Нюжмарнияр ххишаласса гьантрай митингру дуллайгу бивкIун, яла Москавуллал кольцорал ххуллу лакьинну тIийгу бивкIун, Дагъусттаннал чIярусса хъус духхай машинарттал шофертал цаппара хIаллава бавчунни Москавуллал чулухунмай. Ми утти забастовкалия инкар хьуну, хъус ларсун най бур тихун.
ХIасан Аьдилов
ХIукуматрал къатраву хьунабакьаву хьуну махъ, Дагъусттаннал дальнобойщиктурал баян бунни забастовка къуртал дуллалишиву. Гара кьини дазуй салкьи хьусса Азирбижаннал продукция вагоннава ларкьунни хъуни машинарттайн.
Властирдал бакIрайн лавсунни дальнобойщиктал давурттал щаллу бан. Махъсса ппурттуву хьусса иширттайну ва Турциянащалсса ара лирну махъ илкин хьусса рынок щаллу буллан най бур Дагъусттаннал ва Азирбижаннал хъуслил. Микку жулва хъуни машинарттал кумаг аьркин хьунссар.
Республикалул каялувчитурал дальнобойщиктурал забастовка дайдишайхтура миннал мурад щаллу бансса чараннах луглай бия.
Республикалул БакIчинал тапшур баврийну, ноябрьданул 20-нний ДР-лул Халкьуннал Мажлисрал Председатель Хизри Шихсаидов хьунаавкьуссар дальнобойщиктурал вакилтуращал. Яла 5 гьантлувату ДР-лул ХIукуматрал Председатель Аьбдуссамад ХIамидов, ПаччахIлугърал Думалул депутат Аьппас Мамедовлущал архIал хьунабавкьунни дальнобойщиктурал вакилтуращал.
Циняв захIматнийн багьсса масъалартту чулийн буккан бувну бур ва контрольданулун лавсун бур. Аьбдуссамад ХIамидовлул бакIрайн лавсун бур ми масъалартту щаллу бансса хIарачат буван.
