Вай гьантрай щалвагу жулва билаятрай кIицI ларгунни Ниттихъал кьини. Аьрасатнаву Ниттихъал кьини байран кьинину цIакь дурну дур 1998 шинал, ноябрь зурул махъра-махъсса алхIат кьини. Ва кьини кIицI лагаврил агьаммур мурадгу бур нинухъру лахъа-хъун баву, ниттихъаха ххишаласса хIурматгу, аякьагу даву.
Андриана Аьбдуллаева
Жулва оьрмулуву чIярусса байранну хьунадакьай, амма жунма оьрму пишкаш бувсса, жува хъуни буллай хьхьурду уттара дурсса, цивппа дунияллий буссаксса жухава аякьалийсса ниттихъал байран духьунссар гьарца инсаннан яла ххирамур ва ххаримур байран. Дазу-зума дакъассар ниттихъал ччаврин ва ссавурданун. Жунна гъилишивугу, чанигу буллалисса бургъил тIинтту хьусса ниттихъайри ва дуниял дарцIусса.
Ниттихъал кьини лавайсса даражалий кIицI дунни вай гьантрай ЦIуссалакрал райондалул Агьалинан социал хIаллихшиннарду дуллалисса комплексный центрданийгу. Ва байран кIицI дан Центрданийн оьвкуну бия Новостройрайсса шяраваллавасса чIявусса оьрчIру бусса, кулпатраву цIуллу-сагъшиврул ссуссукьушиву дусса оьрчIру бусса ниттихъайн, мукунмасса ласру бусса хъаннийн: Иллуева Анисатлуйн, Рамазанова Элеонорайн, КьурбанмахIаммадова Эльфридайн, Дибирова Софияйн, Гъапурова Пизатлуйн.
Ва Центрданул зузалтрал, Ниттихъал кьини бакъассагу, гьарицагу байрандалийгу ххуйсса бахшишругу дурну барча бувайссар цалла аякьалулун лавсъсса кулпатру. Ниттихъалмур байран шикку гьарица шинах ляличIинура лахъа-хъунну, тяхъану лагай. Шадлугърал мажлис тIитIлай, нинухъру байрандалущал барча буллалисса ихтилат бунни Центрданул хъунмунил хъиривчу Аьбидат Аьбдуллаевнал.
— Дакъахьунссар дунияллий цичIар ниттил ссихIнияр нахIусса, ниттил чIунияр ттюнгъасса, ниттил каруннияр кIукIлусса. Дунияллий яла ххуймур хъамитайпагу оьрчI канил бувгьусса хъамитайпа бухьунссар. Акъахьунссар цаягу шаэр, художник, композитор ниттил бюхттулшиву ккаккан къадурсса.
Дахьа ччаннай авцIусса чIивитIул цалчинсса махъгу «дадай» тIисса бур, хъуни хьуну махъгу, хъунив хьуну махъгу цIун хьурчагу, ххаришиву ялун диярчагу, «дадай» тIий леххаву тIий буру жува.
Барча зул байран, жул аьзизсса нинухърув! Зун тачIав оьрчIал дард къаккакканнав, – увкунни Аьбидат Аьбдуллаевнал.
Шиккува кIицI бан, Ниттил байран гъан хъанахъисса гьантрай Центрданул баян бувну бия дуклаки оьрчIал дянив ниттихъахасса сочинениярттал конкурс. Ниттихъая яла ххуйми, яла тIааьнми махъру чивчуну бия оьрчIалгу цалла сочинениярттаву:
— Нину – жулва ххуллу чанна буллалисса баргъри.
— Нину – яла вихшала дишин бучIима дусри.
— Нину – ссихIирчири, магьраву кунма жунма ччан бивкIмур щаллу буллалисса.
— Ттул нину бакIрал ххуйсса, аькьлу бусса, захIмат ххирасса буну тIийри га ттул буттан ххуй бивзсса.
— Нину кьатIув дурктари, ганил байча къащун нигьачIи бикIару, — тIий, чичлай бур оьрчIру цалла сочинениярттаву.
Цинявппагу нинухъру барча буллалисса ихтилатру бунни мажлисрай гьуртту хъанахъисса ниттихъалгу.
— Я Аллагь, царагу нину дунияллия ччяни къагьаннав, ми цалва оьрчIругу, оьрчIал оьрчIругу щаллу баннин, оьрмулул буччиннин битаннав. Дяъвирду къахьуннав, дуниял паракьатну личIаннав, — тIий дуаьлий бия ихтилатру буллалими.
Вайннал дакIнийхтуну барчаллагь увкунни цанна укун ххаллилсса байран дурсса ва мудангу цалва кулпатирттах аякьа дуллалисса Центрданул зузалтрахь. Ниттихъаясса шеърирдугу бувккуну, вайннан хас дурсса къавтIавуртту дунни ниттихъул барча бан бувкIсса мюрщултралгу.
Ссигърал ва учаларттал викториналулгу хъиннува тяхъа бунни мажлис. ЦIуминалий дуллалисса цумурцагу шадлугъ чIюлу дай райондалул культуралул управлениялул зузалтрал. Ва кьини ниттихъан хас бувсса балайрду увкунни Аьйша Жабраиловал, Роза Аьлиевал, МахIаммад Аьлиевлул. Балайрдахун ва къавтIавурттахун дачIу ришлай ия Артур Аминов.
Аьбидат Аьбдуллаевнал дуллунни ниттихъан спонсортурал кумаграцIух дурсса бахшишру. Мажлис лавкьунни «Агь, ттул буттал кIануй!» балайлийну.
Ниттихъал байран хьунни ниттихъан лайкьну ххарину, тяхъану.
