Ноябрьданул 24-нний Сириянал аьрщарай F-16 туркнал истребительданул итадаркьусса ракеталул руртунни Аьрасатнал самолет СУ-24. Аьрасатнал Президент В. Путиннул бувсунни му иширал Аьрасатнал ва Туркнал хIукуматирттал арарду ххараххан дантIишиву.
А. Аьбдуллаева
Аьрасатнал самолет СУ-24 руртун дур 6 азара метралул лахъишиврий Туркнал дазуя ца километ­ралул архну.
Сочилий Иорданнал паччахI Абдолла II-щалсса хьунабакьаврий Аьрасатнал Президент В. Путиннул увкунни:
— Аьрасатнал самолетрая Турк­нал хIукуматран цукунчIавсса нигьачIаву къадиркIссар. Му Сириянавусса Исламрал паччахIлугърайн къаршисса операцияр бивкIсса, — куну.
В. Путиннул бувсунни Аьрасатнал бомбардировщик Аьрасатнавасса боевиктал цачIун хьу­сса кIанттурдайн ттупру бичлай диркIшиву.
Сириянаву талатисса Аьрасатнавасса боевиктал махъунмай Аьра­сатнавун зана хьунсса нигьачIаву душиву.
— Аьрасатнал самолет рутаву – му террористурал чул бувгьуминнал жулла ттиликIрахух рищавур, — увкунни В. Путиннул. — Аьрасатнан нукIува хIисав хьуссар Сириянал ИГИЛ-данул биялдарайсса районная Турциянавун чIявусса навт ва навтлил сурсатру най душиву, Турциянавагу террористуран ххуйсса арцу най душиву.
Му къагьану, утти террористуращал талатисса жулла самолетгу руртунни. Му иш хьунни жура Американащал гьаваллаву цукунчIавсса ишру къахьунсса кьутIи чирчуну дунура, Турциянал хIукуматрал цивппагу Американал коалициялуву террористуращал талатишиву баян буллай бунува.
ИГИЛ-данучIа навт бахлай миллионну, бюхъай миллиардругума, доллардал бушивруцIун, ми цаппара хIукуматирттал ярагъуннил гужирдайнугу буручлай бур. Муниятур террористал мукссава нигь-нач дакъа сукку тIутIисса, рахIму-цIими къабувну инсантал литIлатIисса, щалла дунияллий терактру дуллалисса. Аьрасатнал самолетращал тукунсса иш хьувкун, мугьлат бакъа жуйнма буккан кIанай, Турция НАТО-лувусса цалва партнертурайн бувккунни. Миннан НАТО ИГИЛ-данул лавай бацIан бан ччай бур. Аьрасатнан къакьамулссар цалла чулухуннай укунсса тахсиркаршиву даву. Му иширал Аьрасатнал ва Турциянал дяниялу зия дантIиссар, — увкунни Аьрасатнал Президентнал.
Щаллагу дунияллийх терроризм ппив хьусса тагьарданий, террористуращал цачIу талан аьркиншиву бувсунни Иорданнал паччахIналгу.
Аьрасатнал президентнал бувсунни СУ-24 самолетрал экипажран ПаччахIлугърал бюхттулсса наградартту дулунтIишиву. Аьрали бурж лахълай ккаккан дурсса къучагъшиврухлу командир Пешиков Олег Анатольевичлун (аьпалул хьуну махъ) Аьрасатнал Виричу тIисса цIа дулунтIишиву. .