Апрельданул 18-нний Республикалул оьтту ласайсса-бутIайсса станциялий хьунни «Капля надежды» цIанилусса донортурал акция. Ванил сиптачишиву дурну дур Республикалул ЦIуллу-сагъшиву дуруччаврил ва Жагьилтурал иширттаха зузисса министерстварттал. Акция цурдагу хас дурну дур ГКУ-лул дуллалисса «Весенняя неделя добра-2016» тIисса проектран.

З. АьбдурахIманова
КIюрххил ссят 9-нния ахттайнбизулул 2 ссят хьуннин акциялувух гьуртту хьуну ур 20 инсан. Ва акциялул мурадгу бур жагьилтал донортурал иширттащал кIул баву, цалва хушрай оьтту аьркиннан кумагран укунсса чирилул давурттавух гьур­тту хьун буллалаву. ХIакьину жула дяниву чансса бакъассар оьтту аьркинсса, захIматсса цIуцIавуртту дусса къашайшалт.Шиккува кIицI лаган, апрельданул 20-нний Аьрасатнаву хьуссар «Национальный день донора в России» тIисса хъуннасса акция.
Цуманащар хIакьину доноршиву дан бюхъайсса? Ттул пикрилий, гьарнаща шайшиву щакри. Туну, бигьа бакъархха, гьарзатгу кьадиртун, оьтту ласай станциялийн гьан. Яла оь ласайссар чурххал цIуллу-цIакьсса, жан дусса инсантурая. Мугу гьарначIа хIакьину щала душиврийн щакри. Къакъашавайссавагу лагмава акъар.
Амма хьунабакьай цIуллу­шивугу дуна, цалла танмалшиврул мукунсса станциявагу чув буссарив къакIулссагу, захIматсса къашайшалтрал буруккин бан дакIнийн къабагьайссагу. Донор хьун виву гужгу, чIунгу лякъирча, вина инава кIукъакIулсса инсаннал оьрму ххассал бан лявхъусса виричуну ккаллий хьунтIиссара. ДакI хъин­сса инсанну лявхъусса.
Укунссара, «От сердца к сердцу» тIисса, акциярду хьуну дур Ух­ссавнил Ккавкказуллал вайми регионнайгу. Ваниннин цаппара гьантрал хьхьичI жучIара хьусса акциялувух гьуртту хьуну дур «Благосфера», «Чистое сердце» ва «Табасараннал жагьилтал» тIисса чирилул фондру. Аьмну – 86 инсан.
Мукунма ва зурул мутталий республикалул вузирдаву ва ссузирдаву донортураясса хъинбалдарая бусласисса лекциярду, ихтилатругу бувантIиссар.