Владимир Путиннул декабрьданул 3-нний дурккунни АьФ-лул Федерал Собраниялийнсса Рисала. Кремлилул Георгийл цIанийсса залданувун бавтIун бия 1000-яр ххишаласса оьвкуми.
Рисалалух вичIи дишин оьвкуну бия Федерациялул Советрал члентурайн, ПаччахIлугърал Думалул депутатътурайн, ХIукуматрал члентурайн, Конституциялул ва Верховный судирттал каялувчитурайн, губернатортурайн, Федерациялул субъектирдал законодательный собраниярттал председательтурайн, традициялул конфессиярттал бакIчитурайн, жяматийсса ишккаккултрайн, миннавух регионнал жяматийсса палатарттал бакIчитурайн, СМИ-рдал каялувчитурайн.
Рисалалул бакIрай В. Путиннул барчаллагьрал махъру увкунни дунияллул халкьуннал террористуращал талатисса Аьрасатнал аьралийтурахь.
— ХIакьину шикку, Георгиевский залдануву, бур аьралий летчиктал, Ярагъбу гужирдал вакилтал – Сириянаву террористурайн къаршисса операциялул гьурттучитал. ЖучIанма бувкIун бур Гелена Юрьевна Пешкова ва Ирина Владимировна Позинич, вай цалва ласурваврацIа хьуссар, террористуращал талай бивкIсса. Зуйнгу, жулва вирттаврал нитти-буттахъайнгу икрам буллалиссару.
Аьрасат ччянива бур террорис­туращал­сса талатаврил хьхьичIмур дазуй. Му дур тархъаншиврухлусса, тIайлашиврухлусса ва хIакьмунихлусса талатаву. Инсантурал оьрмурдахлусса ва щалла цивилизациялул ялун бучIан­тIимунихлусса талатаву.
Жунма кIулли дунияллул халкьуннал террорданул агрессия цирив. Аьрасатнан му кIул хьуссар 90-ку шиннардил дязаннив, жулва билаятрангу, мунил инсантурангу бухIан багьссар оьхIалсса террористурал гьужумру. Жунма дакIнийссар Буденновскалий, Бесланнай, Москавлив ширишилун жулва инсантал бугьаву, рахIму бакъа инсантурал къатри пIякь учин давуртту, «Невский экспресс» поезд ппив-ххив баву, Москавлив метролуву ва «Домодедово» аэропортрай терактру давуртту.
Вай бала-апатIсса иширттайну азарахъул инсантал ливтIуссар. Му дард-хажалат муданна жущалла, билаятращал, бунагь бакъа ливтIуминнал гъан-маччанащал дуссар.
Сайки 10 шин хьунни бандитътурал мина-гьану ххит дуккан дуллай. Жува иширайну дардагъил бувссар бандитътал, террористал Аьрасатнавату, амма ттигу-шилагу талайнма буру бандподпольелул личIу-ххичIултращал. Му оьхIалшиврул ттигу-шилагу жува паракьатну битлай бакъару.
Ца билаятращал дунияллул террористураяр ххув хьун къашайссар, хаснува дунияллий дазурду иширайну тIиртIуннасса тагьардануву. Мура чIумал дунияллий халкьру уттигу куч хъанай бур цавай билаятирттая цайминнуйнгу, террористуран арцуйнусса кумагругу хъанай бур мичча-тичча.
Террористураясса нигьачIаву ялу-ялун гьарза хъанай дур. Уттигу щаллу бувну бакъар Авгъанисттаннал проблема. Га билаятрайсса тагьарданул ццахханну рутлай дур. Уттигъаннугума кьянкьану цалий дарцIуну диркIсса Гъанмур Востокрал ва Ухссавнил Африканал паччахIлугъру – Ирак, Ливия, Сирия – вайварттал (хаосрал) ва анархиялул зоналийн кIурадарну дур, мичча щалла дунияллун нигьачIавугу най дур.
(Хъиривгу буссар).
ХIадур бувссар ХI. Аьдиловлул