Ноябрьданул 25-нний, Москавливгу унува, ДР-лул БакIчи Рамазан АьбдуллатIиповлул барча увкунни АьФ-лул ва Дагъусттаннал хьхьичIунсса паччахIлугърал ва жяматийсса ишккакку МахIаммад Юсуповлухь ганал 80 шин шаврил юбилей.
Миннал ихтилатраву М. Юсуповлул бувсунни региондалий махъсса ппурттуву хъинчулийсса дахханашивуртту хьуну душиву.
Рамазан АьбдуллатIиповлул кIанахь бувсунни билаятрал Президент Владимир Путиннул республикалух хъуннасса къулагъас дуллай ушиву, мукунма бувсунни уттигъанну региондалийн АьФ-лул ХIукуматрал Председатель Дмитрий Медведев увкIун ивкIшиву.
Рамазан АьбдуллатIиповлул бувсунни юбилярнал лайкьсса давурттаяту. Ганал мукъурттийн бувну, М. Юсуповлул бивтун бур яргсса оьрмулул ххуллу, тамансса шиннардий республикалул лавайми даражалул органнаву хъунисса къуллугъирттай зий ивкIун.
Рамазан АьбдуллатIиповлул увкусса куццуй, МахIаммад Юсупов зий ивкIссар КПСС-рал Дагъусттаннал Обкомрал 1-ма секретарну, РСФСР-данул Госпландалул Председательнал хъиривчуну, Аьрасатнал Федерациялул экономикалул министрнал хъиривчуну, Грециянал республикалий АьФ-лул машлул вакилну. Мукуна М. Юсупов увчIуну ивкIссар ДАССР-данул Верховный Советрал депутатну, СССР-данул Верховный Советрал депутатну.
М. Юсуповлун дуллуссар чIярусса паччахIлугърал наградартту.
Дагъусттаннай лайкьсса давуртту даврихлу, Рамазан АьбдуллатIиповлул юбилярнан дуллунни «За любовь к родной земле» тIисса хIурматрал лишан.
ХIадур бувссар ХI. Аьдиловлул
