ХIАБИБУЛЛАГЬЛУЛ ДУШ
МУДАРИСОВА БАГУН
Ноябрь зурул дайдихьулий аьпалул хьунни Ккуллал шяравасса Мударисова Багун. Багун бувну бур 1916-ку ши­­нал Ккуллал шяраву хъинну хIурмат лавайсса Ттарагъай­хъал ХIабибуллагьлул ва 2-мур ЦIувкIратусса Шавлухълул кул­патраву. Оьрмулул чIивину бу­на заманалуха лархьхьусса захIмат­шивурттугу ккарккун, ятинну лив­чIун бур 4 шинаву.

Кулпат бувну бур Мударисов Ризваннущал. Ласгу дяъвилия зана къавхьуну, ванил лайкьну хъуни бувну бур шанма ятин, кулпатир­ттал щаллу бувну, оьрчIал оьрчIру хъуни бувангу хъунмасса ка-кумаг бувну бур.
Багун Ккуллал шяраваллил колхозраву, больницалий дукра дувуну, личIи-личIисса давурттай бусравну ва хIурматрай зий бивкIссар чIярусса шиннардий.
Ххаллилсса хъамитайпа, цIи­мисса нину, цинявппагу оьрчIал оьрчIан ххирасса Багун-баба аьпалул шаврил кьурчIишиву кIидачIлай, жижара буллай буру арснахь, душваврахь, оьрчIал оьрчIахь, махъсса гъан-маччаминнахь.
Махъ ливчIминнахьхьун цIул­лушиву дулуннав, оьрмулий барачат бишиннав. Ванияр чIивину дунияллия гьансса къабукканнав щинчIав.
Лавгунни жула Багун-баба, аьпа баннав цил, рухI хъинний дишиннав!
Амин!
Ккуллал ва 2-мур ЦIувкIуллал жямат

——————————

МАХIАММАДЛУЛ АРС КЬУРБАН­МАХIАММАДОВ АРСЕН
Ноябрь зурул 24-нний, хар-хавар бакъа, оьрмулул 51 шинаву аьпалу­хьхьун лавгунни Каспийск шагьрулий увсса, ЧIятусса МахIаммадлул ва 1-мур ЦIувкIратусса Маяхалуннул арс КьурбанмахIаммадов Арсен. Каспийскалий ххуйну 8 классгу къуртал бувну, увххун ур дуклан МахIачкъалалив Рыбный техникумравун.
Га къуртал бувну махъ зун увхссар «Даггражданводстройрайн» бухгалтерну, зий унува къуртал бувну бур университет. Грамотнайсса специалист хIисаврай тIалав увну, зун ивкIун ур Шамхаллайсса железобетондалул изделиярттал заводрай хъунама бухгалтерну.
1995-ку шиннардий (перестройкалул чIумал) заводру лакьлакьини Къизилюртрай тIивтIуну бур Арсеннул мува железобетонный изделия дайсса цалва кооператив. Гания мукьах, цала оьрмулул ахир хьуннин, тиккува зий уссия. Арсен ия яхI бусса, хъинну цалла даву кIулсса, инсантуращал хIал бавкьу­сса, чIивинащалгу, хъунанащалгу маз лякъайсса, сахаватсса дакIнил заллу. Къизилюртлив буллалисса оьрчIал садран, спортклубран, школардан, мизитран кумаг байва, мукунма чIявусса миски-гъаривгу, ванал дакI хъиншиву кIулну, кумаг ба тIий бучIайва, цучIав ванал махъунайгу гьан къаайва кумаг къабувну.
Цибанссар, бивкIулун чаран бакъа­ссар учай. Ва чIун дакъасса бивкIулул кьурчIишиву кIидачIлай, жижара буллай буру кулпатрахь Аминатлухь, арс Шамиллухь, душнихь Заирахь, уссурваврахь Сулайманнухь ва АхIмадлухь, ссихь Индирахь, гъан-маччанахь цинявнна­хьвагу. Цал гьав нурданул дуцIиннав, рухI хъинний дишиннав, алжаннул ххари аннав. Махънал оьрмурдай барачат бишиннав.
Ванал дард духIансса ссавур зухьхьун Аллагьнал дулуннав.
1-мур ЦIувкIуллал
ва ЧIяйннал жямат

