Хъунмасса Буттал КIанттул цIанийсса дяъвилул шиннардия шиннайра жулва билаятрай цIакь хьуну дур аьдат школалийсса интнил каникуллал гьантрай дуллан «ОьрчIал ва чIаважагьилтурал луттирал нюжмар». Му байрандалул гьану бивзун бур архсса 1943-ку шинал, оьрчIал чичу Лев Кассиллул сипталийну.

ОьрчIал чичултран пик­ри хьуну бур дяъвилул захIматсса чIумал щавурду дирминнах буруг­лай, цайми-цайми давурттив дуллай, оьрмулул хъуниминнан кумаг буллалисса Москавливсса дуклаки оьрчIан байран дуван. Луттирал нюжмардул цалчинсса кьини дурну дур Союзирттал Къатлул Колонный залдануву. Миккун оьрчIачIан хъамалу бувкIун бур оьрчIал чичулт Самуил Маршак, Корней Чуковский, Лев Кассиль. Муния шиннай, му хъинсса аьдат дачин дурну най, гьарца шинал тIайла дуккайссар жулва билаятрай ОьрчIал ва чIава жагьилтурал луттирал нюжмар. Жулла республикалийгу мукунна.
Луттирал нюжмардул давур­ттавух гьарца шинал хьхьичIунсса гьурттушинна дувай Н. Юсуповлул цIанийсса Республикалул оьрчIал библиотекалул коллективралгу. Ва ххуллухгу му Нюжмардул лагрулий Республикалул оьрчIал библиотекалуву хьунни чIярусса мероприятияртту, оьрчIал оьрмулул шинну хIисавравун ларсун, цаща-цащалла личIи-личIину. Гьашинусса шин билаятрай Кинорал шинну, жулла республикалий Зунттал шиннугу баян бувну бухьувкун, библиотекалул зузалтрал сакин дурну дия хъинну хъуннасса программа, ми ишругу хIисавравун лавсун. Мукунна «Нюжмардул» программалувун ларсун дия оьрчIан ххирасса чичултрал (Агния Бартол, Сергей Аксаковлул, Нураттин Юсуповлул, АхIмадхан Абубакардул, Аминат Аьбдулманаповал ва цайминнал) юбилейрдугу.
Мукун, ОьрчIансса луттирал нюжмардул лагрулий дурсса давур­ттавасса цану хьунни Нураттин Юсуповлул оьрмулун ва творчествалун хас дурсса «Наш любимый поэт» цIанилусса мероприятие. Мунивух гьуртту хьунни МахIачкъалаллал шагьрулул 38-мур ва 8-мур школар­ттал дуклаки оьрчIру. Ми бия 2-ми классирттал дуклаки оьрчIру, миннащал бувкIун бия классрал каялувчитал (8-мур школалиясса оьрчIал – Саида МахIаммадовна, 38-мур школалул оьрчIал – Раиса Сулаймановна), нину-ппу.
Шадлугъ дачин дурну бия Рес­публикалул оьрчIал библиотекалул мюрщиминнансса отделданул хъунмур НасихIат МахIаммадовна. Мунил бувсунни Нураттин Юсуповлун там хьун най диркIшиву 85 шин, му ххаллилсса шаэрнал цIа пахрулий ларсун най бушиву ва библиотекалул, оьрчIан ххирасса шаэр увшиву Лакрал райондалий лахъсса зунттаву дирхьусса КIулушацIрал шяраву. Школа къуртал бувну махъ Нураттин увххун ур пединститут­рал тарихрал факультетрайн, яла – Москавлив литературалул лавайми курсирдайн. Жагьилсса шаэр хьунаакьайсса ивкIун ур К. Чуковскийщал, В. Берестовлущал ва оьрчIал цаймигу чичултращал. Корней Чуковскийн ххира хьуну дур жагьилсса шаэрнал творчество ва мунал цалва хIурматгу лавайсса бивкIун бур билаятрайх ва мунил кьатIух цIа ларгсса чичучIа. Цалва внучкахь ду­ккиншиврул, Корней Ивановичлул лакку мазрая оьрус мазрайн таржума дан дурну дур шаэрнал «Хьхьи ва къалмул ккукку» тIисса назму.
Бувсунни Н. Юсуповлул назмурдайн бувну сакин дуршиву мультфильмру. Ккаккан дунни оьрчIан мукунсса мультфильм «Ув­сса кьини» — композитор Сергей Агъабабовлул музыкалухун­сса. Шагьрулул 38-мур школалул оьрчIал ккаккан бунни сценка «Нину ва арс» тIисса. Цинявппагу оьрчIал дурккунни шаэрнал назмурду. Ххал дунни «Куда спешишь, мальчишка?» цIанилусса видеоролик, шаэрнал цалва чIугу бусса. Шаэрнал творчествалия­сса, оьрмулиясса чIявусса ихтилатру хьунни ва кьини.
Ахирданий гьарцагу оьрчIан пишкашну хьунни журнал «Детский годекан».
Дагъусттаннал халкьуннал шаэр Нураттин Юсуповлул 85 шинал юбилейран хас дурсса даву хьунни Каспийскалий ЦБС-лул 1-мур филиалданувугу. Литературалул вечерданувух гьуртту хьунни шагьрулул 4-мур школалул дук­лаки оьрчIру.
1-мур филиалданул хъунмур Саида Хурияловал бувсунни шаэрнал оьрмулия ва творчествалия, чIурчIав дунни шаэрнал цалва чивчумунил хъунмур бутIа оьрчIан хас бувсса бушиврий.
— КьюлтIсса зат бакъар оьр­чIан­сса произведенияртту чичин хъуниминнанминияр захI­матшиву. Ва даву даншиврул мудангу оьрчIнува личIан аьркин­ссар, оьрчIал ранг-рангсса дуниял дурчIин аьркинссар, кIулну бикIан аьркинссар оьрчIан хIаз бизанмур. Нураттин Юсуповлул дакI тIиртIунна дикIайва цалва мюрщи­сса буккултран, — увкунни ванил.
Гихунмай Саида Ариповнал кIицI лавгунни шаэрнал назмурдаву бушиву оьрчIру багьай­сса куццуй тарбия бавриву агьам­сса кIану бугьлагьисса хъунма­сса гуж, Нураттин Юсуповлул назмурдаву юмор душиву образ тIитIавривусса, оьрчI тарбия авривусса цалчинсса кумагчину. КIицI лавгунни шаэр тачIаввагу нигьаувсун къаивкIшиву оьрчIащал хъинну захIматсса масъаларттая ихтилат буллан, ми пикри буллали буллай.
Дуклаки оьрчIал дурккунни шаэрнал назмурду, ккаккан бунни мунал чивчумунийн бувсса сценкарду. Ккарккунни 1959 шинал «Союзмультфильм» киностудиялул Нураттин Юсуповлул сценарийлийн бувну ларсъсса мультфильм «Ув­сса кьини».
Мукунна ва вечерданийннин хIадур дурну дия шаэрнал луттирдал выставкагу.