Ккурккуллал Даниял кIул­ссия ттун институтра­ву ккалаккисса заманная шихунайва. Мукъуйгу цIу бусса, жяматрачIагу бусравсса, оьрчIал вивгу сийлисса жагьил ия. ЦIанасса чIумалгу ва ур миллатирттал вивсса ишкка­кку, муаьллим, школалул директор, шаэр.

ДакIнийри ца 5-6 шинал хьхьичI на увххун, игьалаган щяивкIссияв Ахъушинскийл кучалул махъсса бигьалагай кIанайсса скамейкалий. Микку 3-4 цаймигу бия. Минная ца ивзун ссаламгу буллуну, чIарав щяивкIун, яхши-хашлийн увккунни: «Ина лаккучувагу акъарав?». «Ура, на лаккучура», — куну жаваб дулав. Шиккун най унува ттувува нава пикрилий уссиявкьай, ва адаминал лажи-лаччин лаккучунал дур тIий. ЩяикIайхтува хъярчирай ура: «Ина кIулшай чуввагу акъарав?» – тIий. КIул акъа хъамаличунащал, утти бувккун ихтилатрайнгу, кIул хьунну цаннан-цагу. Чанкура тIисса ия цувагу. Чан-чанну тIий бавчуру, цаннан-цагу кIул хъанай, ихтилатгу нахIу буллай. Чанкура ур Лакрал райондалий­сса Щардал шяравасса. Ттунма кIулсса, ххуй-ххуйсса шяраваллил агьулдания цIухлан ивкIукун, хъиннува аьч увккунни Чанкура. Зий ивкIун ур ва Совет заманалул шиннардий колхозрал оьллал фермалул хъунаману, правлениялул членну. На Ккурккул ЧукIуннал чулухатусса кIул хьувкун, цIухлан ивкIунни: «Ккур­ккуллал Даниял кIулссарив вин?» — тIий. КъакIулли, цIамур ишлану баллалисса дур, аммарив гъанну, цачIу-чIарав бивну, ссалам-аьлайк бувну бакъару. «Данияллул пасихIсса мазгу, гьунаргу кIул хьуну, цала душ щар буллалисса хъатIийн тямада анна тIий, мунал хъирив увкIссияв хъатIул хьхьичI кьинива. ГьалмахтурацIа бавнугу ура, му ца кIанай ацIайсса инсангу акъассар тIий. Гъумукун ияйхту, цIухху-бусулий унува, кIул хьунни, Гъумук ивкIун, шавайн лавгсса. Га цIана ссур бувну лавгра Ккурклив. Даниялгу ккавккун, ттулва мурадгу шашан бувну, зана хьуссияв», — тIий, му мажлис Данияллул бачин баврия буслан ивкIунни Чанкура. «Ттун къакIула мунан, ттуннарагу къакIулсса, шяраваллил аьдатру ва эбадатругу, оьрму ва багьу-бизугу цукун кIулну бивкIссарив», — тIий ур Чанкура.
Мунияр махъ Чанкурагу хьунакъаавкьунни
Даниял тIурча ттучIавагу, ттул арсурваврачIа, душваврачIа, ссухълунначIагу, бусраврай уссар. ТтучIан бияннинма «Илчи», чIавамур душ оьвтIунтIиссар телефондалувух, Данияллуясса затру бурча, букки тIий, ххаришиву кIидачIлай. Мува куццуй муданма «Илчи» чичайсса, хха лях кьакъабивтун, бугу буккайсса ссугу буссар, Данияллул назмурду, макьаларду дурхха, вин миннуя хавар бурив тIий, цIухху-бусулий. Данияллул агьлу ччяния шихунмайва кIулссар ттун. КIулссия мунал ппу МухIаммадаьлигу, нинугу, уссурвал-ссухълугу. Хъиннува кIулссия, ттухьра дарсругу дирхьусса, аьпа биву Шагьмилав МахIаммадовичгу, цIасса муаьллим, директор, мунал душ, Данияллул кулпат Анисатгу. Ххуйну кIулссия мунал бутта­уссурвал: МухIаммад-Наби, Шяпи, Аьвдул-Вагьабгу. ЛяличIинува кIулссар мунал хъунама ссурахъу Аьвдуссалам, ттул бутIа къабавчIу уссу. Мунал кулпат Бариятгу, хъамал ххирасса, миннал хьхьичI ненттабакI тIивтIуну щябикIайсса.
Даниял цала шяраваллил пат­риот ушаврищал, къааьйкьин­ссара ва ВицIхъиял махIлалулгу, цинявппагу лакралгу патриот хъанахъиссар учирчангу. Ванан къакIулссагу, ва къакIулссагу лакрал илданий акъахьунссар цучIаввагу. Ванал ца ххарххи шяраву – учкъулданий духьурчангу, 2-мур ххарххигу дуссар кьатIух – щархъаву, районнай, респуб­ликалий хъанахъисса агьам­сса, жяматийсса давурттачIа. Данияллун личIи бакъар лак, ярусса ва цайми миллатирттал агьлу. Ва уссар цалва оьрчIащал, муаьллимтуращал яруссаннай Гъунивгу, даргиячIа Ахъушавгу, уссар Бархъа-ХъюллачIагу. Вайннайнгу оьвчайссар цала буттал шяравун. Ва шинал март­рал 20-нний Ккуллал райондалий Литературалул байрандалий бувсса ихтилат, мунин хасну «Илчилий» чирчусса назмугу гьарнан асар хьунни. Мунияр махъ, хъунна чIун къаларгун, Республикалул хъунама Рамазан АьвдуллатIиповлул учIан увну МахIачкъалаливгу, цалла канива ххуйсса бахшишгу дуллуну, барчаллагьгу увкунни.
Ва ччяния шихунайва Кьу­биячIа шяравачушиврий уссар, учкъулданийсса оьрчIачIа учи­тель куна, муаьллимтурал кюр­ттаравугу — уртакьну. Даниял шяраваллил агьулданун, директорну акъассагу, шаэрнугу, чичунугу кIулссар, кIулссар хIакьсса, тIайласса инсанну, инсаннаву дикIан аьркинсса ххуй-ххуйсса хасиятирттайну.
КIиягу ссурахъу – Аьвдуссалам ва Даниял муданма гьуртту шайссар Кьубиял жяматрал иширттаву. КIулссар шяраваллил багьу-бизугу, оьмур ва хъинмургу. ХхуймуничIагу бу­ссар лагма лавгун, ххаришиву кIидачIлай, захIматмуничIагу буссар чIарав, дакI хьунмур буллай. Жан цIуллу даннав цал тIий ура.
Оьмахан,
ш. Кьуби