Ссавния баргъгу, чIарату ниттихъулгу чан къабаннав

Ларгсса нюжмардий жулла республикалий хьунни Ниттил кьинилун хас дурсса чIярусса шадлугъру. «Пусть всегда будет солнце! Пусть всегда будет мама!» цIанилусса шадлугъ хьунни ноябрьданул 25-нний МахIачкъалалив «Эльтав» банкетру бай залданувугу. Му сакин дурну дия Щалагу Аьрасатнал «Матери России» жяматрал суккушиндарал Региондалул отделениялул.

Бадрижамал Аьлиева
Ва даврил чIаравбацIаву дурну дия ДР-лул Миллатрал политикалул, ЦIуллу-сагъшиву дуруччаврил, Печатьрал ва информациялул министерстварттал, Аьрасатнал Мизитирттал ассоциациялул, МахIачкъалаллал епархиялул, «Единая Россия» партиялул, ДР-лул Солдатътурал ниттихъал комитет­рал, Каспийскаллал администрациялул, «РусГидролул», «ЗМ» кофейнялул.
Шадлугъравух гьуртту хьун бувкIун бия республикалул шагьрурдаясса ва районнаясса чIявусса оьрчIру бусса, цалва оьрмулуву биялсса захIмат бувсса хъами. Ни­ттихъал кьини хъун дуван бувкIун бия республикалул министерствар­ттал ва ведомстварттал вакилтал.
Шадлугъ тIиртIунни «Матери России» цIанилусса Щалагу Аьрасатнал жяматийсса суккушиндарал регионал отделениялул председатель Таиса МахIаммадовал. Ванил бувккунни сенатор, «Матери России» жяматийсса суккушиндарал председатель Валентина Петренкол барча баврил ххару.
— Аьзизсса ниттихъул! Зу жул оьрмулувусса яла чаннамиру, яла аьзизмиру, зу бушивугу – му хъунмасса талихIри. Ва кьинигу жунсса цал ххишаласса хъинбагьанар зухь, жула яла гъанми, яла ххирами инсантал хIисаврай, ччаврил, аякьалул ва къайгъулул махъру цал ххишалану учинсса. Нину – ччаврил, ттюнгъашиврул бакIщаращир, чул бищай ттарцIри ва оьрмулул ххуллийсса маслихIатчири…
… Буруччиннав Заннал зугу, зул оьрчIругу, зун ххирамигу, жулва аьзизсса Аьрасатгу, — увкуну бия В. Петренкол барча бавриву.
ДР-лул миллатрал политикалул министр Татьяна Гамалейл цилва ихтилатраву дакIнийн бувтунни хьхьичI кьини хьусса II Республикалул хъаннил форум, республикалул цинярдагу, 52-гу, муниципал сакиншиннараясса хъамигу гьурттуну хьусса, му форумрай Республикалул БакIчи Рамазан АьбдуллатIиповлул наградартту дуллуминнавух Таиса МахIаммадова хьушиврий чIурчIавгу дурну, барча бунни ва цинявнналвагу цIания му бахшишращал.
Таиса Билаловнал буллалисса захIмат, дуллалисса хъин-хъинсса давурттив чIалай, цаппарасса къуллугъирттал ва батIаврийгу ванин бахшишру ва грамотартту дуллунни.
ДР-лул БакIчиначIасса кулпатрал, нинушиврул ва оьрчIал ихтиярду дуруччаврил Уполномоченный Интизар Мамутаевал бунни хъинну бюххансса ихтилат.
— Нину – му яла рувхIаниймурди, мунищал лаянсса цучIав акъассар. Цавагу ниттин нясивну къалякъиннав лякьлул оьрчIацIа хьусса къюву духIан. ТIутIайх дичиннав жулла Ватан. Ва дунияллийн оьрчIру ляхъайсса оьрмулунни, дяъвилун бакъача.
Гихунмайгу лавхъунни хъинну чIявусса махъру республикалул личIи-личIисса министерстварттал, ведомстварттал, къуллугъирттал вакилтурал.
Ва кьини залданувун оьвкуну бия республикалул шагьрурдаясса ва районнаясса чIявусса оьрчIру бусса хъаннийн. Лакрал райондалия шикку гьуртту хьун аьркинссия Гъумучатусса Макьаева Жавагьи АпаннихIажинал душ. Амма мунища бучIан къавхьуну, мунилмур медальгу, бахшишгу дуллунни ва шадлугъравух гьуртту хьусса Лак­рал райондалул администрациялул бакIчинал хъиривчу Соня Макьаевахьхьун. Жавагьил ччаннай бацIан бувну бур 6 оьрчI. Цилва зун-занан шайсса оьрмулий къанаврттай бивкIун бур Къаяккантлив, Ленинккантлив, Гъумук 8-мур мартрал цIанийсса фабрикалий зий. Ккуллал райондалия медаллу дуллуминнал цIардавух дия 10 оьрчIал нину, Хъюйннал шяравасса Кьурбанова Марусял, 5 оьрчIал нину, Вихьуллал шяравасса ХIусайнова Залиххал (Вихьуллал шяравусса оьрчIал садикрал хъунмур) ва, 5 оьрчIал нину, ЦIуссалакрал райондалиясса Чапаево шяравасса МахIаммадова Разиятлул цIарду. Оьрмулул бугьарасса Марусяща бучIан хьуну бакъая ва кьини шиккун. Залихха цуппа гьуртту хьунни ва байрандалий. Разиятлулмур бахшиш лайкьну кIунттил дургьунни ванил душ Илиясова Сабринал. Ва мажлисравух Сабрина гьуртту хьунни Ккуллал райондалул администрациялул бакIчинал хъиривчу хIисаврайгу, «Матери России» суккушиндарал член хIисаврайгу. Разиятлул мархри ЦIуссалакрал райондалия бухьурчагу, 1979-ку шиная шинмай мина дирхьуну бур Ккуллал райондалий Ваччиял шяраву. Миккун бизаннин зий бивкIун бур Хасаврай горторграй ревизорну. Му шинал лас ХIажияв тIайла уклай Ккуллал райондалий зун, вайннал кулпат бивзун бур зунттавунмай. КIийгу Разият зий бивкIун бур райпорай ва, пенсиялийн букканнин, налоговый инспекциялий.
Лахълахъисса мукъурттил лях-карах дагъусттаннал эстрадалул яла чаннами цIурттал (Нурианна Къаллаева, Султан-Айгъази, Зарина Телидзе, Жанибек Рамазанов, Рукьият ХIамзатова, м.ц.) ниттихъан хасну увкунни балайрду. Цалла гьурттушиннарайну байран хъиннура чIюлу дунни Аьрасатнал ФСБ-лул Дагъусттан Республикалийсса Пограничный Управлениялул Аьрали духовой оркестрданул ва «Последний рубеж» ансамбльданул, 1-мур гимназиялул тарбиячи Таиса Темировал, 9-мур лицейрал оьрчIал хорданул ва 2-мур искусствалул школалул къавтIаврил коллективирттал.