Декабрьданул 11-13-ннийн МахIачкъалалив хьуну дур Ухссавнил Ккавкказуллай хьхьичIра- хьхьичI сакин дурсса вузирдал дянив­сса информацион мюхчаншиврул щалва Аьрасатнал этап – бусалдаравун дагьсса CTF.

З. АьбдурахIманова
CTF,Capture the Flag («Захвати флаг») бур компьютердал система мюхчан дувайсса гьурттучитурая сакин дурсса командарттал тIуркIу. Ва тIуркIулуву гьуртту хьун бюхълай бивкIссар цимирагу командалуща. Гьарца командалул хьхьичI бишай­сса бур ккаккан дурсса чIумуйннин щаллу бан багьлагьисса хасъсса суаллу. Вайннаясса тIалавшинна дусса дур цумур командалул цуксса анаварну чIявусса суаллан жавабру дулайрив ххал дан. Гьарца дуллусса жавабрах жюрилул серверданийн дучIайсса дур ттугълил лишан. Му лишан ккалли дувайссар командалун буллусса баллданун.
СТF тIуркIу ттинин буллай аьдатравун багьну бусса бур Аьра­сатнал чIярусса регионнай. Утти МахIачкъалаливгу гьар шинах, интернетравусса информациялул мюхчаншивруха зузисса кIиттуршаксса пишакар хIадур уллан бивкIния шихунмай, ва тIуркIу аьдатравун багьан аьркинссар.
ДР-лул печатьрал ва информациялул министр Азнаур Аджиевлул бусаврийну, Ухссавнил Ккавкказуллай махъппурттуву Дагъус­ттан ккалли бувайсса бур медиа ва информацион технологиярттал мероприятияртту дувайсса агьамсса кIануну.
— Ва ца жул сипта дакъасса, жуцIун Республикалул БакIчигу кабакьлай ур. Жул мурад бур мяйжаннугу Дагъусттаннай укунсса журалул давурттив дуван бюхъайшиву ккаккан бан, уттизаманнул тIалавшиннарду щаллу дуван бю­хъайсса регион душиву тасттикь бан, — тIий ур министр.
Информациялул мюхчаншиврул СТF хьуну бур Дагъусттаннал паччахIлугърал халкьуннал хозяйствалул университетраву. Командарттаву гьуртту хьуну бур МахIачкъалаллал вузирдал пишакартал, магистранттал ва дуклаки оьрчIру.
Укунсса журалул тIуркIулуву гьуртту хьусса пишакартуран цивппа зузисса кIанттурдай чара бакъа вания хьуссар ххуйсса дарс ва даврил даража гьаз буллалисса ша. Дуклаки оьрчIан, тIурча, цала вания гихунмай оьрмулуву язи бугьантIисса пишарачIансса ххуллу хьун аьркинссар.