МахIачкъалалив Поэзиялул театрдануву хьунни Лакрал классиктурал ва ттизаманнул шаэртурал шеърирдал мажлис. Муний гьуртту хьунни лакрал шаэртал, жуява лавгсса шаэртурал гъан-маччами, республикалул магьирлугърал аралуву зузисса зузалт. Му хIадур бувну бия Лакрал театрданул коллективрал Поэзиялул театрданущал цачIуну.
Зулайхат Тахакьаева
Бачин бувну ия мажлис Дагъусттаннал магьирлугърал лайкь хьусса зузала Супиян Оьмаров.
Лакрал шаэртурал назмурду дурккуна Дагъусттаннал Халкьуннал артистка Жинасат ДинмахIаммадовал, Дагъусттаннал Халкьуннал артист Аслан МахIаммадовлул, Дагъусттаннал лайкь хьусса артист Шамсуттин Къаплановлул, Адам ХIайдаевлул, Аьбдул Мурадовлул, Ислам МахIаммадовлул, Рукьижат МахIаммадовал, Ибрагьим Мусиевлул.
Балайрду увкуна: Дагъусттаннал Халкьуннал артистка Луиза Шагьдиловал; Дагъусттаннал лайкь хьусса артистал Саният Рамазановал, ХIажиаьли ХIажиаьлиевлул, Халисат Батырбековал, Шамсуттин Къаплановлул; Аьбдул Мурадовлул, Ямлихан ХIажиевлул.
Цалла назмурду дурккуна Дагъусттаннал халкьуннал шаэртал Ссугъури Увайсовлул ва Мирза Давыдовлул; Чичултрал союзрал лакрал секциялул хъунама Илияс МахIаммадовлул (ванал балайрдугу увкуна); шаэр Булбул Оьмариевал; цал цIарду шаэрталшиврий машгьурну дакъахьурчагу, шеъри чичаврил гьунар бусса Алексей ХIажиевлул, Камил АхIмадовлул. Лакрал шаэртурал назмурду дурккуна Гулинжан Кьурбановал.
Ахирданий Поэзиялул театрданул хъунмур Елена Гьаруновал бувсуна театр тIивтIуну ккалли дансса чIун гьан дурашиву ва Лакрал поэзиялул мажлисгу ва театрдануву цалчинсса мажлис хъанахъишиву. Барчаллагь увкуна Лакрал театрданул каялувчитурахьгу, актертурахьгу.
Ниттил маз бухлаглагаврия миллатран хъуннасса нигьачIаву чIалай, бунияла мунил буруккинттарайсса инсантуран гьаксса ччиссия ва мероприятиялий ДГУ-рал ва ДГПУ-рал лакрал отделениялул студентътал ва школарттал дуклаки оьрчIругу гьурттуну, минналгу шеърирду бувккуну. Цала тIийкун, Поэзиялул театрданул буллалисса цалчинсса мажлис бухьувкун, бакIрай къабавцIухьунссар. Умуд бур гихуннайсса мероприятияртту жулла жагьилсса никгу гьурттуну хIадур даванссар тIисса.
