Ларгсса нюжмардул ахирданий МахIачкъалалив, «Лайли» банкетру бай залдануву, хьунни лакрал хъаннил «Дараччи» клубрал батIаву, уттинин хъанай диркIсса чIярусса цайминнуха къалархьхьусса – ва кьини цалва миллат, миллатрал культура ххирасса, миллатрал цIаний хъин-хъинсса давуртту дуллалисса хъаннил кьюкьлуву ххи хьунни жагьилсса гужру. «Дараччи» клубравун кьамул бунни личIи-личIисса пишардал, касму-сянатирттал заллухърусса жагьилсса хъами.
Бадрижамал Аьлиева
БатIаву дайдирхьунни «Дараччи» клубрал президент Мариян Илиясовал.
— Ванияр 17 шинал хьхьичI жу цалчинма цалчин вава куццуй бавтIссияв, «Дараччи» клуб сакин буллай, шивун зунми батIлай. Вай шиннардил дянив хьунни чIярусса дахханашивуртту, мадарасса инсантал ти-шинмай хьунни, цIуллу-сагъшиврул хIал баххана хьуну, оьрчIал оьрчIру хьуну, цалвами къайгъурду чIяву хьуну ва цаймигу багьана-сававртту хьуну. Шиннардищал архIал, гужгу, кьуватгу баххана хъанай, бувчIлай бия ккуран жагьил дувансса чIун дуркIун душиву. Амма ва багьана, та савав хъанай, му даву щаллу дувансса чIун хъанай дакъая уттинин, — увкунни Мариян ЧIибиевнал.
Гихунмай кутIану бувсунни клубрал уттинин дурсса давурттая, вания тиннай дуван дакIниймуния, миллатрал театрданул, кказитрал, учительтурал, чичултрал, хьхьичIунну дуклакисса жагьилтурал ва цайминналгу чIарав бацIан аьркиншиву, ниттил маз буруччавриву, лахьхьавриву ишла буллансса цIу-цIусса луттирду итабакьин аьркиншиву ванияр тинмайгу.
— Вай цимурца дулланшивруллив, аьркинну бур цIусса гужру. Мунияту пикри хьунни, жулва-жулва душварая, арснал хъанния байбивхьуну, махъа нанисса жагьилталгу хIала буван вай давурттавух. Щаллу бувансса масъаларттурив хъинну чIявур, — увкунни Мариян ЧIибиевнал.
Хъирив махъ лавхъунни Гулизар Султановал:
— Ккурандалул даву дацIан къадуван, цIубуккан буван ва клуб, жу байбивхьуру жулва гъан-маччаминная, яла миннал дустал, кIулми чан-чанну тIий кIункIу хьуну, кьюкьри хъиннура хъуни хьуншиврий дакI дарцIуну. Умуд бур зу, жагьилми, жуяр ххуйну, жуяр лавайну зунссар тIисса. Хъинну захIматсса чIумал жу сакин дурсса ккурандалул даву дяличIан къадиртун, зул жагьилсса гъирарал, аргъирал ва кьуватрал кIунттихьхьун ларсун, гихуннай багьайсса куццуй дачин дуванссар тIисса. Анавар буккияра миллатраву хъанахъисса хъин-хъинсса иширттал, дуллалисса давурттал чIарав бацIан.
— «Ва щалла инсаният ляхъан дурсса хъамитайпалун майдан бувгьусса халича щащан цир», — тIий бур лакрал ца магьлуву. Ттун вай махъру лакку хъамитайпалия увкусса махъруну чIалан бикIай. Цанчирча хьхьичIун ливчусса ПартIу-ПатIима так ца лакрал миллатрал буну тIий, хъунисса миллатиртталгума бакъасса. ЩилчIав бакъасса хъаннил клубгу лакрал миллатрал бур. Лакрал миллатрал хьхьичI хIакьину щаллу бувансса хъинну чIявусса масъалартту бур, танияргу хъинну цачIун хьун, циняв лагма лаган аьркинсса чIун дуркIун дур, хъинманал, ххуйманал, аьйкьлакьиманал чIарав бацIансса. Агана кулпат цачIу, бавкьуну, нахIуну бухьурча, ци-цигу давурттивгу дуван бюхъантIиссар, щищачIавгу къахьунтIиссар му ччалаччи буван, дянив махъ бутан, — увкунни Качар Абачараевнал.
Ххуйсса махъру ялагу лавхъунни Бадрижат МахIаммадхIажиевал, Мариян Чалабовал, Индира Мирзаевал, Гулшан Хасаевал, Тарият Къапиевал, гьаз бунни миллатрайн багьайсса чIявусса масъалартту.
ЦIуну «Дараччи» клубравун кьамул бувсса жагьилсса хъаннил, махъру лахълай, гьарцаннил бувсунни цая-цаява, чIурчIав дунни миллатрал цIаний захIмат, цащава шайсса кумаг буллан хIадурну бушиврий, цалва даврил гужгу, цалла кIулшивурттугу, опытгу ишла бувну, оьрмулул хъуниминнал маслихIатирттахгу вичIидирхьуну. Вай жагьилсса хъанниву бур личIи-личIисса пишардал усттартал: хIакинтал, педагогтал, судиятал, культуралул зузалт, ишбажаранчитал ва м.ц. Укун, ссутнил дяркъусса дарщусса кьини «Дараччи» клубравун бувххунни интнил гъилисса куклусса гьава. ЛичIи-личIисса гьунарду бусса, цалва жагьилсса оьрмурдай итталун дагьансса хьхьичIуннайшивуртту чIалачIи дурсса, аькьлулулгу, бакIралгу бювхъусса хъами цивппагу лашлай бия интнил яргсса кацIливусса авурсса тIутIаха.
Жагьилтурал гужгу, кьуватгу, оьрмулул хъуниминнал шиннардил аькьилшивугу, кIулшивурттугу цачIуну, «Дараччи» клубрал ва мунил дуллалисса давурттал сий вания тиннай хъиннура ларай хьуншиврийн цукунчIавсса щак бакъар. Цир дусса жагьилшиврул гуж ва оьрмулул аькьилшиву цачIуну дуван къашайсса!?
