Уттигъанну жулла республикалул хъуншагьрулий хьунни Щалагу Аьрасатнал ихтиярду дуруччай органнал дяъвилул, захIматрал, цачIунхьу гужирдал Ветерантурал (пенсионертурал) жяматийсса организациялул Дагъусттанналмур отделениялул жаваб дуллалисса ва бувчIлачIисса (отчетно-выборная) конференция.

Бадрижамал Аьлиева
Мунивух гьуртту хьунни АьФ-лул Социал страхованиялул фонд­рал Дагъусттаннайсса регионал отделениялул хъунаманал хъиривчу Николай Жабин, ДР-лул ХIукуматрал Председательнал хъиривчу Рамазан ЖахIпаров, ДР-лул Халкьуннал Мажлисрал Комитетрал председатель Мурзадин Авезов ва чIявусса цаймигу, министерстварттал ва ведомствар­ттал, жулла республикалул шагьрурдал ва районнал ветерантурал советирттал вакилтал. Махъсса 5 шинал дянив дурсса давурттал жаваб дуллалисса махъ лавхъунни Дагъусттаннал Ветерантурал совет­рал председатель МахIаммад Каримовлул. Конференциялий бувсса цалва ихтилатраву ванал цимилгу хъин чулий кIицI ларгунни Лакрал райондалул Ветерантурал советрал даву. Мукун, ветерантурахасса ххуйсса аякьалийн бувну, патриот зумунусса ва интернационал зумунусса тарбиялул ххуллий дуллалисса мероприятиярттайн, давурттайн ва цаймигу ккаккиярттайн бувну, хьхьичIунну зузисса ххюра райондалул Ветерантурал советирттавух дирхьунни Лакрал райондалулмур цIагу. Республикалул ветерантурал советрал хъунаманал хъунмасса барчаллагь увкунни Лакрал райондалул администрациялухь, хасну райондалул бакIчинахь Юсуп ХIамидовичлухь, райондалул Ветерантурал советрал хъунаманахь, дуллалисса давурттахлу.
Лакрал райондалул чулуха ва конференциялувух гьуртту хьунни райондалул Ветерантурал советрал председатель Сулайман ХIажиев ва мунал хъиривчу, Ккурккуллал школданул директор Даниял Магьдиев. Конференциялий вайннал лавхъунни махъру, бувсунни цалла дурсса, дуллалисса давурттая. Муданма кунма, яргсса дакIний личIансса бия Даниял Магьдиевлул ихтилат.
Конференциялия махъ миннащалсса хьунабакьаву хьунни кказитрал редакциялий. Лакрал райондалул Ветерантурал совет­рал дурсса ххуйсса давурттавасса цану дур гьашину Бюхттулсса Ххувшаву ларсун 70 шинал юбилейрал хьунийн Буттал КIанттул цIанийсса Хъунмасса дяъвилул майданнай жанну дуллусса 57-гу ккуркличунан дурсса медаллу. Ми дурну дур Даниял Магьдиевлул сипталийну. Мунал сипталул чIарав авцIуну ур гьарцагу цIушинналун, дуллалисса даврин кабакьу бувай­сса Сулайман ХIажиевгу. Гьарца медальданий цийра чирчуну дур дяъвилий ливчIманал цIа. Ва даврил спонсоршиву дурну дур Даниял Магьдиевлул уссил оьрчIал Магьдиев Эльдар Тагьманнул арснал. Таганрог шагьрулий ялапар хъанахъисса Эльдардул, харжлугъгу щаллуну цайнна ларсун, медаллу заказ дурну дур Ростоврай. Ккурк­лив дучIан дурну, ми дуллуну дур 57-гу ккуркличунал гъан-маччанан. Ми цинярдагу дирхьуну дур Ккур­ккуллал музейраву. Укунсса даву цамур кIанай чувчIав дурну дакъар – дяъвилул цIараву ливтIуминнан медаллу дулаву. Цалчинна-цалчин­сса медаль дуллуну дур шадлугърал тагьарданий райондалул бакIчи Юсуп МахIаммадовлул 9-мур майрал кьини.
Ва ххуллухсса конференциялийсса ихтилатру хьуну бур чIярусса цIушиннарду Лакрал райондалул Ветерантурал советрал дуллай бушивриясса.
Ккуркливсса музейраву бур аьрай жанну кьурван дурсса 57-гу ккуркличунал цIарду чирчу­сса ттугъругу. Вагу хъанай дур ца цIушинна. Ккурккуллал школданийсса пионертурал организациялул пахрулий ларсун най дур «Ватандалухлу жанну дуллусса 57-гу ккуркличунал» цIа.
— Щин ччайнугу, щин къаччайнугу, жул школданийсса оьрчIру гьарца кьини бавхIуну занай бу­ссар ятIулсса пионер галстукру, жу ми букьан къабуварду. Цанчирча, ятIул галстук – му ххувшаврил лишанни. Ва ялагу, музейраву буссар 2 стенд – ца аьрай ливтIусса 57-гу ккуркличунан хас бувсса, цагу – зана хьумигу, талатаврил майданнай ливчIмигу хIисавну, 129-гу виричунан хасъсса, — буслай ур Д. Магьдиев.
Ми цинявнналлагу, 129-гу ккуркличунал, суратругу рамкардаву дирхьуну дур. Му давугу дурну дур Даниял Магьдиевлул уссил Тельманнул.
Ва кьини Даниял Магьдиевлухь бия, конференциялийгу ккаккан буван цащалва лавсъссия тIий, Ккурккуллал шярава дяъвилий хьхьичIа-хьхьичI ивкIусса Магьдиев ХIажимуса АьбдулпаттахIнал арснал сумкагу (планшет). ХIажимуса ивкIун ур 26 шинавусса офицер.
Уку-укунсса давурттайнур яла-яла махъа нанисса ник ватан ххирану, ххаллилсса ттаттахъал аьпа­лун лайкьну къуццу тIий тарбия шайсса. Ва давриву, щак бакъа, Лакрал райондалул Ветерантурал советрал дуллалисса даврилмур бутIа хъунмасса бур.