ЦIакьсса низамрай зунтIиссару

16_13Апрель зурул 27-нний Дагъусттаннал МВД-лул УОООП-рал хъунама, полициялул полковник Макашарип Макашарипов хьунаавкьунни республикалул журналистуращал. Хьунабакьаврил мурад бия интнил байраннал чIумал – 1-мур ва 9-мур майрал кьинирдай – жяматийсса низам дуруччин ва агьалинал мюхчаншиву дузал дан виваллил иширттал органну цукун хIадурну буссарив бусаву.

Мунил хIакъиравусса ихтилат байбишин хьхьичI Макашарип Макашариповлул бувсунни цалла каялувшиву дуллалисса управление (УОООП) МВД-лул управлениярттаву ца яла хъуннамур душиву, хIакьинусса кьини шикку 8 азаруннийн бивсса инсантал зий бушиву. Хъирив ванал бувсунни байранну дайдишиннинсса хIадуршиннарая. ЗахIматсса тагьар хIисавравун ларсун, Виваллил иширттал министерствалул чаран ляхълай бур майрал байраннал гьантрай спортрал тIуркIурду, дялахърурду нанисса, чIявусса халкь бавтIсса кIанттурдай агьалинал мюхчаншиву дузал дан. Апрель зурул 30-нния байбивхьуну цинявппагу виваллил иширттал органнал зузалт къуллугъ буллантIиссар кьянкьасса низамрай. Гьарица шадлугъру, мажлисру нанисса кIанттурдай цIакь антIиссар ца-ца къуллугъчи. Байраннал кьини кIилий ххишала бантIиссар къуллугъ буллалисса нарядру.
Ми гьантрай къуллугъ буллантIисса зузалтращал ихтилат бантIиссар хьун бюхъай­сса нигьачIаву дусса иширттал, терактирдал ва цаймигу тахсиркаршивурттал хIакъираву. Миннахьхьун дулунтIиссар органну луглагисса инсантурал – къачагътурал кьюкьравуминнал, экстремистурал организациярдал бакIчитурал ва члентурал суратру (фотороботру).
ПIякь учин дайсса затру, ярагъ, загьру бу­сса химиялул затру ларсун наними кIул баву мурадрай, гьарица шадлугъру нанисса объектрай дишинтIиссар диялсса металлодетекторду. Миннул кумаграйхчIин полициялул зузалтрал личIлулну ххал буллантIиссар инсантал. Байрандалул хьхьичI кьини дялахърурду, мажлисру бикIантIисса кIанттурду, пIякь учайсса затру дирхьуну духьурча, ми кIул дан ххал буллантIиссар кьанкь ласай ккаччащал.
ОМОН-далул ва республикалийсса аьрали частирдал подразделениярттава кIункIу бантIиссар ярагъ ва цаймигу пIякь учай­сса затру кIул дайсса техникалущал хасъсса пишакартал (взрывотехниктал). Миннал ххалбантIиссар агьали бавтIсса кIанттурду, колоннарду дачинтIисса кучарду.
Республикалул Виваллил иширттал Министерствалул, захIматсса тагьар хIасул хьурчагу тIий, сакин бувну бур чIумуйсса оператив штаб. Му штабрал группа зузиссар апрель зурул 25-нния байбивхьуну май зурул 10-ннийн бияннин хьхьугу, кьинигу.
ЛяличIисса къулагъасралун ласунтIиссар байрандалул кьини МахIачкъалалив концерт­ру, парадру дикIантIисса кIанттурду. Вай кьинирдай МахIачкъалалив жяматийсса низам дуручлай ва агьалинал мюхчаншиву дузал дуллай бикIантIиссар азарунния ливчу­сса полициялул зузалт.
ХIакьинусса кьинилийн личIи бувну буссар шадлугъру, дялахърурду нантIисса кIанттурду. Май зурул 9-нний байрандалул митинг хьунтIиссар Лениннул цIанийсса майданнив, мичча колоннарду дачинтIиссар М. ХIажиевлул ва Ахъушинскийл цIанийсса кучардайх. ТIутIив дишинтIиссар Ленинский комсомолданул паркравусса аьраличунал гьайкалданучIа ва аьралитурал хIатталлив.
Му бакъассагу, дялахърурду дикIантIиссар «Победа», «Ак-Гель» паркирдаву, Родопский бульварданий.
Хьхьугу, кьинигу къарал бикIантIиссар Лениннул майданнив, Паркраву Аьраличунал гьайкалданучIа, Вирттаврал АллеялучIа, Ленинский комсомолданул паркравусса аттракциондалучIа ва аьралитурал хIатталлив.
ЛяличIинува личIлулну ххал буллай бу­ссар дяъвилул ветерантал хIаласса колоннарду дачинтIисса кIанттурду.
Шадлугърал мероприятияртту нани­сса ва агьали бигьалаглагисса кIанттурдайн къабитантIиссар машинартту. Му бакъа­ссагу, пIякь учайсса затру, ярагъ ва цаймигу нигьачIаву дусса затру ларсун шагьрулувун цучIав къауххан, стационар постирдай ххишалану личIлулну ххал буллантIиссар машинартту, кьай ва пассажиртал. Ца къахьунмур хьурча, мугьлат бакъа, минутIирттал дянив, аьркинсса куццуй сукку тIун гьарица кIанттул органнай хIадурну уссар 945 полициялул зузала. Республикалул шагьрурдай ва районнай майрал байранну нанисса чIумал низам дуручлан тIий бур 6 азарунния ливчусса полициялул зузалт, мукунма частный охранный организациярдал, МЧС-рал зузалт, аьралитал.
Ихтилат къуртал хьуну махъ Макашарип Макашариповлул бувсунни 9-мур майрал байрандалул кьини, ссят 6-нния байбивхьуну, шадлугърал мероприятияртту къуртал хьуннин, машинарттан ххуллу лакьинтIишиву чIявуми кIичIираваллал шанбачIурдай.