——————————-

АБАКАРДУЛ ДУШ ЩАМХАЛОВА АЬИШАТ
Тамансса хIаллай къашавай аьзаврайгу бивкIун, ахиратравун лавгунни ххаллилсса хъамитайпа, нину, уздансса дакIнил заллу, Ккуллал шяравасса Щамхалова Аьишат Абакардул душ.
Аьишат бия хъинну маччанах ччаву дусса, иш багьсса кIанай чIарав бацIайсса, бавкьусса, ххуйсса хасиятрал инсан.
Ласнащал, аьпа биву Аьлиллущал, Аьишатлул хъуни бувну, захIмат ххирану тарбиягу бувну, халкьуннавун буккан бунни 3 арс ва 5 душ.
Аьишатлулгу, Аьлиллулгу, вайннал оьрчIалгу захIмат бивхьуссар щаллагу хIукуматрайх цIа машгьур хьусса Ккуллал, Гьарун Саэдовлул цIанийсса колхоз – миллионер хьхьичIуннай дуллай.
Аьишат бия хъинну уссур-ссуннавух, гъан-маччанавух хIала бувхсса инсан. Ванил ссурваврал оьрчIал Аьи-бабай учайва ванийн.
Аьишат дунияллия лагаврил кьурчIишиву кIидачIлай, жижара буллай буру ванил арсурваврахь, душваврахь Асиятлухь, Къиргъухь,Оксанахь, Зояхь, Жавгьаратлухь,ванил ссурваврахь СалихIатлухь, Уммугьанихь, Кумсиятлухь, Шуъбанатлухь, Нурижатлухь, Камилатлухь, уссихь Кьадирдухь.
Аьишатлул дунияллий був­сса захIматрал кьимат Аллагьнал бищуннав, МухIаммад-идавсил умматравух алжаннавун наниминнавух бишиннав, гьав нурданул дуцIиннав.
Баширдул душру:
Светлана, Нарисат,
Наида, Саният

———————————

ЖАМАЛУТТИННУЛ АРС МАХIАММАДОВ СИРАЖУТТИН
Декабрьданул 3-нний хар-хавар бакъа аьпалухьхьун лавгунни щала цалва оьрму чин эбратранну бувтсса, гьарцагу чулуха авкьусса, учIисса, ххуй­сса инсан Жамалуттиннул арс МахIаммадов Сиражуттин.
Увну ур Сиражуттин 1940 шинал МахIачкъалалив ХьурукI­ратусса ссяткар Жамалуттиннул кулпатраву. Дагъусттаннал университет бувккуну махъ, лавгун ур Москавлив аспирантуралувун уххан. «Механизация сельского хозяйства» темалун хасъсса диссертация дурурччуну махъ, цаппара шиннардий ивкIун ур ВАСХНИЛ институтраву хъунама элмийсса зузалану. Яла зун ивкIун ур Аьрасатнал Федерациялул шяраваллил хозяйствалул министерствалуву. 1994 шиная шинай зий уссия АьФ-лул Федерал Собраниялул Федерациялул советраву, ДР-лул Госсоветрал Председатель М.М. МахIаммадовлул кумагчину. Ва даврий зий уссаксса Сиражуттиннул чялишсса гьурттушинна дайссия республикалул лагрулий дуллалисса давурттаву, мунийну лайкь хьуссар респуб­ликалул агьалинал чулухасса хIурматрангу.
Сиражуттин (дустурал, кIул­нал ванайн Серго учайссия) дакIний личIантIиссар виричусса, хъинну порядочнайсса, дакI марцIсса, иш багьний инсаннал чIарав ацIан хIадурсса, лагма-ялттунащал хIал бавкьусса инсанну. Мунищала архIал Сиражуттин ия оьрчIаха аякьалийсса ппугу, кулпатрал ххуйсса ласгу, дусгу.
Сиражуттин аьпалул шаврил хъуннасса кьурчIишиву кIидачIлай, жижара буллай буру ванал кулпатрахь, оьрчIахь, уссур­ваврахь, ссурваврахь, гъан-маччанахь цинявннахьвагу.
Цал гьав нурданул дуцIиннав, алжаннул ххари аннав. Махънал оьр­мурдай барачат бишиннав. Амин.
ХьурукIуллал жямат

