Декабрь зурул 14-нний халкь кьамул буллалисса кьини хьунни ДР-лул БакIчинал администрациялуву ва ХIукуматраву. Агьалинал чулухасса аьрзри кьамул буллай, миннах вичIи дирхьуну бия ДР-лул ХIукуматрал Председатель Аьбдуссамад ХIамидов, Республикалул БакIчинал администрациялул каялувчи Рамазан Аьлиев,
Республикалул ХIукуматрал Председательнал хъиривчутал ХIасан Идрисов, МахIаммад Исяев, Рамазан Жяъпаров, ва мукунма цаймигу. Агьалинаща суаллу булун бюхълай бия Республикалул ХIукуматрал сайтрайхчIин цана аьркинсса къуллугъчинахьхьун.

И. Саидова
Рамазан Аьлиевлул ххал бивгьунни халкь кьамул буллалисса кьини халкьуннал сукку бувсса цаппара масъалартту. Ва кьини гьаз буллалисса масъалартту гьарзасса ва личIи-личIисса бия. МахIачкъалалив ялапар хъанахъисса Калимат Айдамирова бия къашавайсса оьрчI хъин уван гьан увансса направление тIалав дуван кумаг бара тIий. Му бия цила чIивисса харжирацIух оьрчI хъин уван гьан къахъанай бушиву буслай.
Рамазан Аьлиевлул, Республикалул ЦIуллу-сагъшиву дуруччаврил министерствалийн гацIана оьвкуну, Калимат Айдамировал масъала дузал баву тапшур бунни.
Буйнакскалий ялапар хъана­хъисса жагьилсса пишакар бувкIунни медициналул сфералуву даву ля­къияра тIий миннатрай. Ванил ларайсса хIасиллащал къуртал бувну бур Дагъусттаннал медициналул академия ва интернатура. Рамазан Аьлиевлул ва масъала дузал баву тапшур бунни хасъсса медициналул идарарттайн.
Агьали кьамул буллалисса даврил лагрулуву ялун ливчунни налог­ру дулаврил сияхIрайн къалавхъсса ишбажаранчигу. Мунал махъ буллунни 2 гьантлул мутталий налогру дулаврил сияхIрайн лахъансса.
Исмяил ЭфендиевлучIан увкIунни Хъун дяъвилул шиннардий репрессировать увну ивкIсса АьлихIажи Къараев, реабилитировать увшиврул справка ласун къахъанай ушиву бусан.
— Нава «дяъвилул оьрчI» ушиврул статус ласунсса документру гьан бувссия республикалул МВД-лийн. Ми уттигу щилчIав ххал буван бувар. Ва масъалалул хIакъираву на икъавсса структура къаритав. Ттул мурад бувчIин, щаллу бан ччисса цучIав къахьунаавкьунни, — тIий бувчIин буллай ия Къараев.
Эфендиевлул махъ буллунни Республикалул Виваллил ишир­ттал министерствалущал цачIуну ва масъала щаллу бансса.
Мукунма ва кьини Рамазан Жяъпаровлулгу кьамул бунни тамансса агьали. ВаначIан увкIун ия хьхьичIава МВД-луву зий ивкIсса Игорь Алистанов, цала арснан ихтияр дуруччай органнаву зунсса даву лякъин кумаг бара тIий.
«На цимилгу лавгра ихтияр дуруччай органнавун даврийн уххан ччисса арснан кIану бара тIий миннатрай. Ттул арснан дур 30 шин, ванал бур 2 диплом. Цикссагу шиннур, кIантту бакъар тIий, документ­рувагу кьамул къабуллай», — тIий буруккинттарай ур Алистанов. Рамазан Жяъпаровлул махъ буллунни, хъирив лавну, кумаг бансса.
Аьвдуссамад ХIамидовлул ва ХIасан Идрисовлул кьамул бунни аьрщарал ва къатта-къушлил масъалартту бусса агьали.
МахIачкъалалиясса Карина Иванова бия ялапар хъанахъисса шартIру къулай дан кумаг тIалав буллай. 2003 шиная шихунмай вайннал кулпат лахъан бувну бур дух хьусса ва лекьавайсса къатрава агьали бизан буллалисса цIакусса программалул сияхIрайн. ХIасан Идрисовлул бувчIин бунни ва программалул лагрулуву, цIуну дурсса къатравун чIал къавхьуну вайннал кулпатгу бизан бувантIишиву.