ТачIав дакIния къадуккай интту-ссуттил чIумал чIивисса нава, ниттил ниттил кагу дургьуну, шярава аьрали бурж лахъан щарнил жагьилтал тIайла буккан нанисса чIунну. Шяравун нанисса хъунххуллуцI жагьилтурахь «Ххуллухъин!» учин ва арс армиялийн уцлацаврия, пахрулий бунугу, дакIурдиву якьама хъанахъисса нитти-буттахъал, ссурваврал дакIру дан батIайва уссурссу, щарнил чиваркI, хъами, оьрчIру.

Залму АьбдурахIманова
Вана вай гьантрайгу республикалий дайдирхьунни гьашинусса ссутнил призыв. Ноябрьданул 17-нний жулва аэропортрая, «Мы сыны Отчизны» тIисса цIанилу, 225 призывникнащалсса цалчин­сса спецборт левхссар. Вай циняв, Баргъбуккавал аьрали округрайсса, Алтайский крайрайн, Новосибирскалийн, Хабаровскалийн, Владивос­токрайн, Сахалиннайн ва цаймигу шагьрурдайн тIайла буккантIиссар Ватандалул хьхьичIсса цалва аьрали бурж лахъан.
Лахъисса ва захIматсса аьр­ххилийн тIайла буккан хьхьичI Да­гъусттаннал Солдатътурал ниттихъал комитетрай каялувшиву дуллалисса Зульфия МахIаммадовал хьхьичIмур кьи­­ни, Республикалул Аьрали комиссариатрачIасса призывной пунктрал столовойлуву тIивтIуну нахIу-нацIушивурттащалсса ссупрардугу, сакин дунни вай жагьилтуран дакIний личIансса, ххуй-ххуйсса ххуллухъиндарал ихтилатру бувсса, хъун дакъасса шадлугърал батIаву. БатIаву тIитIлай, ванил цIусса кIанай, цIусса шартIирдаву жулва оьрчIру цукун, ци зунтIиссарив, цукун къуццу тIун аьркиншинссарив буслай, тарбиялул ихтилат бунни.
— ХIакьину Аьрасатнал аьрали кьюкьраву бурж лахъан лайкь хьусса зун хъунмасса пахру бикIан аьркинссар зунма мукунсса иш нясив шаврия. Зу зулва аьрали бурж лахъан аьркинссар лайкьну, нитти-буттал цIа кьюкьин къадурну, шинал мутталий миннал дакIру гъагъан дансса иширахун къабагьну. Зун, циняв дурккусса, вузру къуртал бувсса жагьилтуран, бувчIин аьркинссар зува чун наниссарив. Зул бурж – дакI марцIну Ватандалул хьхьичIсса зула конституциялул бурж лахъавур, — увкунни З. МахIаммадовал.
Аьрали кьюкьраву дувайсса низамлиявурттая буслай, Зульфия Расуловнал кIицI лавгунни, Дагъусттанная бувцусса оьрчIру чIявумур чIумал цаярва чиндалул хъунаманайн мютIи къахъанай, хъунаманал бувсса амрурду щаллу къабуллай ва цивппа кунмасса аьралийтал нигьачIакIул буллай, минначIату арцу, телефонну зехлай бугьайшиву.
— ЧIа тIий бура, Ватандалул хьхьичIсса зулва буржгу лавхъун, дакIру ххарину зулва нитти-буттал, уссурссуннал ялун зана хьун, — тIисса мукъурттищал къуртал бунни Зульфия Расуловнал цилва ихтилат.
Шадлугърай гьуртту хьусса «За Россию» цIанилусса щалва Аьрасатнал халкьуннал фронтрал регионал штабрал вакил АьбдурахIман МахIаммадовлул призывниктуран чIа увкунни Дагъусттаннал цIа бюхттул данну аьрали буржгу лавхъун махъунмай занашаву.
— ЦIанасса чIумал федерал СМИ-рдаву чансса информация бакъар дагъусттанлувтурал, жулва жагьилтурал цIа оьккимур чулуха дакъа зумух къаласласисса. Къуллугърай зун хьунабакьинтIиссар, ттинин дагъусттанлувтал цалагу хьунакъабавкьусса, Камчаткалия­сса, Калининградраясса, Къиримнавасса ва цаймигу кIанттурдаясса жагьилтал. Зул бурж миннан зува яла лайкьми, яла жаваблувми, яла итххявхми, яла хьхьичIунми инсанталну ккаккан бан. Жулва Аьрасатнал, жула Дагъусттаннал цIаний бюхттулсса даражалий зуйвасса бурж лахъан, — увкунни ванал.
Жагьилтурахь ххуллухъиндарал махъ учин увкIсса Дагъусттаннал Жяматийсса палаталул вакил, Авгъаннал дяъвилул гьурттучи МахIаммад Идрисовлул увкунни: «ХIакьину нажагьссаннан бакъа бахтти къашайссар Аьрасатнал аьрали кьюкьравун багьан. Аьрали бурж лахъан ччисса сайки 40 азара инсаннава язи угьлай ур так 2, 5 азара призывник. Жу хIакьинусса кьини сайки циняр аьрали частирдащал дахIаву дуну буру, ва хъунмасса пахру багьай ми частирдал командиртурая жулва оьрчIаясса барчаллагьрал чагъарду шиная шинайн гьарза хъанахъаврия».
Хъирив, цинявннал цачIусса суратру рирщуну ва ххуллухъиндарал махъру лавхъун махъ, жагьилтурахьхьун ихтияр дуллунни ххуллийн букканнин гъилисса дукралийн бисмиллагь бан.
Зульфия МахIаммадовал бувсунни жулва оьрчIащал спецбортрай нанишиву Ухссавнил АьсатIиннавасса 30 призывникгу.
Лакрал ва Ккуллал районнал цачIусса Аьрали комиссариатрал хъунама ХIасан Масуевлул бусаврийну, гьашину ссуттил жулла районная уцин ккаккан увну усса ур 20 призывник, ттинин интту хьусса призыврай увцуну ур 15 жагьил. Призыв дайдирхьусса вай гьантрай увцуну ур 5 призывник, ва жу, республикалул СМИ-рдал журналистътал, гьуртту хьун ихтияр дуллусса шадлугърал хъиривмур кьинигу 4 призывник. Вания гихунайгу уцин личIлай усса ур 11 призывник.
ЧIа учин ччай бур жулва лакку оьрчIан, вайннан бакъа аьрали бурж лахъан нанисса цинявппагу жагьилтурангу, дакI марцIну цалва хьхьичI бивхьусса буржгу лавхъун, дакIру ххарину, чурхру цIуллуну нитти-буттал, уссурссуннал ялун зана шаву. Ххуллухъин баннав зун!