайманнун (аьпа биву),12-хъул шиннардий зий бивкIун бур учительницану Хъювхъиял шяраву. Пенсиялийн букканнин зий бивкIун бур ЧIяйннал дянивмур даражалул школалий. Цила ххирасса ласнащал хъунигу бувну, дуккингу бувну, щаллу бувну, къатрал хьуну бур 3 арс ва 3 душ.
Цикссагу буссар ПатIимат Мусиевнал дарс дирхьуну хъуни хьусса душру ва оьрчIру. Ва махъва-махъсса оьрмулул ххуллийн тIайла буккангу бувкIун бия хъинну чIявусса ванил учениктал, чIивима арсначIан АрсеннучIан ЧIяв. Миккун бучIан къавхьусса чIявусса бувкIунни МахIачкъалалий арсначIан АхIмадичIан, Къизлардай душварачIан.
ПатIимат бия дяъвилул ва захIматрал ветеран. Ванин дуллуну дур чIярусса медаллу, хIурматрал грамотартту ва бахшишру.
Ва бия хасиятрал иминсса, рахIатсса, гьарцаннащал хIал бавкьусса, хъинбала бан ччисса хъамитайпа – педагог.
Ци банссар, «ажалуннин мажал бакъассар» учай. ПатIимат кIулминнан хъунмасса хIаллай дакIний личIантIиссар ванил сипат. КуртIсса кьурчIишиву кIидачIлай, жижара буллай буру ванил арсурваврахь, душваврахь, куявтурахь, гъан-маччаминнахь, махъсса цинявннахьвагу. Махъ ливчIминнал оьрмурдив лахъи баннав, барачат бишиннав.
Гьав нурданул дуцIиннав. Алжаннул ххари баннав. Амин.
ЧIяйннал жямат
———————————
Руямиллул арс ХIажиев Давлатгерей
Мартрал 14-нний, оьрмулул 67 шинаву, дунияллия лавгунни ХIажиев Давлатгерей Руямиллул арс.
Давлатгерей увну ур 1949 шинал сентябрь зуруй ЦIуссачIурттащиял шяраву ЦIуссалакрал райондалий ХIажиев Руямиллул ва ХIажиева Аьбидатлул кулпатраву. ХIажиевхъал кулпат Каспийск шагьрулийн бивзун шикку ялапар хъанан бивкIун бур. Давлатгерейл къуртал бувну бур Каспийскаллал цалчинмур школа. 1967 шинал ва кьамул увну ур «Дагдизель» заводрайн 4-чинсса цехравун шлифовальщикну. КIира шинава увххун ур Каспийскаллал механический техникумравун. Техникумгу ххуйну къуртал бувну, лавгун ур Каспийскалийсса «Точной механики» заводрай зун. Цаппара хIаллава Давлатгерей 9-сса цехрал хъунама мастерну ивтун ур. Давлатгерейл цайнна дирхьусса вихшала лажин кIялану биттур дурну дур. Цува каялувшиву дуллалисса зузалтгу лагма лаган бувну, дуллусса даврил план ларайсса ккаккиярттай биттур дурну дур. Ванал цех хьхьичIунсса ххуттаву бивкIун бур заводрай. Давлатгерей лайкь хьуну ур мадарасса наградарттан ва ХIурматрал грамотарттан. Давлатгерей ия мяйжаннугу захIмат ххирасса, цащала зузиминначIа хIурмат бусса зунтталчу.
Давлатгерейл бивкIулул кьурчIишиву кIидачIлай, жижара буллай буру ванал кулпатрахь, душнихь, уссурссуннахь, гъан-маччаминнахь. Давлатгерейл бунагьирттал аьпа баннав. Алжаннул ххари аннав. Ванан бакъамур ванал оьрчIан, оьрчIал оьрчIан булуннав.
ЦIуссачIурттащиял жямат
