Му бия Дагъусттаннал поэзия ххуйну кIулминнан ххуйну кIулсса, пасихIсса мукъул кьадру кIулсса Аьрасатнал лайкь хьусса артист, Дагъусттаннал халкьуннал артист Фаина Графченкол ученица.

«Жун тIайлабацIу хьуссар Фаина Федоровнайн тIайлабацIаву, му буниялттунгу цилла даву хъинну кIулсса профессионал бур,
46 шин хьуну дур мунил шаэртурал шеърирду сахIналий ккалай, миннул цIу-цIанпир буккултран асар хьунмур буллай. Шуаьнатлун хъинну ххирая шеърирду ккалан, Фаина Федоровнал мунил гьунарданий я бавцIуну, зун бивкIуна мунищал. Шуаьнатлул цимилагу бувккуссар шеърирду личIи-личIисса мероприятиярттай, школалунгу мудан муния пахру бикIайва, гьар кIанайн шеъри буккингу Шуаьнат гьан бувайва», — тIий бур нину БатIи. Машгьурсса чичу ва литературовед Миясат Муслимовал «Литературный ковчег» телеперадачалийгу гьуртту хьуссия Шуаьнат Оьмарова. Гьашину БатIи ва Шуаьнат Москавлив бивзссия. БатIин Москавлив МГУ-луву марцIну ххювардай дуклакисса арснал Тахил чIарав ччай бия. Шуаьнкагу Москавуллал № 2065 школалий 9-мур классраву дуклай буссар. Му школалий дуклай ца барз хьуннинма Москавливгу Шуаьнатлул цивувасса гьунар ашкара бунни: Москавуллал буккултрал конкурсрай ххув хьунни. Цаймигу мероприятиярттай хьхьичIунсса кIанттурду бувгьунни Шуаьнатлул. Москавлив хьусса «КIяла кьурукьирттал» байрандалий лайкь хьунни Аьрасатнал Президентнал Дагъусттаннал полпреднал цIаниятусса Барчаллагьрал чагъарданун. Му мероприятиялий Шуаьнатлул шеърирду ккалаккаврил хIайран бувсса тамашачитал лавай бивзун, бавцIунува вичIи дирхьуну бия мунил шеърирдах тIий бур байрандалий гьуртту хьуми. Дагъусттаннал жагьилтурал гьунарду чIявушиврий цIа дуккан дувавриву биялсса бутIа уттиния тинмайгу бишинтIиссар ххаллилсса нитти-буттал душнил Оьмарова Шуаьнатлул. ТIайлабацIу баннав дуккавривугу, гьар иширавугу.