«ЧIимучIали»
Хьхьу ккуркки лавгсса зурулу биялдаралун дагьну дия. КьатIув чIукIа-чIитI чанну бия. Так Хъуннеххавун марч бувхсса ххурххуяв ягу къурух бакIлавай нанисса машиналул чIуяв баллай бия.

— Ттаттай, — увкуна Загьидинал, колхозрал складирттан къаралданий авцIусса ниттил ппу ВаличIан увкIун, — дада чуврияр?
— Дада?
— Угьу.
— ТтарацIув.
— Хьхьурай? – махIаттал хьуна оьрчI.
— Ина ва чIумал кьатIух циван занай ура? Нанула шиккун, щяикIу ттул чIарав. Ина инавалу нигьа услайвагу акъассияв? Ява нигьа маусаванна. Утти ина хъунасса хьуссара. Мукьулчинмур классравун увхссара.
— На вичIан увкIссияв… Циваннияр хьхьурай ларгсса? – хъювсулгу уклай, цIувххуна оьрчIал.
— Нания вихь буслай ура, ччар дан ларгунни. Вин кIуллив жучIара цукунсса даву дурссарив? Гьа, муна къакIулну. Бусаннача, щяикIу. Жулла колхозрал дукIу гъили суннил чIарату сундарах шихуннай канал дур­ккун, кьакъурув щин дирхьуну, гьашину хъу мукун дюрхъуннихха, ттуккух кIира данссар. Ччарду дуну хьхьичI къуртал хьун, бригадартту, звенорду мукун бясттирахун багьну бурхха, огьо-гьо! Мунихлуну нинугу зун ларгунни. НакIну бивтун барз буна, щища бюхъайссар утту ивхьуну шанан? ЧIалай бурив цукунсса чани бурив? Чирахъру бакъанма зун бюхъанссар. Ина чансса хIаллай шикку щяикIу, на ва цIана…, — Вали ивзун, аьрччагу тIий, хIаятравух лагмавагу увккун, складирттах урувгуна.
— Вана укунни, ххирама, ишру бусса, — цала буслай ивкIмургу цIунил байбихьлай, Вали пIапIирус дахIлан ивкIуна.
— Яла? – ттаттал никирттай каругу дирхьуну, ссавур дакъа цIувххуна Загьидинал.
— Яла ци бикIави. ЧIярусса бакIлахъру дучIанссар, колхоз авадан хьунссар. Накь дукьрасса, ччатI парх бивкIсса бикIантIиссар, — назму дуклаки­сса куна, буслай ия Вали. – Ялагу на вихь ци бусави, ххирама. Ккунуккирттай аьнакIигу, кIачлий кIункIургу, кьуруву къалмул дарваггу, жалиндалул каний ятIул ляълу кунма бакьайссар. ЧчатIул кьадру кIул къабаннав улуча. Жухавар тIий чийха зий къалякъиннав улуча. Хъинсса чал ахьтта къааннав улуча.
— Ттаттай, цинявгу, цинявгу лавгссаривъяр ччарду дуллай?
— Цинявгу, на кунмасса къалан-къуланталгу, ина кунмасса оьрчIругу личIаннин. Сагъну бикIан бакъаяв, ттаттал, ттул ччан, ччар дуккайсса куц на ккаккан бавиявхха. Пайда бакъар. Вана укун уну тIий бакъарив на ва даврийн увтсса. Ттухь мазузрагума тIива. Зукъазий щяикIан шайссарив, му бур ччитул оьрму.
— Ттаттай, вил ччаннан цивхьуссарар?
Шикку Вали пикрирдавун агьуна. ЧIярусса шиннардил хьхьичI хьусса иш чан-чанну тIий дакIнийн багьлай бавчуна. Му дакIнийн багьавривугу кьурчIишивугу, ххаришивугу дия.
— Ттун хьумур чин къахьуннав, ттаттал, — увкуна ганал, — вин муксса ччай биявхьур, бусаннача, вичIидиша. ХIанапи вил гьалмахчу унуккар. Ганал ни­ттил ппу ивкIссар Оьма тIисса. Ганан ххирассия инсантал тяхъа буллан. Зумату тIайласса махъ къабуккайшиву цанма кIулну бунагу, махIатталсса иш бия, ганал бувсмунийн инсантал вих шайва. Ца кьини ахттакьунмай шяраву буцири оьрчIру оьллайн бувкIун, тIуркIу тIий бия. Гайннавух нагу уссияв. ЦIана инаксса ухьунссияв. Цуманалъяв лахъну увкунни:
— Явара жучIана Оьма най ур, — куну.
ОьрчIру ганал лагма лаглан бивкIунни, миннатру буллан бивкIунни цивппа хъяхъи ба, ци-бунугу буси тIий. Пиш-пиш тIий, хъяй ур. Га ия тIиртIусса лажин дусса, личIину лахъ акъасса, хъачIунттава уттасса, лухIисса иттацIантту ва ккурккисса хъуни яру бусса адамина.
