МахIачкъалаливсса Этникалул культуралул музейраву чIа-чIаннин шайссар хъинну хIазсса ва дакIний личIансса выставкарду. Ва ххуллухгу музейраву тIиртIунни «Куклоград» тIисса ссихьрал выставка. Тамашалун дирхьуну дия, художниктурал канилусса яннардая, бурчуя, чагъардая, ппалул ххаллая, тIаннуя, пенопластрая, муххардия дурсса 24 ссихьу.
Залму АьбдурахIманова
Выставкалул куратор ва автор Мадина Труновал бусаврийну, ва выставка дурну дур ЦIусса шинал байрандалул хьунийн. ЦIусса шинал байран дур, хьхьичIра-хьхьичI, оьрчIал байран, ссихьри тIурча, хъанай дур оьрчIшивруцIун дархIусса цалчинсса лишан.
— ЦIусса шинал байрандалий яла бусравсса бахшишну шай ссихьри. Ссихьрал выставка жучIа хьхьичIмур шиналгу хьуссия. Умудрай буру шиккун увкIсса гьарма жул выставкалул гьурттучитурал давурттая рязийну личIаншиврийн, — увкунни Мадина Труновал.
Мяйжаннугу, авторнал къаучирчагу, выставкалий дия хъинну хIазсса, усттарну дурсса ссихьри. Ттунна яла дакIнил ларсмур ссихьу ци дия учирча, кIицI бавияв ми цагу-кIирагу дакъая куну. Амма яла тIааьнми асарду чантI учин бувмур дия, хIакьину жулва шагьрулул кIичIирттаву ххал къашайсса, ссимичкалул дарваггу чIарав бивхьуну, ми бахлахисса танисса къарил ссихьу куну. Дияхха ца хIазсса даву. Бахлахисса ссимичкалул дарваграчIа бивхьусса машгьурсса чичултрал ва шаэртурал луттирдалгу ссихьу лапра хIаз дизан дуллай дия. ХIакьинусса жагьилтуран бюхъай ва ссихьул мяъна-мурад дукъарчIин, ттулмур никиран ва ттуяр хъуниминнан тIурча къари-бавал ссихьул яла тIааьнми асарду чантI учин бантIишиврийн щак бакъар.
Этноцентрданул арт-директор ПатIимат ХIусайновал бусаврийну, выставка гьар шинах дуллансса нанижат дусса дур вайннал.
-Умудрай буру выставкалул тамашачитурал ккуран гьарта-гьарза дуван. Ва ххариру Дарбантлив цIуну тIивтIусса Дунияллул диннал музейравун жуйнма оьвчаврия. Мукунма жу хъинну ххари хьуру цаппара кьатIаллил билаятирттаясса коллекционертурал жул ссихьрах дурсса къулагъасраягу. Ялугьлай буру миннахгу, хъамалу бан, — увкунни ванил.
Выставкалия махъ, сакиншинначитурал бусаврийну, вай ссихьри чирилун дувансса давурттан мюнпатран машан ласун ччинан даххан тIий бусса бур. Шиккун бувкIсса тамашачитуравух чансса бакъая мюрщулт, амма минияргу, ссихьрая яла хIаз ласласими миннал нину-ппу бухьунссия. Цанчирча ссихьрал ялтту буклай, суратру ришлай, кутIасса мутталий ухьурчагу, жулла-жулла оьрчIшиврувун зана хьун гъира бусса буну тIий жува цинявппагу.
Выставка этноцентрданий дикIантIиссар ва зурул ахирданийннин.
