Уттигъанну Нураттин Юсуповлул цIанийсса Республикалул оьрчIал библиотекалуву хьунни халкьуннал чичу, халкьуннал шаэр Ссугъури Увайсовлун 80 шин шаврин хас дурсса шадлугъ, «Ххирасса шаэрнал ххаллилсса юбилей» цIанилу. Ва даврил сиптачи ва сакиншинначи бия ва библиотекалул миллатрал литературалул хъунмур Ххадижат Агъаева. Ваниннин Ххадижат КьурбанмахIаммадовнал дуллалисса цайми-цайми давурттив кунна, ва ххуллухмургу хьунни ххуйсса даражалий, чIявусса инсантурал гьурттушиннарайну.
Бадрижамал Аьлиева
Ва кьинисса хъамаллуравух бия профессор, филологиялул элмурдал доктор, ДР-лул элмулул лайкь хьусса ишккакку Сулайман АхIмадов, шаэр, публицист Космина Исрапилова, ДР-лул ва АьФ-лул искусствалул лайкь хьусса ишккакку, композитор Мазагьиб Шарипов, ДР-лул ва АьФ-лул просвещениялул отличник, захIматрал ветеран, шагьрулул 22-мур школа-лицейрал учитель Аьжа Аьбдулгъапурова, балайчи, художница Жанна Кьурбанова, ЦIуссалакрал библиотекалул зузала Фируза Каммаева.
Цана ххирасса шаэрнал, оьрчIал хъинсса дуснал, оьрчIал психологнаннияр хъинну оьрчIал хасият кIулсса чичул юбилей хъунна дуван, чIюлу дуван бувкIун бия шагьрулул 22-мур, 31-мур, 46-мур, 48-мур, 49-мур школарттал дуклаки оьрчIру, МахIачкъалаллал ва Новостройрал школардал ниттил мазрал учительтал.
Ва кьини библиотекалувун бувкIминнал юбилярнал цIаницIун бавхIуну лавхъунни чIявусса хъин-хъинсса махъру. ОьрчIру ххирасса, оьрмулул мюрщиминнащал ва хъуниминнащал ца куццуй усттарну ихтилат буллан кIулсса, цал творчество оьрчIахсса, оьрмулухсса, цимурца чаннамунихсса, хъинмунихсса ччаврил дурцIусса Ссугъури Давдиевичлуя бусанмургу, учинмургу къачанъя ванащал дусну цикссагу шинну хьуминнан, ванал творчество ххираминнан. Юбилярнал цIаницIун бавхIуну ва кьини ихтилатру буллалими чIурчIав дуллай бия Ссугъури Давдиевич ушиврий дагъусттаннал культуралул ца яла яргма вакил, хъунасса интеллигент, уххаву цирив къакIулсса зузала, цалла даврил минахур, марцIшиву, инсаншиву, дакI хъиншиву душиврий ванал хасиятрал агьамми лишанну. ЧIа тIий бия ванан вания тинмайгу чIярусса шиннардий цалла творчество ххирами ххари буллансса, махIаттал буллансса цIуллушиву, даврихсса гъира-шавкь.
Дуклаки оьрчIал дурккунни юбилярнал назмурду, бивзунни къавтIун.
Балайчи, ДР-лул искусствалул лайкь хьусса ишккакку Жанна Кьурбановал Ссугъури Увайсовлул мукъурттий увкунни цаппарасса балайрду, цилва бивщусса музыкалухун.
Ва кьинисса библиотекалул хъамаллуравух ия шаэр Нураттин Юсуповлул арснал арс Нураттин Юсуповгу. Муналгу, юбиляр барча уллай, увкунни ванал оьрмулия ва творчествалия ххуйсса махъру.
Ва библиотекалул дуллалисса чIярусса цаймигу давурттавух гьуртту шайсса лакку мазрал учительталгу бия ва кьинигу шикку: 46-мур школданиясса Светлана Какваева, Якьут Мусаева, 1-мур школданул ниттил мазурдил секциялул каялувчи Шагьун ХIабиева, ЦIусса Кяхулай поселокрайсса 48-мур школданиясса Аматуллагь ЛухIуева, 31-мур школданиясса Жавгьарат Исяева.
Республикалул оьрчIал библиотекалул чулуха юбилярнансса бахшишну хьунни ванал библиографиялул разработка.
Ахирданий Ссугъури Давдиевичлул барчаллагь увкунни ва кьини залданувун бавтIсса цинявннахьвагу, библиотекалун бахшишран буллунни цалва цIусса лу.
