Вай гьантрай МахIачкъалаллал депутатътурал Мажлисрал цалчинмур созыврал батIаву хьунни. Шикку Кировский райондалул бакIчину вайннал увчIунни ттинингу ва къуллугърай зий ивкIсса СалихI Сагидов. Ванахлу чIурду буллуну бур Мажлисрал 27 депутатнава 22 депутатнал.

Цува ва къуллугърайн увчIуну махъ СалихI Сагидовлул вайннахь барчаллагьрал махъ лахълай кIицI лавгунни, цайнна республикалул БакIчи Рамазан АьбдуллатIиповлулгу, шагьрулул бакIчи Муса Мусаевлулгу, Мажлисрал депутатътуралгу хъуннасса вихшала дирхьушиву ва вайннал цайва бивхьусса мурадру щаллу бан цув буржлувшиву.
Шикку гьуртту хьунни конкурсрал комиссиялул вакилтал ва райондалул къуллугърайнсса кандидатътал, райондалул администрациялул ва ТИК-рал зузалт, мукунма СМИ-рдал журналистъталгу.
Конкурсрал комиссиялул вакилтурал бусаврийну, Кировский райондалул бакIчинал кIанайн рирщуну диркIун дур шанна цIа: СалихI Сагидовлул, Амир МахIаммадовлул ва ХIажи Давдиевлул. Вайннава бувчIавуртту дайдишин хъунма хIал къаливчIсса чIумал цала цIа дукьан дурну дур ХIажи Давдиевлул.
З.АьбдурахIманова