Ларгсса нюжмардий Дусшиврул къатлуву хьунни сайки шинал мутталий республикалий най диркIсса «Куначество» проектрал хIасиллу дуллалисса хъуннасса шадлугъ.

Залму АьбдурахIманова
Мартрая, шинал ахирданийннин ДР-лул Миллатирттал иширттал министерствалул сакиншиннаралу най диркIсса ва проектрал хъунмур мурад бивкIссар миллатирттал дянивсса арарду,
чIаххувсса районнал дахIавуртту цIакь даву, ппухълунная жуйнна дирсса хъамаличу кьамул аврил аьдат жагьилмур никираву машгьур даву, дакIнийн дутаву ва дуруччаву. Проектраву гьуртту хьуссар республикалул циняргу 52 муниципал сакиншиннараясса 104 кулпат. Хъамаличунал кьинилун хасъсса шадлугъру хьуссар циняр районну дарчIусса 10 зоналий: Къизлардай, Хасаврай, Къизилюртлив ва Агъуллал, Дарбантуллал, Ахъушиял, Къайтагъуллал, Гъуниннал, Шамиллул ва Бущихъиял районнай.
Лакрал ва Ккуллал районну гьуртту хьуссар Ахъушав хьусса шадлугърай, ЦIуссалакралмур район тIурча хьуссар Хасавюртливмуний.
Проектрайн бувну, ца райондалийсса кулпатравун хъамалу буцайсса бивкIссар цамур райондалиясса, цамур миллатраясса кулпат­равасса оьрчI-душ. ЦIусса кулпат­раву га оьрчI гайннал оьрчIащал ца школалийн архIал занай, царай дялахърурдаву гьуртту хъанай цаппара гьантрай кьаитайсса ивкIссар. Ва проектраву гьуртту хьун язи бувгьуссар гьарцагу райондалий, шагьрурдай, щархъаву эбрат дусса, ххуйсса тIул-тIабиаьтрал, мяърипатрал лащу-щаллусса кулпатру.
«Куначество» проектрал шадлугърай гьуртту хьунни Дагъусттаннал ХIукуматрал председательнал хъиривчу Рамазан ЖахIпаров, миллатирттал иширттал министр Татьяна Гамалей, Нинушиврул ва оьрчIал ихтиярду дуруччаврил уполномоченный Интизар Мамутаева, муниципал сакиншиннардил каялувчитал, проектраву гьуртту хьусса 104 кулпат ва миннал оьрчIру.
Шадлугъ тIитIлай, Татьяна Гамалейл кIицI лавгунни, цув хъинну ххарину ва пахрулий бушиву проектраву чялишсса гьурттушинна дурсса жулва халкьунная, миннал сисаврия.
«Ва проектрал цIунилгу тас­ттикь бунни жулва халкь хъинну дусшиву дан кIулсса, нахIу-хIалану яхъанахъисса, цаннан ца бувчIусса ва бувгьусса халкь бушиву. ОьрчIру цIусса кулпатраву яхъанай хъамалу бивкIшивруцIун, ми бивкIссар «чIиви дипломатнал» мурадгу биттур буллай. Чил ужагърай чил культуралущал, багьу- бизулущал ва мазращал кIул хъанахъаврицIун, му ивкIссар цалва миллатрал культуралущалгу, духIи-дуцин, багьу-бизу тарбия бувсса кулпатращалгу гай кIул буллай, дус буллай ва гъан буллай», — увкунни ванил.
Татьяна Гамалейл, мукунма, кIицI лавгунни, цил муниципалитетирттал каялувчитурахь тавакъю бувну бивкIшиву ва проектравух гьуртту бан дурккусса, кIулшивурттал кьадру бусса, итххявхсса кулпатру. Ванил бусаврийну, щархъаву мукунсса кулпатру лявкъуну бур чIявуми учительтуралми. КIицI лавгунни, ванийну республикалий, жяматраву учительнал пиша ца яла бусрав-хIурматрайнувасса пишану ливчIун бушиву.
Рамазан ЖахIпаровлул, Рес­публикалул БакIчинал цIания циняв барчагу бувну, бувсунни «Куначество» проект бухзаманалувун лаглагисса аьдат цIулаган дуван дуккан дурсса агьамсса проект хъанахъишиву.
«ХIакьину, инсаниятрал бюхъурду ва шартIру къулай хьусса заманнай, чил шяраву хъамалу личIайсса ишругу чан шаврицIун, укунсса, жулва буттал буттахъал ца яла ххуймур аьдат хъамадитулул хьуну дур. Жулва жагьилтурангу, цалва миллатраямур бакъа, чIаххуврай-чIарав ялапар хъанахъисса миллатрал культуралия, аьдатирттая чансса бакъа кIулну бакъар. Мунияту ва аьдат цIулаган даврил дайдихьулун «Куначество» проект ккалли давияв», — увкунни вице-премьернал. СахIналий муниципалитетирттал культуралул отделлал зузалтрал щаллу бунни миллатирттал халкьуннал балайрду ва къавтIавуртту. ДР-лул Миллатирттал иширттал министерствалул чулуха ХIурматрал грамотартту дуллунни проектравух гьуртту хьусса муниципал сакиншиннардил каялувчитуран, пишакартуран ва проектрая чичлай ва буслай бивкIсса республикалул СМИ-рдал зузалтран. Миллатирттал мазурдийсса республикалул кказитирттава ХIурматрал грамотартту дуллунни даргиял «Замана» ва жулва «Илчи» кказитирттан. ЧIирисса къулагъасрая жугу ххариссару вайннал дуллалисса дайдихьурдаву гьуртту хъанан.