Ноябрьданул 13-нний Дагъусттаннайн ХIукуматрал делегациялущал увкIунни Аьрасатнал Федерациялул ХIукуматрал Председатель Дмитрий Медведев. Делегациялувух бия АьФ-лул Председательнал хъиривчу Александр Хлопонин, АьФ-лул энергетикалул министр Александр Новак, АьФ-лул шяраваллил хозяйствалул министр Александр Ткачев, АьФ-лул Ухссавнил Ккавкказуллал иширттал министр Лев Кузнецов, АьФ-лул цIуллушиву дуруччаврил министр Вероника Скворцова, АьФ-лул СКФО-райсса вакил Сергей Меликов ва цаймигу.

Ми бакъассагу, республикалийн бувкIунни СКФО-рал циняв регионнал бакIчитал.
Заседание хьун хьхьичI билаятрал ХIукуматрал каялувчи лавгунни Дарбантлив, ххал бунни «Дом Петра Первого» музейрал комплекс, цитадель «Нарын-Кала», мукунма 15-мур школа.
Муния махъ Дмитрий Медведевлул Дагъусттаннал ХIукуматрал къатраву ду­­нни Ухссавнил Ккавкказуллал социал-эко­номика хьхьичIуннай шаврин хасъсса ко­ми­ссиялул заседание.
БакIрай Дмитрий Медведевлул бувсунни Дарбантлив лагаврил хIакъираву. «Ти­кку хъуннасса даву дурну дур: тикку бур оьрму, дур хIасиллугу. Гьарзат лайкьну дур – аьвзал заманнул гьайкаллугу, кучардугу бакьин бувну бур, низамрайн бувцуну бур. Жу умудрай бикIанну республикалулгу, федерал центрданулгу цачIусса хIарачатрайну жулва билаятрал яла аьвзалзаманнулмур шагьру щалва низамрайн буциншиврий», — увкунни Д. Медведевлул.
Министртурал кабинетрал бакIчинал бувсунни совещание цIуллушиву дуруччаврил масъаларттан хас дурну душиву.
Дмитрий Медведевлул мукъурттийн бувну, аьмну округрай цIуллушиву дуруччаврил бутIувусса цифрарду къа­оьккисса бур, хаснува демографиялул тагьар ккаккан дуллалими. «Ухссавнил Ккав­кказ уттигу личIлай бур инсаннал оьрму лахъишиврул чулухасса хьхьичIунмурну, дянивну лавсъсса инсаннал оьрму шикку бур яла лахъимурну, щалва билаятрайминнуяр. Мунил дур тIабиаьтрал сававртту. Вилттили оьрчIру литIаву шикку 14 процентрал чан хьуну дунугу, цайми федерал округирттах бурувгун яла лахъмурну личIлай дур – сайки 1,5-лийла гьарзану дур шикку оьрчIру литIаву», — увкунни ганал. Премьер-министрнал увкусса куццуй, медициналул зузалтрал укунмасса оьрчIах буруглагаву къагьассар, аьркинссар му тагьар мархлуцIакулла даххана дуван.
ХIадур бувссар
ХI. Аьдиловлул