— Ай, ттул ккиж дакъа мархрий, — увкунни ганал, — зува хъяхъи бан ччарча, зущала тIуркIу тIун ттуйнгу оьвкунияра. Ттуй чIири бурчала куну, на хъунасса ххай бурув, чIири кьяцлуйгу бикIайссар. ВичIи дишара ттунма ккавкмур бусаннача. ХIакьину лавгссияв ЛухIувусса жула гьанав, уртту лахъ хьуну дурив, чIиникI бищун хьун най бурив ххал бан. Агь, агь, агь, ттун ккавкмур зун ккавкссания! — чансса кIигу авхIуну, кIисригу ххялтIа буккан бувну, кIирагу ка хьхьичIуннай тIиртIуна. – ЦIанакул зу цаягу оьллай къабикIантIиссиявча, Барзул мачIай бикIантIиссияв. Вай кIивагу янин ххал хьунни хъуручI кунма лухIисса арулва цулкIлул оьрчI. Цавай эмаратру. ТIуркIурду бурив, цивппа бурив! Дугьан кьастгу лархIуссияхха, цакуну дакIнин багьунни щар­ссанил ттухьва нувцIулу ххиттул цIу дишин ччяни ухьхьу увкусса. ХIайп тIийна кьаритав. ЦIана зухь бакъа щихьчIавгу къабусав. Амма, амма, Макъихъал Къалла хьунаавкьуну, тагу зул дус урхха, ганахь бувсъссия, гьунттийва лавгун циняв дугьанна, хъунигу дурну, дарххуну, цанна ласапIитI ласунна тIий ия.
Дагьунни зув чурххавун. Цуксса хIалъя на ласапIитI ласи тIий, буттахун ахчуну, арцу дакъар тIий, ганалгу къаласлай. Ттухьва нава учав: «Валлагьи, гьунттийра циняв дугьанна», — куну. Шавайн увкIун, ниттихь бусав цулкIлул оьрчIал хавар.
— Щил тIива, арс? — цIувххунни ниттил.
— Оьма тIий ия, — учав.
Аьищун, айлитIун тIий, дяъван диркIунни Оьмахун. ОьрчIру иллагьирайн бичлачисса куц ххал ара тталаксса адаминал тIун диркIунни. Ттуйрагу дюъ дирхьунни, ява Оьмал оьрчIру хъяврин байссар, чунчIав ша маласара, куну. КIихIуллана най ура кIичIиравух. Къахьуна акьиннав Къалла. «Да, — учав, — чун най урар?» — куну. «Ттуна ччинин, вин къаччинин най ура», — увкунни. «Гьа, — учав ттухьва нава. — Барзул мачIув най ур. АцIу ина лагай, на лагай ххал баннача», — куну, ниттихьгу кьюнукьи бан най ушиву бувсун, цулкIлул оьрчIру дакьин дарваггу лавсун, левчура. Лух­ччай чIалачIиний чувчIав цучIав акъая, так тия чулийсса хъачIрай дарцIуну, щарнил оьллал газу дия. Ччянива бувсса ххалая бувсса ххалабакIурдугу, къаралчитал кунма, микку-тикку бавцIуну бия. ЦулкIлул оьрчIру ххикъаен, ттунма ххирасса щютIгума тIий акъара. Арулуннияту ца махь дурну, ттунна ритан най ура, махъми дарххуну, ласапIитI ласун.
Барзул мачI цумурдив ттун ххуйну кIулссия, цанчирча кIанил ялтту мудан барзу гьава буллай бикIайва. Амма га тачIав ххартI къабайшиву, кIикку инсаннал ша къабизайшиву къакIулссия. Вана ва авлул кьяца куна лавхъра мачIув. Къюллурал ва урттул ккуру бивхьуну бия, тийх-шийх лахъсса ххяллу дия. Гьа тинай, гьа шинай – чучIав цичIав дакъар. Вагь, чун дур­ххун дурвав цулкIлул оьрчIру? Цухъ ххал дан аьркинни. Щала мачIух увккун махъ мяйжаннугу цухъ ляркъуна, гивагу цирив лихъайсса хIисав хьуна. Агьа, учав ттухьва, вайннахха дуну. Ххявхра хъирив – бюрххул оьрчI. Гарагу дугьан, хъирив лаян чунни, авчунна ччех ивкIун. Хъап-шап тIий ура урттуйн, кIунттиву руцлай дур. Ахиргу ца жигурал къатIуйн хъап учин бювхъуна. Га ххяллул зуманив бия. Зурзу тIун бивкIунни чурх. Къашай лавай лахъан. Лувгу къаттаксса лахъсса мурлу. ОьвтIий ура, вев тIий ура – баян бан бюхълай бакъар оьллал хIухчийн. ХIисав хъанан бивкIунни нава чан-чанну тIий ялавай ччех икIлай ушиву. Ца талихI жигуракъатIул мархха цIакьсса, лахъисса бушиву – муруллул бачIиннин ияннин ганил айгьунна. Яла ца цIархгу увкунни, нагу гила ивщуну лавгунна…
Ххишала ттун цичIав къа­кIула. Щалла щар дурккун, ттух луглай диркIун дия. Лявкъунугу ияв цува гана га Оьман. — Ччан гъавгъун бивкIун бия, — куну кIурматIи хьусса ччан ттаттал ттул чулухунмай щукь учин бувна.
— Мунихлунур, ххирама, нитти-буттал увкумур бувну хъинсса. Ниттил тIутIимуних вичIи дирхьуну диркIссания, на сагъ-саламатсса адамина икIантIиссияв, — увкуна Вали-ттаттал, Загьидинал хъачIрай хъатгу дирхьуну. – Утти ина утту­ишин шавайн насу, чIал къархьуну нинугу дучIантIиссар.
Барз дяссурула баргълагай чулухунмай хъар хьуну бия. Валигу складирттал ялтту уклан лавгуна.
Парх бивкIсса, на бакъа цура тIисса, хъюртул мурхьирал чIапIив дахьа бишлашисса ухссавнил мурчал щурщурдайн бивчуна. Ссавруннай цIуртти пар-пар тIий бия, зуруя лагмавагу кIяласса, ххялларисса ттуруллив гьузуй дия.
Абакар Мудунов
«ЧIимучIали» хIадур бувссар П. Рамазановал