Уттигъанну Аьрасатнаву, виваллил азардал специалистътурал Миллатрал интернет-обществалул итабавкьуну, дунияллийн бувккунни «Призвание – интернист» цIанилусса сборник. Муниву ккаккан бувну бур Аьрасатнал цинярдагу регионнал хьхьичIунсса элмийсса школартту.
Миннуву лайкьсса кIану бугьлай бур Дагъусттаннал терапевтътурал школалул, цийгу каялувшиву дуллалисса Дагъусттаннал паччахIлугърал медициналул академиялул цалчинма проректор, дуккаврийн дагьаймур даврил проректор, 1-мур госпитальный терапиялул кафедралул хъунама Маммаев Сулайман.
Бадрижамал Аьлиева
Му сборникраву лавайсса кьимат бивщуну бур ДНМОТ-лул (Дагестанское научное медицинское общество терапевтов) дуллалисса давурттан, мунил председатель, профессор Маммаев Сулайманнул жулла республикалул хIакинтурал пишакаршиврул даража лавай буван буллалисса захIматран.
Цува Сулайман Нураттиновичрив ва луттираву тIий ур: «ХIакин – му, цалла планная хъар бакъа, ччимур чIумал кумагран учIан хIадурсса, чурххалмур дакъа, дакIнилмур къювугу хьхьара дуван кIулсса ва хIадурсса инсанни. Цурда «Интернист» проект дур ххаллилсса сакиншинна, хъунисса программарду, хьхьичIунсса лектортал бусса проект. Му проектрайн бувну, хIакинтураща бюхълай бур даврил кIулшивуртту, опыт куннащал куннал кIибачIин, цалла медициналул кIулшиву гихуннайгу ласлан, ларай дуллан. Хъинну хьунссия «Интернистраву» ласласисса дистанцион кIулшиву пишакаршиврул даража лавай баву мурадрай бувккусса курсирдащал цалий дацIан дуварча».
Сулайман Нураттинович уттинин цимилгу увкссар «Интернист» проектрал майданнив, гепатологиялийн, кардиологиялийн багьайсса, хIакинтурал даврил даража лавай баврийн тIайла бувсса, мюнпат-хайр хъунмасса цикссагу лекциярттащал. Мяйжаннугу, цIанасса захIматсса чIумал цалла агьаммур даврия укъавцун, кулпатрая арх къавхьуну, цува ялапар хъанахъисса, зузисса кIанайра ялунсса кIулшиву ласун, цалла кIулшивуртту цайминнайх дачIин, цанма цайминная цIусса затру кIул хьун бюхълахъаву, медициналуву анаварсса бущилий хъанахъисса дахханашивурттал, цIушиннардал хъирив лаллансса каши душаву хъунмасса иш бур, цамур региондалийн, шагьрулийн най, чIунгу, арцугу харж къадурна. Укун, дистацион образованиялул жулва цIанасса оьрмулуву цалнияр цал агьамсса ва хъунмасса кIану бугьлай бур. «Интернист» проектравух гьуртту хъанахъисса хIакинталгу ялу-ялун чIяву хъанай бур.
Информацион технологиярттал авадансса уттизаманнай укунсса проектру чара бакъа аьркиншиву бувчIлай, жулва билаятрал медициналуву зузиминнан 2001 шинал пикри хьуну бур дацIан къадиртна гихуннайгу постдипломрал образование дачин дуван бюхъансса программа дуван, яни хIакинтурансса интернет-сессияртту буллан, медициналул вузирдал студентътурал кIулшиврул даража лавай бавугу мурадрай. Му шиная шинмай жулла республикалул терапевтъталгу хьхьичIунсса гьурттушинна дуллай бур Аьрасатнал ва чил билаятирттал хIакинтуращалсса интернет-хьунабакьавурттавух.
Ца-кIива махъ Миллатрал интернет-обществалия циявагу. Ва обществалул цикссагу шинну хъанай дур хIакин-терапевтътурансса ва хIала-ккаласса специальностирттансса «Интернист» сайт бачин бувну. ЦIанасса, ссанчIав чIун ва арцу диял къахъанахъисса, чIумал ва хъанай дур хъинну аьркинсса, дакъа чара бакъасса даву.
«Призвание – интернист» сборник цуппа итабавкьуну бур машгьурсса хIакин ва аьлимчу, профессор, РАН-рал академик, Аьрасатнал Федерациялул лайкь хьусса хIакин Владимир Ивашкиннул юбилейран хас бувну.