————————————

МАХIАММАДАЛ ДУШ РАМАЗАНОВА ТАИЗАТ
Ноябрь зурул 20-нний, рахIму бакъасса азардануща ххассал бан къавхьуну, аьпалул хьунни ххаллилсса хъамитайпа, инсаншиврул, яхI-намусрал хъунма­сса бутIа Аллагьнал буллусса, ЧIятусса хъунмасса тухумраясса Мамараев МахIаммадал ва ПатIиматлул душ Таизат.
Таизат бувну бур 1938 шинал Буйнакск шагьрулий. 1945 шинал дуклан бувххун бур Буйнакскаллал дянивмур даражалул школалийн, вагу къуртал бувну, пиша лахьхьин профтехучилищагу къуртал бувну, зун бувххун бур усру дай фабрикалийн кройщикнал пишалий. Микку Таизатлул ларсун дур чIярусса бахшишру, хIурматрал грамотартту, ванил сурат диркIун дур шагьрулул ХIурматрал улттуй.
1961 шинал Таизатлун нясив хьуну ур цилла дакIнил лавсъсса, цилла хасиятран ва тIабиаьтран лавхьхьу­сса маччачу, цалва хIарачатрай дуккавугу дурну, ххаллилсса пишагу лав­хьхьуну Бакуй зузисса Рамазанов Аслан (Хъунмахъал) ЧIятусса. Ца шинал мутталий азирбижан мазгу лавхьхьуну, ххишала бакъа хIал бавкьусса, лажиндарава пиш чан къашайсса, дусшиву дан кIулсса Таизат зун бувххун бур оьрчIал садикрайн тарбиячину.
Таизат бия хасиятрал бавкьу­сса зунттал душ, ласнал ляхъиндалунгу, ЧIяйннал жяматрангу хъинну бусравсса, бакъа чара бакъасса хъамитайпа. Бакуя зана хьуми буслан бикIайва ванил хъамал кьамул баврия, байсса хIурматрая, дакIнил хъиншиврия, ичIува кушу-кьютIу баврия.
Асланнул ва Таизатлул хъунигу бувну, лайкьсса кIулшивурттугу ласун бувну, къатрал бунни кIия арс Рамазан ва Мурад.
2005 шинал Бакуяту, МахIач­къалалив къатри ларсун, зана бивкIуна буттахъал миналий оьр­му бутлан. ЧIивима арс Мурад, буттал пишагу ххуйну лавхьхьуну (мастер холодильного оборудования), кулпатращал яхъанай ур Бакуйва.
Хъунмасса захIмат бивхьуна ласнал, арсурваврал цала хъинну ххирасса нину ччаннай дацIан дан, мунил оьрмулул гьантри лахъи бан. Цибанссар, ажалуннин мажал бакъассар учай халкьуннал. Аллагьнал ванин буллусса гьант­ри къуртал хьуну бухьунссия.
Таизатлул ва Асланнул кувн­нан кув ххирану 54 шинал оьр­му бувтунни дакI мяш хьунну, цайминнан эбратранну.
Таизатлул кьурчIисса бивкIу­лул къумашиву кIидачIлай, жижара буллай буру ласнахь Асланнухь, арсурваврахь Рамазаннухь, Мурадлухь, арсурваврал кулпатирттахь Светланахь, Наидахь, ласнауссихь Сажидлухь, хIаласалтрахь Гьаруннухь ва Гуржигьаннухь, махъсса ссура­хъаврахь, хъинирваврахь, агьлу-авладрахь.
Таизатлун къабуллусса оьр­мулул бутIа мунин ххирану бивкIминнан булуннав.
Таизат алжаннул ххари баннав, гьав нурданул дуцIиннав. Амин!
ЧIяйннал жяматрал цIания АьвдурахIманов ТIалхIат