Вай гьантрай ДР-лул КIулшивуртту дулаврил министерствалул пишакартал занай бур республикалул шагьрурдайсса ва районнайсса школардайн, шиккусса учительтурахь, оьрчIахь ва миннал нитти-буттахь гьашинусса ЕГЭ-лул сакиншиннардая буслай.

З. АьбдурахIманова
Къарабудахккантрайн укунсса аьрххилущал увкIун ур Минобрданул управлениялул хъунама Жяъппар Кебедов. Шикку ванал бувсун бур 2016 шинал ЕГЭ-лул ва ОГЭ-луцIун дархIусса цIушиннардия ва аьмну сакиншиннардая. Ж. Кебедовлул бусаврийну, ларгсса шиннардий 9 класс къуртал буллалиминнал дулун ккаккан дурну диркIхьурча кIира экзамен, гьашину миннул ялун ххи хьуну дусса дур дуклаки оьрчIал цалла язи дугьантIисса ялагу кIира экзамен. Язи дургьусса кIира экзамендалува цания цаннил «незачет» ласурча, оьрчIан аттестат къабулунтIиссар. Мунияту оьрчIахь дусса дур ихтияр язи дургьусса ми кIира дарсирал экзамен цукун шайрив ххал дуван экзаменнал чIун дучIаннинна дулун (пробный).
Ванал мукунма бувсун бур ЕГЭ дулайни ва ларгсса шинал куннасса тIалавшиннарду ялун нанисса шиналгу дикIантIишиву: телефонну ишла дуван къадагъа дикIантIишиву, экзамен дусса аудиториялул хьхьичI металлодетектор дикIантIишиву, видеокамерарду бивхьуну бикIантIишиву ва цаймигу. Жяъпар Кебедов мукуна гьур­тту хьуну ур Избербашрай ва Каспийскалий хьусса хьунабакьавурттайгу. Шикку ванал кIицI лавгун бур 2015 шинал дуллусса ЕГЭ-луя ва ОГЭ-луя махъ республикалий 25 % дуклаки оьрчIал аттестатру бакъа ливчIшиву. Ва бакъасса, 2014 шиналнияр ларгмур шинал гьарзану бивкIун бур лахъсса баллу лавсъсса дуклаки оьрчIру.
Вай хьунабакьавурттай нитти-буттахъаща ва учительтураща бювхъуну бур Минобрданул пишакартурахь цанма аьркинсса затру цIуххин ва миннунсса балжисса жавабру баян.