Уттигъанну МахIачкъалаллал «Синема-холл» кинотеатрдануву хьунни «По небу босиком» тIисса художествалул кинорал ларкьусса показ. Ва кинорал сценарист ва режиссер ур Ккавкказуллай машгьурсса артист Султан Хажирико, цувгу жуна чIявучин кIулсса Султан Ураган цIанилу. Кино ккаккан дан хьхьичI шикку хьунни, фильмрал продюсершиву дурсса Аслан Безиров ва агьамми роллу дургьусса Алан Кокоев ва Милана Карагулова гьурттусса, хъун бакъасса пресс-конференция.

З. АьбдурахIманова
Му тIитIлай, «Дагъусттан» РГВК-лул генерал директорнал хъиривчу Алексей Казаклул кIицI лавгунни, «По небу босиком» фильм ккаллишиву Ккавкказуллай махъсса 30 шинал дяниву ларсъсса цалчинсса полнометражрал фильмран.
— Жунна цинявннан дакIнийссар щалагу Ккавкказуллал тIабиаьтрал, халкьуннал, багьу-бизулул, аьдатирттал, культурардал ххуйшиврия буслай диркIсса Совет заманнай ларсъсса фильмру. Масалдаран, ссал къабагьари миллионну халкьуннан ххира хьусса, мунихчIин щала Ккавкказ аьзиз бувсса «Свинарка и пастух» тIисса кино?! Яла тIааьнми, марцIми асарду чантI учин буллалисса киноран хIисавну диркIссар га фильм. Ва хIакьину жура ккаккантIисса киногу вай жагьилтурал ларсун дур, хIукуматрая цичIав кумаг тIалав къабувну, так ца цалла энтузиазмрай. ЧIалай бур вай цалла Ватангу ххирасса, мунил цIагу лахъа-хъун дан, машгьур дан хIадурсса команда душиву, -увкунни ванал.
Фильмрал режиссер Султан Хажирикол бувсунни цурда кинорая ва ванил мяъналия щалвагу Ккавкказуллахь.
— ЧIярусса кинорду ккарксса ва миннул мяъна-мурад лаласун чансса бухьурчагу бюхъайсса ттун хъинну кьурчIи бизлай бур ва заманнай Ккавкказуллаясса кинорду къаласласаву. Мугу, щалва билаятрангу, дунияллунгу жучIара ккаккан данмургу ххигу-ххишала дунура. Мунияту Storm Cinema кинокомпания хIадурнугу бур ва проектраха зун. Ттулла цалчинмур фильмраву ттул хIарачат ба­къассия бакIрая ччаннайн дияннин духIи-дуциндарая буслан. Ттун ччай бия куклусса, лаласун бигьасса, дакIурдин нуш хьунсса затирдай чIурчIав дуван. Ччай бия инсаннал кIулшилул най дуна лаласунсса Ккавкказуллал тIабиаьтрал, инсаниятрал ххазинардал ххуйшиву чIалачIи дуван, — увкунни ванал.
Фильмрал продюсер Алан Безировлул бувсунни, цал мурад бушиву кино Аьрасатнаву да­къасса, жула чIаххуврайсса ва архсса вайми-вайми билаятирттайгу ккаккан дувансса.
— ХIакьинусса кьини на ура Германнавасса вакилтурайн ув­ккун, миннащал икьрал дуллай ва кинорал хIакъираву. Мукуна ихтилат сукку бувну ура Лос-Анджелесраясса машгьурсса актернащалгу, Американаву фильм ккаккан дуван бюхъа-къабюхъавриягу. Уттигъанну Москавлив кинорал показ дурну махъ, хъинну чIявусса кIанттурдаясса халкь гъан хьуна, цачIа-цачIарагу ккаккан дувансса чаранну лякъин кумаг банну тIисса, — бувсунни продюсернал.
Жулва билаятрал кинотеатрдаву «По небу босиком» фильм ккаккан дуллай байбишинтIиссар декабрьданул 17-нния гихунмай.
Кино ларсун дур романтикалул трагикомедиялул жанрардай.