Мартрал 29-нний МахIачкъалалив республикалул даражалий кIицI ларгунни Ххачпараснал луттирал Кьини. Ва иширан хасну Оьруснал (Православная) ххачпараснал килисалул епархиярттаву кIицI лагайссар хъуннасса шадлугъ – 1564 шинал мартрал 29-нний Аьрасатнаву бувкссар цалчин печатьрай бивщусса дьякон Иван Федоровлул «Апостол» тIисса лу. Ва ххачпараснал дин дусса гьарцагу чувнан бусрав-сий лахъсса лур.
З. АьбдурахIманова
Ванийн бувну, МахIачкъалаллал епархиялул ва динийсса сакиншиннардищал дахIаву дусса ва ЯхI-намусрал комитетрал сипталий, Дагъусттаннал ХIукуматрал Шеърилугърал театрдануву дурну дур шадлугърал мероприятие. Мунил лагрулуву цIубакIрай тIиртIуну дур республикалул цIаларгсса художник Аьбдулзагьир Мусаевлул «Утраченные храмы Дагестана» тIисса экспозиция, ванил хъиривра МахIачкъалаллал килисалуву яхьусса хъинну бухсса диндалул луттирдал «Памятники духовной книжной культуры» тIисса экспозициягу. Шиккун буккан бувсса ца яла хьхьичIва-хьхьичIсса лу «Остромирово Евангелие» тIисса канихчичрурдал луттирал копия бур. Ва ккаллийну бусса бур тарихрал ва культуралул багьа бакъасса ххазиналун. Цуппагу оьруснал цалчинсса луттиран хIисавсса. «Остромирово Евангелие» чивчуну бусса бур 1056-1057 шиннардий, Великий Новгородрай каялувчину ивтун ивкIсса Остромирдул тавакъюрайну, Софияллал соборданун цIа куну.
2012 шинал январьданул 26-нний Аьрасатнал миллатирттал библиотекалуву шадлугърал тагьардануву «Память мира» тIисса ЮНЕСКО-лул сертификат дуллусса РНБ-лул фондрал яла язисса луттиран хIисавссар.
МахIачкъалаллал тарихрал музейравугу 19-мур ттуршукулий щалва Дагъусттаннай бивкIсса килисардал суратирттал выставка дурну дур.
МахIачкъалаллал ва Грозный шагьрулул епископ Варлаам кIицI лаглай ур, Ххачпараснал луттирдал кьини ца ххачпараснал шадлугъ дакъашиву, ва цинявнналагу, чантI кусса, дунияллул культурардая, ххазинардая хавар бусса халкьуннал байран душиву.
